Lihele (Sheoli ni Hadesi ka kuya ka lipuo mone iñozwi Bibele kwa makalelo) ki libita isiñi sibaka sa mulilo mokutukufazwanga batu. Ki bo mañi babayanga mwa lihele? Kuyanga batu babande ni babamaswe. (Jobo 14:13; Samu 9:17) Bibele ibulela kuli libita le la batu kaufela ki “ndu kokuka yo kopanela babapila kaufela”—Jobo 30:23.

 Nihaiba Jesu naaile mwa lihele hanaashwile. Nihakulicwalo, “naasika tuhelelwa mwa lihele,” kakuli Mulimu naamuzusize kwa bafu.—Likezo 2:31, 32, Bibele ya The Bible in Basic English.

Kana lihele likaba teñi kuya kuile?

 Batu kaufela babali mwa lihele bakazwa mwateñi, Jesu ukaitusisa maata a Mulimu kubakutiseza kwa bupilo. (Joani 5:28, 29; Likezo 24:15) Ka kuama kwa zuho yekaba teñi kwapili, bupolofita bo bu kwa Sinulo 20:13 bubulela kuli “lifu ni lihele zakutisa bafu baba ku zona.” (King James Version) Batu kaufela hase bazwile mwateñi, lihele halisana kubateñi; mi hakuna yakaya mwa lihele hape kakuli “lifu halisana kubateñi.”—Sinulo 21:3, 4; 20:14.

 Nihakulicwalo, haki mutu kaufela yashwa yayanga mwa lihele. Bibele ibulela kuli batu babañwi batotobezi hahulu mwa bumaswe kuli mane habana kubaka. (Maheberu 10:26, 27) Batu babacwalo habashwa, habayangi mwa lihele kono bayanga mwa Gehena ili sibaka sa swanisezo sesiyemela sinyeho ya kuya kuile. (Mateu 5:29, 30) Ka mutala, Jesu naabonisize kuli babahulu ba bulapeli babañwi ba mwa linako zahae ili bane banani buipi, nebakaya mwa Gehena.—Mateu 23:27-33.