Bibele Ibulelañi ka za Kukutisa Misuha?
Kalabo ya Bibele
Nihaike kuli mutu ukona kuikutwa kuli unani libaka leliswanela la kukutisa misuha, kueza cwalo kulwanisana ni kelezo ya mwa Bibele ye, yeli: “Usike wali: ‘Nika mueza sina mwaniezelize; nika mukutiseza misuha.’” (Liproverbia 24:29, litaluso ze kwatasi) Mwa Bibele, kunani likelezo zende zetusize batu babañata kutuhela moya wa kulata kukutisa misuha.
Zeluka nyakisisa mwa taba ye
Ki kabakalañi kukutisa misuha hakufosahalile?
Haiba mutu yomuñwi amifoseza kamba amiholofaza, kubunolo hahulu kumunyemela ni kubata kuli mutu yo afiwe koto kabakala zaezize. Nihakulicwalo, kukutiseza mutu misuha hakulumelelani ni lushango lwa mwa Bibele. Kabakalañi?
Batu babakutiseza babañwi misuha habatabisi Mulimu. Mwa Bibele, Jehova a Mulimu ubulela kuli: “Ki na yakutiseza bumaswe; ki na yakakutiseza.” (Maroma 12:19) Bibele isusueza batu babafoselizwe kubata linzila za kutatulula butata ka kozo mwa sibaka sa kukutisa misuha. (Maroma 12:18) Kono kucwañi haiba mutu uezize mwakonela kaufela kutatulula butata ka kozo kono kupalile? Mañolo alususueza kulibelela ku Jehova kuli ukatatulula miinelo halusa ezwi hande.—Samu 42:10, 11.
Mulimu ufanga cwañi koto?
Ka nako yacwale, Mulimu ulumelelize mibuso ya lifasi kufa koto batu babaeza lika zemaswe. (Maroma 13:1-4) Kono hamulaho wa nako, ukayundisa batu kaufela babaeza lika zemaswe mi ukafelisa manyando kuya kuile.—Isaya 11:4.
Ki lika mañi zekona kunitusa kutuhela moya wa kulata kukutisa misuha?
Muambuke kueza lika ka kayeye. (Liproverbia 17:27) Batu babaezanga lika kabakala kuli banyemile hañata bainyazanga hasamulaho. Kono batu bababanga ni nako ya kunahanisisa pili basika anga kale muhato hañata baezanga likatulo zende.—Liproverbia 29:11.
Muzibe buniti bwa taba. (Liproverbia 18:13) Mutu yafoselizwe uswanela kuipuza kuli: ‘Kana kunani litaba zeñwi zenisa zibi zetahisize kuli mutu yanifoselize aeze cwalo? Kana kunani butata bobuñwi bwakopana ni bona? Kamba kana naaezize cwalo asazibi kuli uka nifoseza?’ Fokuñwi, lukona kunahana kuli mutu yomuñwi ulufoselize ka bomu, kono mane mwendi uezize cwalo ka kusalela.
Mibonelo yefosahezi ka za kukutisa misuha
Mubonelo ofosahezi: Bibele yalumeleza kukutisa misuha haibulela kuli “liito ka liito.”—Livitike 24:20, Bibele ya Contemporary English Version.
Niti ya taba: Taelo ya “liito ka liito” yenefilwe kwa Maisilaele ba kwaikale neisa susuezi batu kukutisa misuha. Kono mane neitusa baatuli kufa katulo yeswanela kulikana ni mulatu waezize mutu. b—Deuteronoma 19:15-21.
Mubonelo ofosahezi: Bakeñisa kuli Bibele haisusuezi kukutisa misuha, halukoni kuitwanela halulwaniswa.
Niti ya taba: Haiba mutu alwaniswa, unani tukelo ya kuitwanela kamba kukupa tuso kwa muuso. Niteñi, Bibele ibonisa kuli luswanela kuambuka lindwa ka molukonela kaufela.—Liproverbia 17:14.
Hape Mwendi Mwakona Kutabela Litaba Ze
TAWALA YA MULIBELELI
Zekona Kumitusa Kufelisa Sitoyo—Musike Mwakutiseza Babañwi Bumaswe
Mufelise maikuto a kubata kukutiseza babañwi bumaswe ka kusepa kuli Mulimu atuha afelisa bumaswe kaufela.
LIKALABO KWA LIPUZO ZA BIBELE
“Kulata Lila Zamina” Kutalusañi?
Kukona kuba hahulu taata kusebelisa manzwi anaabulezi Jesu.
