“Hane nihula nto yene ni fumana hahulu taata kutiyela, neli takazo ya kuba ni somano ni bashimani babañwi. Neninahananga kuli nenika tuhela kuba ni takazo yeo hase ni hulile, kono ni ka nako ye nisanani takazo yeswana yeo.”—David, wa lilimo ze 23.

 David ki Mukreste yabata kutabisa Mulimu. Kana wakona kutabisa Mulimu inze anani litakazo za kueza somano ni bashimani babañwi? Ki ufi mubonelo wa Mulimu ka za kalombe?

•  Bibele ibulelañi fa taba ye?

•  Kana taba yeo italusa kuli . . . ?

•  Kono kucwañi haiba . . . ?

 Mibonelo ya batu fa taba ya kalombe yashutana-shutana kabakala kushutana kwa libaka ni linako zebapila. Mubonelo wa Bakreste ona hausika toma fa mihupulo ya batu yeatile mwa lifasi kamba mane “kukashezwa kwa ni kwani ki moya kaufela wa tuto ka bupumi bwa batu.” (Maefese 4:14) Kono mubonelo wabona fa muzamao wa kalombe (ni muzamao kaufela) utomile fa likuka za mwa Bibele.

 Likuka za mwa Bibele zebulela ka za kalombe za ikutwahalela. Linzwi la Mulimu libulela kuli:

•  “Usike walobala ni muuna mokulobalelwa ni musali.”—Livitike 18:22.

•  ‘Mulimu, kulikana ni litakazo za lipilu zabona, . . . naa basiile ni kubatuhelela kuya ka litakazo za kulobala ni mutu zeswabisa, kakuli basali mwahalaa bona basiile mukwa wa sipepo wa kulobala ni baana ni kukala kulobalana.’—Maroma 1:24, 26.

•  “Musike mwaipuma. Batu babapila ka muzamao wa buhule, babalapela milimu ya maswaniso, babuki, baana babalumela kuezwa basali, baana babalobala ni baana ka bona, masholi, ba mukwañuli, macakolwa, kamba ba matapa, ni babukuli habana kuyola saanda sa Mubuso wa Mulimu.”—1 Makorinte 6:9, 10.

 Likuka za Mulimu liama kwa batu kaufela, ibe kuli ki ba kalombe, ki baana banani litakazo za kulobala ni basali kamba basali banani litakazo za kulobala ni baana. Niti ki kuli, kaufelaa luna luswanela kuambuka litakazo za kuikenya mwa muzamao osatabisi Mulimu.—Makolose 3:5.

 Kana taba yeo italusa kuli Bibele ilususueza kutoya batu ba kalombe?

 Batili. Bibele hai lususuezi kutoya mutu ufi kamba ufi ibe kuli ki wa kalombe kamba yanani litakazo za somano zeswanela. Kono mane ilususueza kuli ‘lutundamene kupila ka kozo ni batu kaufela,’ kusina taba ni mupilelo wabona. (Maheberu 12:14) Kacwalo, kufosahalile kutolisa batu ba kalombe, kubalwanisa mane ni kuikenya mwa likezo zeñwi za kubanyandisa.

 Kana taba yeo italusa kuli Bakreste baswanela kulwanisa milao yelumeleza muuna ni muuna kamba musali ni musali kunyalana?

 Bibele ibonisa kuli Mulimu ulukisize kuli linyalo libe feela mwahalaa muuna ni musali. (Mateu 19:4-6) Nihakulicwalo, milao yetomiwanga ki muuso yeama linyalo mwahalaa muuna ni muuna kamba musali ni musali itomanga fa mihupulo ya lipolitiki isi fa likuka za muzamao. Bibele italuseza Bakreste kuikambusa kwa litaba za lipolitiki. (Joani 18:36) Kacwalo, Bakreste habayemelangi kamba kulwanisa milao yetomilwe ki ba muuso ka za linyalo leli mwahalaa muuna ni muuna kamba musali ni musali kamba milao yemiñwi yeama likezo za kalombe.

 Kono kucwañi haiba mutu yomuñwi ka nako ya cwale ki wa kalombe? Kana wakona kucinca?

 Eni. Mane batu babañwi mwa linako za baapositola nebaezize cwalo! Hamulaho wa kubulela kuli baana babalobala ni baana ka bona habana kuyola saanda sa mubuso wa Mulimu, Bibele ibulela kuli: “Ki mona mone bainezi babañwi ku mina cwalo.”—1 Makorinte 6:11.

 Kana taba yeo italusa kuli batu baba tuhezi kuikenya mwa kalombe habasana nihanyinyani litakazo zene babanga ni zona mwa mupilelo wa bona wa kale? Batili. Bibele ibulela kuli: “Muapale butu bobunca, ili bobusweli kuuncafazwa ka zibo yenepahezi.” (Makolose 3:10) Luswanela kuzwelapili kucinca butu bwaluna.

 Kono kucwañi haiba mutu yabata kulatelela likuka za Mulimu usanani litakazo za kalombe?

 Sina feela mutu yanani litakazo zeñwi hakona kulitibela, mutu yanani litakazo za kalombe ni yena wakona kutibela litakazo zeo ni kusa zwelapili kunahana ka za teñi. Ukona kueza cwañi cwalo? Bibele ibulela kuli: “Muzwelepili kuzamaya ka moya mi hamuna kuya ka litakazo za nama.”—Magalata 5:16.

 Mulemuhe kuli timana ye haibuleli kuli mutu haakoni kuba ni litakazo za nama. Kono italusa kuli haiba mutu yo azwelapili kueza lika za kwa moya ili kuituta Bibele ni kulapela, ukaba ni maata a kuhanyeza litakazo zeo.

 David, yabulezwi kwa makalelo, naalemuhile kuli taba yeo ki yaniti hamulaho wa kutaluseza bashemi bahae ba Sikreste ka za butata bwanaakopana ni bona. Utalusa kuli “Neniikutwile feela inge kuli neniimuluzwi kwa mushimbo one uli fa maheta aka, mane kambe nenitaluselize bashemi baka kwa makalelo ka za butata bone nikopana ni bona, nenika ikola hahulu bupilo ka nako yene nihula.”

 Haiba luzwelapili kulatelela likuka za Jehova, lukaba ni tabo yetuna. Lunani buikolwiso bwa kuli likuka za Jehova “lilukile, litabisa pilu,” mane “kulimamela kufumanisa mupuzo omutuna.”—Samu 19:8, 11.