Kana Diabulosi Uteñi Luli?
Kalabo ya Bibele
Eni, Diabulosi uteñi luli. Ki yena “mubusi wa lifasi,” sona sibupiwa sa moya sene sikalile kueza lika zemaswe ni kukwenuhela Mulimu. (Joani 14:30; Maefese 6:11, 12) Bibele italusa mwainezi Diabulosi ka kuitusisa mabizo alatelela:
Satani, ili lelitalusa “Muhanyezi.”—Jobo 1:6.
Diabulosi, ili lelitalusa “Lisawana.”—Sinulo 12:9.
Noha, ili leliitusisizwe mwa Bibele kutalusa “Mupumi.”—2 Makorinte 11:3.
Muliki.—Mateu 4:3.
Lihata.—Joani 8:44.
Diabulosi uteñi luli haki bumaswe bobufumaneha ku mañi ni mañi
Batu babañwi balumela kuli Satani Diabulosi ki bumaswe bobufumaneha mwa lipilu zaluna. Nihakulicwalo, Bibele ibulela za puisano yenebile teñi mwahalaa Mulimu ni Satani. Mulimu upetahalile; kacwalo, haana bumaswe mwa pilu yahae bwanaakona kuambola ni bona. (Deuteronoma 32:4; Jobo 2:1-6) Ka mukwa oswana, Satani naalikile Jesu, yena yasina sibi. (Mateu 4:8-10; 1 Joani 3:5) Kacwalo, Bibele ibonisa kuli Diabulosi uteñi luli isiñi kuli ki nto feela yemaswe ye mwa pilu.
Kana lwaswanela kukomoka haiba batu babañata habalumeli kuli Diabulosi uteñi luli? Batili, kakuli Bibele ibulela kuli Satani uitusisa bupumi kuli ataleleze milelo yahae. (2 Matesalonika 2:9, 10) Nzila yeñwi yetuna yaeza cwalo ka yona ki kufoufaza minahano ya batu babañata kuli basike balumela kuli uteñi luli.—2 Makorinte 4:4.
Mibonelo yemiñwi yefosahezi ka za Diabulosi
Mubonelo ofosahezi: Lusifa ki libizo leliñwi la Diabulosi.
Niti ya taba: Linzwi la Siheberu lelitolokilwe mwa Libibele zeñwi kuli “Lusifa” litalusa “yabenya.” (Isaya 14:12) Litaba zeñwi zebulezwi mwa liñolo le, libonisa kuli linzwi leo liitusisizwe kutalusa lusika kamba babusi bane babusize Babilona, ili bao Mulimu naakatompolola kabakala buikuhumuso bwabona. (Isaya 14:4, 13-20) Linzwi la “yabenya” neliitusisizwe kusheununa lusika lwa malena ba Mababilona hamulaho wa kutululwa fa bulena.
Mubonelo ofosahezi: Satani usebeleza Mulimu sina muatuli.
Niti ya taba: Diabulosi ki sila sa Mulimu, isiñi mutangaa hae. Satani Diabulosi ulwanisa batanga ba Mulimu ni kubatameleza litaba za buhata.—1 Pitrosi 5:8; Sinulo 12:10.
Hape Mwendi Mwakona Kutabela Litaba Ze
TAWALA YA MULIBELELI
Kana Satani ki Sisupo Feela se si Yemela Bumaswe?
Litaba ze peli za mwa Bibele li alaba puzo yeo.
LITUTO ZA BUTOKWA ZA MWA BIBELE
Ki Kabakalañi Mulimu Hatuhelezi Manyando?
Batu babañata baipuzanga ka za libaka mwa lifasi hakunani hahulu sitoyo ni manyando. Bibele ilufa kalabo yekolwisa ili yeomba-omba.
