Mwa Bibele, taba ya kubasa maswaniso fa mubili ifumaneha feela hañwi kwa liñolo la Livitike 19:28, lelibulela kuli: “Musike mwabasa maswaniso fa mibili yamina.” Mulimu naafile sicaba sa Isilaele taelo ye kuli sishutane ni macaba anaa bapotolohile, ili anaabasanga mibili ayona ka mabizo kamba lisupo za milimu yabona. (Deuteronoma 14:2) Nihaike kuli Bakreste habatokwi kumamela Mulao one bafilwe Maisilaele, ki kwa butokwa kuli lunyakisise sikuka sa mulao wo.

Kana Mukreste waswanela kubasa maswaniso fa mubili wahae?

 Mañolo a mwa Bibele alatelela akona kumitusa kuutwisisa hande taba ye:

•   “Basali baikabise ka . . . buishuwo.” (1 Timotea 2:9, Bibele ya New American Bible) Sikuka se hasiami feela basali kono ni baana. Luswanela kukuteka maikuto a babañwi isiñi kueza lika zekatahisa kuli luhohe hahulu mamelelo ya batu.

•   Batu babañwi babasanga maswaniso fa mubili wabona kuli babonise kuli banani tukuluho kamba kubonisa kuli bakona kueza zebalata kaufela fa mubili wabona. Kono Bibele isusueza Bakreste kuli: “Mufe mibili yamina sina sitabelo sesipila, sesikenile, ni sesiamuheleha ku Mulimu, ili sebelezo yekenile yemufa ka maata amina a kunahana.” (Maroma 12:1) Muitusise “maata amina a kunahana” kuli munahanisise libaka hamubata kubasa mubili wamina ka maswaniso. Haiba mubata kueza cwalo kabakala kuli muboni batu babañata habaeza cwalo kamba mubata kubonisa kuli muswalisana ni sikwata sesiñwi, muhupule kuli hamulaho wa nako, mukona kucinca mubonelo wamina, kono maswaniso amubasize fa mubili ona akona kuina nako yetelele. Kunyakisisa milelo yamina kwakona kumitusa kueza katulo yende.—Liproverbia 4:7.

•   Bibele ibulela kuli: “Batu kaufela babaeza lika ka kayeye bakaba babotana.” (Liproverbia 21:5) Hañata, batu bamatukelanga kubasa maswaniso fa mibili yabona, kono kueza cwalo kukona kutahisa kuli basike baangiwa hande ki batu babañwi mi bapalelwe kufumana musebezi. Kuzwisa siswaniso sesibasizwe fa mubili kubutuku luli mi mutu utokwa kulifa masheleñi amañata kuli aeze cwalo. Lipatisiso zeezizwe, kukopanyeleza cwalo ni batu babaeza lipisinisi za kuzwisa maswaniso abasizwe fa mubili, libonisa kuli batu babañata bababasanga maswaniso fa mibili yabona hamulaho bainyazanga kuli kambe nebasika eza cwalo.