Joani Mukolobezi neli mupolofita wa Mulimu. (Luka 1:76) Naapepilwe nakonyana pili Jesu asika pepwa kale. Mulimu naamufile musebezi wa kulukisa nzila ya Mesia, kamba Kreste. Joani naaezize cwalo ka kukutaza lushango lwa Mulimu kwa Majuda sina yena ilikuli abatuse kukutela ku Mulimu.—Mareka 1:1-4; Luka 1:13, 16, 17.

 Lushango lwanaakutalize Joani nelutusize batu ba lipilu zende bane bateelelize ku yena kulemuha kuli Jesu wa Nazareta ki yena Mesia yanaasepisizwe. (Mateu 11:10) Joani naasusuelize bateelezi bahae kuli babakele libi zabona mi babonise cwalo ka kukolobezwa. (Luka 3:3-6) Bakeñisa kuli Joani naakolobelize batu babañata, ubizwa kuli Mukolobezi kamba Yakolobeza. Jesu ki yena mutu wa butokwa hahulu yanaakolobelizwe ki Joani. a—Mareka 1:9.

Ze mwa taba ye

•  Ki lika mañi zenetahisize kuli Joani Mukolobezi abe yaipitezi?

•  Bashemi ba Joani Mukolobezi neli bo mañi?

•  Ki mañi yanaatahisize kuli Joani Mukolobezi abulaiwe?

•  Kana Joani Mukolobezi ni Jesu nebakangisana?

•  Ki bo Joani babakai bababulezwi mwa Bibele?

 Musebezi wanaaka eza neupolofitilwe: Ka kueza musebezi wa kukutaza, Joani naatalelelize bupolofita bone bubulela ka za numwana wa Jehova. (Malaki 3:1; Mateu 3:1-3) Neli yena ‘yanaalukiselize Jehova batu babaitukiselize’—ili kutalusa kuli, naatusize Majuda sina yena kuamuhela lushango lwa muyemeli yomutuna wa Jehova Mulimu, yena Jesu Kreste.—Luka 1:17.

 Zahupulwa ka zona: Jesu naabulezi kuli: “Hakusika bonwa yafita Joani Mukolobezi, kono yomunyinyani mwa Mubuso wa mahalimu ki yomutuna ku yena.” (Mateu 11:11) Bakeñisa kuli Joani neli mupolofita ni “numwana,” hakuna mutangaa Mulimu yanaapilile pili yena asika pepwa kale yanaangiwa kuli ki yomutuna. Manzwi a Jesu hape abonisa kuli Joani haana kuba mulena mwa Mubuso wa kwa lihalimu. b Mupolofita yasepahala yo naashwile pili Kreste asika kwalula kale nzila yekonisa batu kuya kwa lihalimu. (Maheberu 10:19, 20) Nihakulicwalo, Joani ukato busiwa ki Mubuso wa Mulimu, mi ukaba ni kolo ya kuto pila kuya kuile mwa paradaisi fa lifasi.—Samu 37:29; Luka 23:43.

 Bashemi ba Joani neli Zakaria ni Elizabeta. Zakaria neli muprisita wa Mujuda. Joani naapepilwe ka makazo kakuli mahe neli mumba, kamba naasakoni kuba ni bana. Kuzwa fo, Elizabeta ni muunaa hae “nese basupezi.”—Luka 1:5-7, 13.

 Mulena Heroda Antipasi ki yena yanaalaezi kuli Joani apumiwe toho. Naezize cwalo kabakala kuli naakukuelizwe ki musalaa hae, Herodiasi. Herodiasi naatoile Joani bakeñisa kuli Joani naabulelezi Heroda yanaaipapata kuli ki Mujuda, kuli linyalo lahae ni Herodiasi nesi la ka mulao kakuli nebasika latelela mulao wa Sijuda.—Mateu 14:1-12; Mareka 6:16-19.

 Taba ya kuli Joani ni Jesu nebakangisana haiyo mwa Bibele. (Joani 3:25-30) Mane Joani yena kasibili naatalusize kuli naanani buikalabelo bwa kulukiseza Mesia nzila isiñi kukangisana ni yena. Joani naabulezi kuli: “Nitilo kolobeleza mwa mezi . . . kuli abonahale ku Isilaele.” Hape naaekelize kuli: “Yo ki Mwanaa Mulimu.” (Joani 1:26-34) Kacwalo, Joani naatabile hahulu hanaautwile kuli Jesu usweli kupeta hande bukombwa bwahae.