Kana Mulimu Ufumaneha Kai ni Kai?
Kalabo ya mwa Bibele
Mulimu ubona lika kaufela ni kueza mwabatela kuezeza kaufela. (Liproverbia 15:3; Maheberu 4:13) Nihakulicwalo, Bibele hailuti kuli Mulimu ufumaneha kai ni kai mwa lika kaufela. Kono iluta kuli Mulimu uteñi luli mi kunani sibaka safumaneha ku sona.
Mulimu ucwañi?: Mulimu ki moya. (Joani 4:24) Batu habakoni kubona Mulimu. (Joani 1:18) Lipono zeñozwi mwa Bibele ka za Mulimu libonisa ka za sibaka luli sapila ku sona Mulimu. Bibele haibonisi ni hanyinyani kuli Mulimu ufumaneha kai ni kai.—Isaya 6:1, 2; Sinulo 4:2, 3, 8.
Sibaka kwaina Mulimu: Mulimu upila mwa sibaka sa moya, ili sesishutana ni sibaka sebakona kubona batu. Mwahalaa sona sibaka seo, Mulimu unani ‘sibaka sapila ku sona mwa mahalimu.’ (1 Malena 8:30) Bibele ibulela za nako yeñwi muta libupiwa za moya ‘nelikeni ni kuyema fapilaa Jehova,’ a ili nto yebonisa kuli Mulimu unani sibaka luli sapila ku sona.—Jobo 1:6.
Haiba Mulimu hafumanehi kai ni kai, kana luli wakona kuniisa pilu?
Eni. Mulimu uisa hahulu pilu mañi ni mañi waluna. Nihaike kuli upila mwa sibaka sa moya, Mulimu walemuhanga batu fa lifasi bababata luli kueza zalata, mi uezanga lika zetusa batu bao. (1 Malena 8:39; 2 Makolonika 16:9) Munyakisise mwaboniseza Jehova kuli waisa pilu batu baba mulapela ka busepahali:
Hamulapela: Jehova wakona kuutwa tapelo yamina ka nako yemulapela ku yena.—2 Makolonika 18:31.
Hamuzwafile: “Jehova ufakaufi ni babalobehile lipilu; upilisa babaswabile.”—Samu 34:18.
Hamutokwa kuetelelwa: Jehova ‘ukamifa kutwisiso ni kumiluta nzila yemuswanela kuzamaya ku yona’ ka kuitusisa Linzwi lahae, yona Bibele.—Samu 32:8.
Litaba za buhata ka za taba ya kuli Mulimu ufumaneha kai ni kai
Taba ya buhata: Mulimu ufumaneha kai ni kai mwa pupo kaufela.
Taba ya niti: Mulimu hapili fa lifasi kamba mwa libaka zelukona kubona ka meeto. (1 Malena 8:27) Ki niti kuli linaleli ni lika zabupile Mulimu ‘libulela kanya ya Mulimu.’ (Samu 19:1) Kono Mulimu hapili mwa lika zabupile inge feela muswanisi hasakoni kuina mwa nto yeñwi yaswanisize. Nihakulicwalo, siswaniso sakona kulutusa kuziba lika zeñwi ka za yasiswanisize. Ka nzila yeswana, lika zaezize Mulimu zelubona likona kulutusa kuziba ‘tulemeno totusa bonahali’ twa Mubupi wa lika zeo, ili tulemeno totucwale ka maata, butali, ni lilato.—Maroma 1:20.
Taba ya buhata: Mulimu uswanela kufumaneha kai ni kai kuli azibe zeezahala kaufela ni kuli abe yamaata kaufela.
Taba ya niti: Moya okenile wa Mulimu ki maata aitusisanga kwa kueza lika. Ka kuitusisa moya wahae, Mulimu wakona kubona nto ifi kamba ifi, kai kamba kai, ka nako ifi kamba ifi, ni kwasafumanehi kwateñi yena luli.—Samu 139:7.
Taba ya buhata: Samu 139:8 iluta kuli Mulimu ufumaneha kai ni kai haibulela kuli: “Hane nikakambamela kwa lihalimu, neuka nibona kwateñi, mi hane nikayo yala mumbeta waka mwa libita, neuka yo nifumana mwateñi.
Taba ya niti: Taba ye haibuleli za sibaka sapila ku sona Mulimu. Kono mubulelelo wo utalusa feela kuli Mulimu wakona kulutusa kusina taba ni sibaka seluinzi ku sona ka nako ifi kamba ifi.
a Jehova ki libizo la Mulimu sina mokuboniselizwe mwa Bibele.
Hape Mwendi Mwakona Kutabela Litaba Ze
LIKALABO KWA LIPUZO ZA BIBELE
Moya Okenile ki Nto Mañi?
Ka libaka leliutwahala, Bibele iama kwa moya okenile kuli ki “mazoho” a Mulimu.”
LITIMANA ZA MWA BIBELE ZETALUSIZWE
Isaya 41:10 Italusizwe—“Usike Wasaba, Kakuli Niinzi ni Wena”
Jehova ukoñomeka taba ya kuli ukatusa batanga bahae ka kukutela kubulela manzwi atalusa taba yeswana yeo halaalu.
KA ZA LUNA
Mukupe Kuli Mutu Yomuñwi Ato Mipotela
Munyakisise puzo yeñwi ka za taba ya mwa Bibele, kamba muitute zeñata ka za Lipaki za Jehova.