Pulelo ya “Musamaria Yomunde” iitusiswanga hahulu kutalusa mutu yaeza lika zeñwi kuli atuse batu babatokwa tuso. Pulelo yeo isimuluha fa likande kamba nguli yanaafile Jesu kuli abonise kuli mwanahabo mutu washwelanga babañwi makeke ni kubatusa kusina taba ni sibaka kobazwa kamba simuluho yabona.

Mwa taba ye

•  Nguli ya “Musamaria Yomunde” iambola zañi?

•  Ki kabakalañi Jesu hanaafile nguli ye?

•  Luitutañi kwa nguli ye?

•  Masamaria neli bo mañi?

•  Kana litaba zebulezwi mwa likande la “Musamaria Yomunde” neliezahezi luli?

Ki ze litaba ka bukuswani ka za likande lanaakandekile Jesu: Mujuda yomuñwi naali mwa musipili wa kuzwa kwa Jerusalema kuya kwa Jeriko. Mwa nzila, akopana ni masholi bane bamutubuzi liapalo zahae, ni kumunata, mi baikela, kumusiya inze awelezi.

Muprisita yomuñwi wa Majuda ashetumuka mwa nzila yeo kono habona mutu yo, amufitelela. Hasamulaho, mueteleli yomuñwi wa bulapeli bwa Sijuda hanaatilo fita fo, ni yena aeza nto yeswana. Nihaike kuli nebasimuluha mwa naha yeswana ni muzamai yo, hakuna ku bona yanaayemi kuli amutuse.

Kono kwafita muuna yomuñwi yanaasimuluha mwa sicaba sisili. Neli Musamaria. (Luka 10:33; 17:16-18) Musamaria yo amushwela makeke, atama litombo zahae mi asela fateñi oli ni waine. Hasamulaho, amuisa kwa hotela. Teñi ko, amubabalela busihu kaufela. Habusa aanga masheleñi, alifa muñaa hotela kuli ababalele mutu yo, mi amutaluseza kuli haiba aitusisa masheleñi amañata kufita ao, naakato alifa hanaaka kuta.—Luka 10:30-35.

Jesu naakandekezi muuna yanaanahana kuli bahabo yena ki batu feela ba mushobo ni ba bulapeli bobuswana ni bwahae. Jesu naabata kuluta muuna yo tuto ya butokwa ya kuli “mwanahabo” nesi feela Mujuda. (Luka 10:36, 37) Taba ye neiñozwi mwa Bibele kuli ituse mutu kaufela yabata kutabisa Mulimu.—2 Timotea 3:16, 17.

Likande le liluta tuto ya kuli mwanahabo yomunde ubonisa kuli unani mukekecima ka likezo zahae. Mutu yo uezanga sesiñwi kuli atuse mutu yaziyelehile, kusina taba ni simuluho, mushobo, kamba sibaka kwazwa. Mwanahabo wa luli uezanga babañwi sina yena mwanaaka tabela kuezezwa.—Mateu 7:12.

Masamaria nebapila kwa mutulo wa Judea. Nebakopanyeleza baikulu ba Majuda bane banyalani ni batu bane basi Majuda.

Hakuto fitiwanga mwa linako za baapositola, Masamaria nese banani bulapeli bwabona. Nebalumela sihulu litaba ze mwa libuka zapili za Mañolo A Siheberu kono hañata nebahana litaba za mwa libuka zeñwi kaufela.

Majuda babañata bane bapila ka nako ya bukombwa bwa Jesu, nebasa lumelelani ni Masamaria mi nebasa tabeli kuswalisana ni bona. (Joani 4:9) Majuda babañwi nebabizanga batu babañwi kuli ki ‘Masamaria’ kuli babasheunune.—Joani 8:48.

Mañolo haabonisi haiba litaba zebulezwi mwa swanisezo ya Musamaria neliezahalile luli kamba kutokwa. Nihakulicwalo, Jesu hañata naaitusisanga lika zene baezanga batu luli ni libaka zenezibahala hahulu kuli atuse bateelezi bahae kuutwisisa taba yanaatalusa.

Litaba zeñata zebulezwi mwa likande leo linepahezi. Ka mutala:

• Mutu yanaazamaya kuzwa Jerusalema kuya Jeriko, ili musipili ofitelela likilomita ze 20, naatokwa kushetumuka ka kilomita iliñwi hafita fa sibaka sesiñwi. Mwa likande leo, muzamai yo utaluswa ka kunepahala kuli “naashetumuka kuzwa kwa Jerusalema kuya kwa Jeriko.”—Luka 10:30.

• Baprisita ni Malivi bane bapila mwa Jeriko hañata nebayanga kwa Jerusalema.

• Hañata masholi nebaipatanga kwatuko ni nzila mwa libaka mokusina hahulu batu ilikuli bakone kutaseza bazamai babazamaya banosi.