Muuna wa mufumi ni Lazaro ki batu bane baitusisizwe ku yeñwi ya linguli za Jesu. (Luka 16:19-31) Mwa likande le, baana bababeli bao nebayemela likwata zepeli za batu: (1) baeteleli ba bulapeli bwa Sijuda ba mwa linako za Jesu ili bane baikuhumusa ni (2) batu ba mayemo a kwatasi kono bane baikokobeza ili bane baamuhezi lushango lwa Jesu.

Ze mwa taba ye

•  Jesu naabuleziñi ka za muuna wa mufumi ni Lazaro?

•  Kana likande le neliezahezi luli?

•  Kana likande le libonisa kuli tuto ya lihele la mulilo ki ya niti?

•  Likande la muuna wa mufumi ni Lazaro litalusañi?

 Kwa Luka kauhanyo 16, Jesu utalusa ka za baana bababeli babatalimana ni licinceho zetuna mwa bupilo bwabona.

 Ki ze litaba ka bukuswani ka za likande lanaabulezi Jesu: Muuna wa mufumi naapila bupilo bobunde luli. Mukupi wa libizo la Lazaro naatiswanga kwa munyako wa muuna wa mufumi yo; mukupi yo naanani sepo ya kuli naakafiwanga lico zenekawa kwa tafule ya muuna wa mufumi. Hamulaho wa nako, Lazaro ashwa, mi mangeloi amuisa kwatuko a Abrahama. Muuna wa mufumi ni yena ashwa mi abulukiwa. Mwa likande le, baana bababeli bao bataluswa kuli hamulaho wa kushwa nebazwezipili kupila. Muuna wa mufumi naatukufazwa mwa mulilo otuka mi akupa Abrahama kuli alume Lazaro kuto batisa lulimi lwahae ka mezi azwa kwa munwana wa Lazaro. Abrahama ahana kupo ya muuna wa mufumi mi abulela kuli baana bababeli bao, nebatalimana ni licinceho zetuna mwa bupilo bwabona ni kuli nekunani mukoti omutuna otungile mwahalaa bona ili one usakoni kutuliwa.

 Batili. Ye neli feela nguli yanaafile Jesu ilikuli alute tuto yeñwi. Taba ya kuli ye neli feela nguli ilumezwi ki licaziba babañata. Ka mutala, ka tohonyana ka taba ka mwa Bibele ya Luther yene hatisizwe mwa 1912 katalusa kuli ye neli feela nguli. Mi Bibele ya Katolika ya Catholic Jerusalem Bible, fa litaluso ze kwatasi, italusa kuli ye ki “nguli yebulezwi sina likande mi haiami ku mutu ufi kamba ufi yakile apila fa lifasi.”

 Kana Jesu naaluta ka za bupilo hamulaho wa lifu? Kana naatalusa kuli batu babañwi batukufazwanga mwa lihele la mulilo habashwa ni kuli Abrahama ni Lazaro nebali mwa lihalimu? Bupaki bobuñata bubonisa kuli nekusi cwalo.

 Ka mutala:

•   Haiba muuna wa mufumi naali luli mwa mulilo inze atukufazwa, kana mulilo neusike watahisa kuli mezi a kwa minwana ya Lazaro aome?

•   Mezi ao nihanaasike aoma, kana lilotoli lililiñwi la mezi nelikatahisa kuli muuna wa mufumi yo abatiswe hanaanzaa tukufazwa?

•   Abrahama naakapila cwañi mwa lihalimu, hailifo Jesu naatalusize hande kuli kuto fita ni ka nako yafa nguli yeo, hakuna mutu yakile akambamela kwa lihalimu?—Joani 3:13.

 Batili. Nihaike kuli likande le nelisika ezahala luli, batu babañwi balumela kuli liyemela muhupulo wa kuli batu babande bayanga kwa lihalimu ni kuli batu babamaswe batukufazwanga mwa lihele la mulilo. a

 Kana taba yeo ki ya niti? Batili.

 Tuto ya lihele la mulilo hailumelelani ni zeibulela Bibele ka za muinelo obali ku ona babashwile. Ka mutala, haibuleli kuli batu babande kaufela habashwa bayopilanga ka tabo mwa lihalimu kamba kuli batu babamaswe batukufazwanga mwa lihele la mulilo. Kono Bibele ibulela hande ka kuutwahala kuli: “Babapila baziba kuli bakashwa, kono babashwile hakuna sebaziba.”—Muekelesia 9:5.

 Likande le libonisa kuli likwata zepeli za batu nelituha litalimana ni licinceho zetuna mwa bupilo.

 Muuna wa mufumi uyemela baeteleli ba bulapeli bwa Sijuda, “bona bane balata hahulu masheleñi.” (Luka 16:14) Nebaikutwezi zanaabulezi Jesu, kono nebahanyelize lushango lwahae. Baeteleli ba bulapeli ba nebasaangangi batu ba mayemo a kwatasi kuba ba butokwa.—Joani 7:49.

 Lazaro naayemela batu ba mayemo a kwatasi ili bane baamuhezi lushango lwa Jesu ni bane baangiwa kusaba ba butokwa ki baeteleli ba bulapeli bwa Sijuda.

 Licinceho zetuna mwa bupilo neliezahezi kwa likwata zepeli zeo.

•   Baeteleli ba bulapeli bwa Sijuda nebanahana kuli neba shemubiwa ki Mulimu. Kono nekuswana feela inge kuli nebashwile, Mulimu hanaa bahanile ni kuhana nzila yene bamulapela ka yona kabakala kuhana lushango lwa Jesu. Mi lushango lwanaa kutazanga Jesu ni balutiwa bahae neluswana feela inge kuli lwabatukufaza.—Mateu 23:29, 30; Likezo 5:29-33.

•   Batu ba mayemo a kwatasi—ili bane basaangiwangi kuba ba butokwa ka nako yetelele ki baeteleli ba bulapeli—neba shemubiwa ki Mulimu. Buñata bwabona nebaamuhezi lushango lwa mwa Mañolo ili lwanaalutile Jesu mi batusiwa hahulu ki lona. Sebanani tohonolo ya kushemubiwa ki Mulimu kuya kuile.—Joani 17:3.