Ki bo Mañi Babakaya Kwa Lihalimu?

MUBAPALE

Kalabo ya Bibele

Mulimu uketanga palonyana ya Bakreste babasepahala, ili bao hamulaho wa kushwa, bakazusezwa kuyo pila kwa lihalimu. (1 Pitrosi 1:3, 4) Bakreste bao hase baketilwe, baswanela kuzwelapili kuba ni tumelo yetiile ni muzamao omunde ilikuli basike bapalelwa kuamuhela saanda sabona sa kwa lihalimu.—Maefese 5:5; Mafilipi 3:12-14.

Ki lika mañi zebakayo eza babakaya kwa lihalimu?

Bakayo busa ni Jesu sina malena ni baprisita ka lilimo ze 1,000. (Sinulo 5:9, 10; 20:6) Bakayo ba “mahalimu amanca” kamba mulonga wa kwa lihalimu, okabusa fahalimwaa “lifasi lelinca” kamba batu babaka pila fa lifasi. Babusi bao bakatusa batu kuba ni buikangulo bobunde kwa mubili, mwa munahano, ni kwa moya sina feela mwanaalelezi Mulimu kwa makalelo.—Isaya 65:17; 2 Pitrosi 3:13.

Ki babakai babaka zusezwa kuyo pila kwa lihalimu?

Bibele ibonisa kuli batu ba 144,000 bakazusezwa kuyo pila kwa lihalimu. (Sinulo 7:4) Mwa pono yeñozwi kwa Sinulo 14:1-3, muapositola Joani naaboni “Ngunyana ayemi fa Lilundu la Sione, anani batu babaeza 144,000.” Mwa pono ye, “Ngunyana” uyemela Jesu yazusizwe kwa bafu. (Joani 1:29; 1 Pitrosi 1:19) “Lilundu la Sione” liyemela mayemo amatuna hahulu a Jesu ni ba 144,000 babaka busa ni yena mwa mahalimu.—Samu 2:6; Maheberu 12:22.

Batu “bababizizwe ni babaketilwe” kuli babuse ni Kreste mwa Mubuso babizwa “mutapinyana.” (Sinulo 17:14; Luka 12:32) Taba ye ibonisa kuli bakaba babalikani feela hababapanywa kwa palo ya batu kaufela babali lingu za Jesu.—Joani 10:16.

Mibonelo yefosahezi ka za babakaya kwa lihalimu

Mubonelo ofosahezi: Batu babande kaufela bakaya kwa lihalimu.

Niti ya taba: Mulimu usepisa kuli ukafa batu babande babañata bupilo bobusa feli fa lifasi.—Samu 37:11, 29, 34.

Jesu naabulezi kuli: “Hakuna mutu yakambamezi kwa lihalimu.” (Joani 3:13) Kacwalo, naabonisize kuli batu babande bane bashwile pili yena asika shwa kale, babacwale ka Abrahama, Mushe, Jobo, ni Davida, nebasikaya kwa lihalimu. (Likezo 2:29, 34) Kono nebanani sepo ya kuzusezwa kuto pila fa lifasi.—Jobo 14:13-15.
Kuzusezwa kuyo pila kwa lihalimu kubizwa “zuho yapili.” (Sinulo 20:6) Taba ye ibonisa kuli kukaba ni zuho yeñwi. Ikaba zuho ya kuto pila fa lifasi.
Bibele ibulela kuli Mubuso wa Mulimu hauka busa lifasi, “lifu halisana kubateñi.” (Sinulo 21:3, 4) Sepiso ye ilukela kutalelezwa fa lifasi, bakeñisa kuli kwali kuba kube ni lifu kwa lihalimu.

Mubonelo ofosahezi: Mutu ni mutu wakona kuiketela kwabata kuyo pila ibe kwa lihalimu kamba fa lifasi.

Niti ya taba: Mulimu ki yena yaketa Bakreste babasepahala babaswanela kuamuhela “mupuzo wa pizo ya kwa lihalimu,” fo kikuli, sepo ya kuyo pila kwa lihalimu. (Mafilipi 3:14) Takazo yanani yona mutu haki yona yetahisa kuli aketiwe.—Mateu 20:20-23.

Mubonelo ofosahezi: Sepo ya kuto pila bupilo bobusa feli fa lifasi ki ya batu babasi ba butokwa, yefiwa feela kwa batu babasa swaneli kuyo pila kwa lihalimu.

Niti ya taba: Mulimu ubiza batu babaka amuhela bupilo bobusa feli fa lifasi kuli “sicaba saka,” “babaketilwe baka,” “babafuyauzwi ki Jehova.” (Isaya 65:21-23) Bakaba ni tohonolo ya kutaleleza mulelo wa Mulimu wa kwa makalelo ka za batu—kupetahala ni kuikola bupilo bobusa feli mwa paradaisi fa lifasi.—Genese 1:28; Samu 115:16; Isaya 45:18.

Mubonelo ofosahezi: Palo ya 144,000 yebulezwi kwa Sinulo ki ya swanisezo, haki ya luli.

Niti ya taba: Nihaike kuli mwa buka ya Sinulo kunani lipalo zeswanisezwa kwa lika zeñwi, lipalo zeñwi zeitusisizwe ki za luli. Ka mutala, ibulela za “mabizo a 12 a baapositola ba Ngunyana ba 12.” (Sinulo 21:14) Munyakisise bupaki bobubonisa kuli palo ya 144,000 ni yona ki ya luli.

Kwa Sinulo 7:4 kuñozwi “palo ya bane baswailwe [kamba, bane baketilwe kuyo pila kwa lihalimu], yeeza 144,000.” Kauhanyo yeswana ibonisa kuli sikwata seo sashutana ni sikwata sabubeli, ili: “Buñata bobutuna bwa batu, kusina yanaakona kubabala.” Baba mwa sikwata sa “buñata bobutuna bwa batu” ni bona bapiliswa ki Mulimu. (Sinulo 7:9, 10) Palo ya 144,000 hane ikaba ya swanisezo, ili kuyemela sikwata sa batu babasa konwi kubalwa, uzibe nekusike kwaba ni shutano mwahalaa likwata zepeli ze. a

Kwandaa zeo, ba 144,000 bataluswa kuli “balekilwe mwahalaa batu sina mitamuno.” (Sinulo 14:4) Linzwi la “mitamuno” liama kwa palonyana ya babaketilwe. Litalusa hande batu babaka busa kwa lihalimu ni Kreste, ili kubusa fahalimwaa batu babasa konwi kubalwa babaka pila fa lifasi.—Sinulo 5:10.

a Ka kuswana, caziba yabizwa Robert L. Thomas, naañozi ka za palo ya 144,000 yebulezwi kwa Sinulo 7:4 kuli: “Ki palo ya luli mi yashutana ni palo yesakonwi kubalwa ye kwa Sinulo 7:9. Palo ye hane ikaangiwa kuli iswaniseza nto yeñwi, uzibe hakuna palo mwa buka yeneka angiwa kuba ya luli.”—Revelation 1-7: An Exegetical Commentary, likepe 474.