Babilona Yomutuna yabulezwi mwa buka ya Sinulo, ki kopano ya bulapeli kaufela bwa buhata mwa lifasi, ili bulapeli bwahanile Mulimu. a (Sinulo 14:8; 17:5; 18:21) Nihaike kuli bulapeli bo bwashutana mwa linzila zeñata, kaufelaa bona butahisa kuli batu basike balapela Mulimu wa niti, yena Jehova.—Deuteronoma 4:35.

Zelutusa kuziba Babilona Yomutuna

1.   Babilona Yomutuna ki pulelo ya swanisezo. Bibele ibulela kuli ki “musali” ni kuli ki “lihule lelituna,” lelinani libizo lelili “kunutu,” lona la “Babilona Yomutuna.” (Sinulo 17:1, 3, 5) Mwa buka ya Sinulo, litaba libulezwi “ka kuitusisa lisupo”; kacwalo, Babilona Yomutuna haki musali wa luli, kono ki pulelo feela ya swanisezo. (Sinulo 1:1) Hape musali yo ‘uinzi fa mezi amañata,’ ayemela “batu ni buñata ni macaba ni malimi.” (Sinulo 17:1, 15) Musali wa luli hakoni kueza cwalo.

2.   Babilona Yomutuna uyemela kopano ye mwa lifasi kaufela. Musali yo ubizwa “muleneñi omutuna onani mubuso obusa malena ba lifasi.” (Sinulo 17:18) Kacwalo, ufumaneha mwa lifasi kaufela mi ukukueza batu kai ni kai.

3.   Babilona Yomutuna ki kopano ya bulapeli, haki kopano ya lipolitiki kamba ya lipisinisi. Babilona ya kwakale neli muleneñi mone kunani hahulu za bulapeli, mi neuzibahala ka litumelo za mioya zecwale ka kuitusisa “liposo” ni “buloi.” (Isaya 47:1, 12, 13; Jeremia 50:1, 2, 38) Mane bulapeli bwa buhata bobulwanisa Mulimu wa niti, yena Jehova, nebufumaneha mwa muleneñi wo. (Genese 10:8, 9; 11:2-4, 8) Malena ba mwa Babilona nebaikutwa kuli neli ba butokwa hahulu kufita Jehova ni bulapeli bwahae. (Isaya 14:4, 13, 14; Daniele 5:2-4, 23) Ka mukwa oswana, Babilona Yomutuna uzibahala ka “likezo [zahae] za tumelo ya mioya.” Taba yeo ibonisa kuli ki kopano ya bulapeli.—Sinulo 18:23.

    Babilona Yomutuna hakoni kuba kopano ya lipolitiki kabakala kuli “malena ba lifasi” baka mulila haakayundiswa. (Sinulo 17:1, 2; 18:9) Hape hakoni kuba kopano ya lipisinisi, bakeñisa kuli Bibele imutaluhanya kwa “balekisi ba lifasi.”—Sinulo 18:11, 15.

4.   Babilona Yomutuna uyemela bulapeli bwa buhata. Kufita kuluta batu kuli basutelele ku Mulimu wa niti, yena Jehova, bulapeli bwa buhata butahisa kuli batu balapele milimu isili. Bibele ibulela kuli kulapela milimu isili ki buhule bwa kwa moya. (Livitike 20:6; Exoda 34:15, 16) Litumelo zecwale ka Silaalu, tumelo ya kuli moyo haushwi, ni kulapela maswaniso nelitumile mwa Babilona wa kwakale mi litumelo zecwalo litumile hahulu mwa bulapeli bwa buhata. Bulapeli bo hape bwalata lika za lifasi. Bibele ibulela kuli kusasepahala kokucwalo ki bubuki bwa kwa moya.—Jakobo 4:4.

    Bulapeli bwa buhata bunani sifumu mi buiponahalisa kabakala sifumu seo, ili kulumelelana ni zeibulela Bibele ka za Babilona Yomutuna kuli “naaapezi liapalo za mubala wa pulipela ni za bufubelu bobutona” mi “naaikabisize ka gauda ni macwe a butokwa ni lipelela.” (Sinulo 17:4) Babilona Yomutuna ki yena simbule sa lika “zenyenyisa za lifasi,” kamba lituto ni likezo zeshubulisa Mulimu. (Sinulo 17:5) Baba mwa bulapeli bwa buhata ki “batu ni buñata ni macaba ni malimi” babayemela Babilona Yomutuna.—Sinulo 17:15.

 Babilona Yomutuna ki yena yatahisize lifu la “batu kaufela bababulailwe mwa lifasi.” (Sinulo 18:24) Kuzwa feela kwamulaho, bulapeli bwa buhata butahisize kuli batu baye kwa ndwa ni kuikenya mwa likezo za businyi, bulapeli bo hape bupalezwi kuluta batu niti ka za Jehova, yena Mulimu yalilato. (1 Joani 4:8) Kueza cwalo kutahisize kuli mali a batu babañata asululwe. Kwaswanela luli kuli batu bababata kutabisa Mulimu ‘bazwe ku yena’ ni kuikauhanya kwa bulapeli bwa buhata.—Sinulo 18:4; 2 Makorinte 6:14-17.