Bibele Ibulelañi ka za Kusulula Mba?
Kalabo ya Bibele
Bibele haiitusisi linzwi la “kusulula mba” kutalusa kutusa mutu kupuluha nako yahae isika fita kale. Nihakulicwalo, litimana zeñata za mwa Bibele libonisa mwaangela bupilo Mulimu, kukopanyeleza cwalo ni bwa mbututu yesika pepwa kale.
Bupilo ki mpo yezwa ku Mulimu. (Genese 9:6; Samu 36:9) Mulimu uunga bupilo kaufela kuba bwa butokwa, kukopanyeleza cwalo ni bupilo bwa mbututu yesali mwa mba. Kacwalo haiba mutu abulaya mbututu yesika pepwa kale kabomu, kezo yeo ibonisa kuli ki mubulai.
Mulao wa Mulimu kwa Maisilaele neubonisa kuli: “Baana habalwana mi baholofaza musali yaitwezi mi apepa nako yahae isika fita kale, kono kusabi ni kozi ya lifu, sifosi ulukela kulifa lisinyehelo zakatomelwa ki muunaa musali yo; mi ulukela kulifa lisinyehelo zeo ka mobaka atulela baatuli. Kono haiba kuba ni kozi ya lifu, fo ulukela kumulifisa bupilo ka bupilo.”—Exoda 21:22, 23. a
Bupilo bwa mutu bukalanga lili?
Mulimu uunga kuli bupilo bwa mutu bukalanga musali hasaitwala feela. Mwa Linzwi lahae yona Bibele, Mulimu ubonisa kuli mbututu yesika pepwa kale ki mutu luli. Halunyakisiseñi mitala yebonisa kuli Mulimu uunga bupilo bwa mbututu yesika pepwa kale kuba bwa butokwa sina mwaangela bupilo bwa mbututu yepepilwe kale.
Ka kususumezwa ki moya wa Mulimu, Mulena Davida naabulezi cwana ku Mulimu: “Meeto ahao aniboni inze nili mbututu mwa mba.” (Samu 139:16) Davida asika pepwa kale Mulimu naamunga kuli ki mutu luli.
Kuzwa fo, pili mupolofita Jeremia asika pepwa kale, Mulimu naaziba kuli Jeremia naakapeta lika zeñwi za butokwa kwapili. Mulimu naabulezi cwana ku yena: “Nikuzibile nisika kubupa kale mwa mba ya maho, mi nikukenisize usika pepwa kale. Nikuezize mupolofita wa macaba.”—Jeremia 1:5
Luka muñoli wa Bibele, yanaali mualafi, naaitusisize linzwi la Sigerike leliswana hanaama kwa mbututu yesika pepwa kale ni kwa mbututu yesazo pepwa.—Luka 1:41; 2:12, 16
Kana Mulimu wakona kuswalela mutu yakile asulula mba?
Mulimu wakona kuswalela batu babakile basulula mba. Haiba cwale sebanani mubonelo wa Mulimu ka za bupilo, habaswaneli kusisitwa ki lizwalo. “Jehova unani makeke ni mukekecima . . . Sina mapazulelo haainzi kwahule ni malikelelo, ubeile cwalo lifoso zaluna kwahule ni luna.” b (Samu 103:8-12) Jehova ukaswalela batu kaufela bababakezi habuniti libi zene baezize kwamulaho, kukopanyeleza ni sibi sa kusulula mba.—Samu 86:5.
Kana kufosahalile kusulula mba haiba bupilo bwa mushemi kamba bwa mbututu bu mwa lubeta?
Ka kuya ka zeibulela Bibele ka za bupilo bwa mbututu yesika pepwa kale, mutu hakoni kuba ni mabaka a kuikemela a kusulula mba kabakala kuli bupilo bwa mushemi kamba bwa mbututu bu mwa lubeta.
Kucwañi haiba kuzuha muinelo wa ka sipundumukela ka nako yapepwa mbututu otokwa kuli mueze keto ya kupilisa bupilo bwa mushemi kamba bwa mbututu yeo? Mwa muinelo ocwalo, babaamiwa mwa muinelo wo, bakatokwa kueza katulo ya ka butu ili kupilisa bupilo bwa mushemi kamba bwa mbututu.
a Litoloko za Bibele zeñwi libonisa kuli mulao wanaafile Mulimu kwa Maisilaele, neuama sihulu ku zeneezahalanga ku mushemi, isiñi ku mbututu yesali mwa mba. Nihakulicwalo, liñolo la Siheberu le, neliama kwa kozi yeneitahisanga kuli mushemi kamba mbututu ashwe.
b Jehova ki lona libizo la Mulimu sina mokuboniselizwe mwa Bibele.—Samu 83:18.
Hape Mwendi Mwakona Kutabela Litaba Ze
MUZUHE!
Ka Kuya ka Bibele
Ka silimo, batu basululanga limba zeñata. Kana kusulula mba kufosahalile kamba ki keto ya ka butu?
TAWALA YA MULIBELELI
Kana Mulao wa Naa File Mulimu Kwa Maisilaele ne li O Lukile?
Likuka zee ne za butokwa hahulu ne li tusize baatuli mwa Isilaele.
KA ZA LUNA
Mukupe Kuli Mutu Yomuñwi Ato Mipotela
Munyakisise puzo yeñwi ka za taba ya mwa Bibele, kamba muitute zeñata ka za Lipaki za Jehova.