Balikani baluna bakona kulutusa kuba ni tabo ni kukondisa mwa bupilo. Balikani babande bakona kulususueza kueza lika zende ni kulutusa kuba batu babande.—Liproverbia 27:17.

 Nihakulicwalo, Bibele ilutaluseza kuli ki kwa butokwa kuketa hande balikani. Ilulemusa ka za lika zemaswe zekona kuezahala haiba luba ni balikani babamaswe. (Liproverbia 13:20; 1 Makorinte 15:33) Balikani babacwalo bakona kutahisa kuli mutu aeze likatulo zemaswe kamba mane kusinya mikwa yahae yeminde.

Ze mwa taba ye

•  Mulikani yomunde ki yacwañi?

•  Ki ifi mitala yemiñwi ya balikani babande yefumaneha mwa Bibele?

•  Kana mutu wakona kuba mulikanaa Mulimu?

•  Litimana za mwa Bibele zebulela ka za silikani

 Bibele iluta kuli silikani sesinde siswanela kutoma fa nto yeñwi ya butokwa hahulu isiñi feela fa taba ya kuli batu bababata kuba balikani batabela lika zeswana. Ka mutala, Samu 119:63 ibulela kuli: “Ni mulikanaa baba kusaba a kaufela ni babamamela litaelo zahao.” Mulemuhe kuli muñoli wa Bibele yo naaketile balikani bane basaba Mulimu ni kupila ka likuka zahae.

 Bibele hape italusa tulemeno twaswanela kuba ni tona mulikani yomunde. Ka mutala:

•   “Mulikani wa niti ubonisa lilato ka nako kaufela, mi upepezwi kuli abe mwanahabo mutu mwa linako za ziyezi.”—Liproverbia 17:17.

•   “Kunani balikani babaitukiselize kuezana maswe, kono kunani mulikani yakumalela hahulu mutu kufita mwanahabo.”—Liproverbia 18:24.

 Litimana ze liluta kuli mulikani yomunde ki yanani busepahali, lilato, sishemo, ni bufani. Mulikani yomunde ki mutu yelukona kusepa kuli uka lutusa halukopana ni miinelo yetaata. Mulikani yomunde hape ukaba ni bundume bwa kulutusa halueza lika zemaswe kamba halubata kueza katulo yesika luka.—Liproverbia 27:6, 9.

 Mwa Bibele kunani mitala ya batu bane bali balikani babande kusina taba ni kuli nebashutana kwa lilimo, lisimuluho, lizo, ni mayemo a mwa bupilo. Halunyakisiseñi mitala yemilaalu ya balikani babacwalo.

•   Ruti ni Naomi. Ruti neli mukwenyanaa Naomi, mi kubonahala kuli Naomi neli yomuhulu hahulu ku Ruti. Kuzwa fo, simuluho ya Ruti neishutana ni ya Naomi. Kusina taba ni kushutana ko, nebabile balikani babatuna mi nebalatana.—Ruti 1:16.

•   Davida ni Jonatani. Nihaike kuli Jonatani neli yomuhulu ku Davida ka lilimo ze 30, Bibele ibulela kuli Davida ni Jonatani neli “balikani babatuna.”—1 Samuele 18:1.

•   Jesu ni baapositola bahae. Jesu naanani maata fahalimwaa baapositola bahae kakuli neli muluti ni mulenaa bona. (Joani 13:13) Kono naasaikutwi kuli habaswaneli kuba balikani bahae. Ka kushutana, Jesu naali mulikani yomutuna kwa batu bane balatelela lituto zahae. Naabulezi kuli: “Nimibizize balikani, kakuli nimizibisize lika kaufela zeniutwile ku Ndate.”—Joani 15:14, 15.

 Eni, batu bakona kuba balikani ba Mulimu. Bibele ibulela kuli: “Uitama bulikani bobutuna ni babalukile.” (Liproverbia 3:32) Ka mubulelelo omuñwi, Mulimu uitama silikani ni batu babaeza zende, babasepahala, babakutekeha, ni babalikanga ka taata kupila ka likuka zahae ka za zelukile ni zesika luka. Ka mutala, muuna yasepahala Abrahama ubulezwi ka kunonga mwa Mañolo kuli ki mulikanaa Mulimu.—2 Makolonika 20:7; Isaya 41:8; Jakobo 2:23.