Hamulaho wa kubupa muuna ni musali bapili, Mulimu alukisa kuli banyalane. Linyalo leo neliswanela kutusa muuna ni musali kuba ni silikani sesinde hahulu ni kuli bakone kuhulisa hande bana bane bakaba ni bona kwapili.—Genese 1:27, 28; 2:18.

 Mulimu ubata kuli muuna ni musali babanyalani babe ni tabo. (Liproverbia 5:18) Mwa Bibele, Mulimu ufile batu babanyalani ketelelo yende ni likuka zekona kubatusa kukondisa mwa linyalo labona.

Mwa taba ye, lukanyakisisa litaba zelatelela:

•  Ki ketelelo mañi yafile Mulimu ka za linyalo?

•  Bibele ibulelañi ka za kauhano ni teleko?

•  Kana linyalo litokwa kuba la ka mulao kuli lilumelelwe ki Mulimu?

•  Ka kuya ka Bibele, ki buikalabelo mañi bwanani bona muuna yanyezi ni musali yanyezwi?

•  Kana Mulimu kacenu ubata kuli baana ni basali babanyalani babe ni bana?

•  Bibele ikona kunitusa cwañi mwa linyalo laka?

•  Litimana za mwa Bibele ka za linyalo

 Kuzwa feela kwa makalelo, Mulimu naabata kuli linyalo libe mwahalaa muuna alimuñwi ni musali alimuñwi. (Genese 2:24) Mulimu halumelezi kunyala libali, kalombe, kamba muuna ni musali babasika nyalana kupila hamoho. (1 Matesalonika 4:3) Jesu naataluselize balutiwa bahae kuli balatelele mulelo wa Mulimu wa kwa makalelo ka za linyalo.—Mareka 10:6-8.

 Mulimu ubata kuli linyalo libe leliinelela. Muuna ni musali habanyalana, basepisanga kuli bakasepahala ni kuzwelapili kunyalana mwa bupilo bwabona kaufela. Mulimu ubata kuli bataleleze buitamo bo.—Mareka 10:9.

 Ka linako zeñwi, muuna ni musali babanyalani bakona kusaba hamoho haiba kuba ni butata mwa lubasi mi yomuñwi ku bona utokwa kutama musipili kuli ayo tusa mwa butata bo. Kono Bibele hailumelezi batu babanyalani kukauhana kabakala butata bobakopana ni bona mwa linyalo. Niteñi, isusueza muuna ni musali babanyalani kutatulula butata bo.—1 Makorinte 7:10.

 Bubuki ki lona feela libaka la ka Mañolo lelikona kutahisa teleko. (Mateu 19:9) Kacwalo, haiba muuna ni musali babanyalani baikatulela kukauhana kamba kufeza linyalo labona kono isi ka libaka la bubuki, Bibele hai balumelezi kuba mwa libato ni mutu usili, kunyala kamba kunyalwa hape.—Mateu 5:32; 1 Makorinte 7:11.

 Mulimu ubata kuli Bakreste balatelele milao yetomilwe ki muuso yeama linyalo. (Tite 3:1) Haiba muuna ni musali banyalana ka mulao, babonisa kuli bakuteka milonga ni mulelo wa Mulimu wa kuli linyalo liswanela kuba leliinelela. a

•   Buikalabelo bobaswanela kupeta hamoho. Baana ni basali babanyalani baswanela kulatana ni kukutekana. (Maefese 5:33) Baswanela kufanana liswanelo za linyalo ka nzila yebonisa lilato ni kuambuka mufuta kaufela wa kusasepahala. (1 Makorinte 7:3; Maheberu 13:4) Haiba banani bana, sibeli sabona banani buikalabelo bwa kuhulisa bana bao.—Liproverbia 6:20.

   Bibele haibuleli litaba ka butungi ka za mo baana ni basali baswanela kuezeza katulo yeama mubeleko ni mwakuikabelela misebezi ya fa lapa. Bakona kueza hamoho katulo yekona kutusa lubasi lwabona.

•   Buikalabelo bwa muuna yanyezi. Bibele ibulela kuli: “Muuna ki toho ya musalaa hae.” (Maefese 5:23) Ka kuba toho, uswanela kuetelela lubasi lwahae ni kueza likatulo zekona kutusa musalaa hae ni bana bahae.

   Uswanela kueza mwakonela kaufela kutusa lubasi lwahae kuba ni buikangulo bobunde, kuba ni tabo, ni kusutelela ku Mulimu. (1 Timotea 5:8) Ubonisa kuli waitebuha tulemeno twa musalaa hae ni buikoneli bwahae ka kusebelisana ni yena ni kunyakisisa ka tokomelo mubonelo wahae ni maikuto ahae haeza likatulo. (Liproverbia 31:11, 28) Bibele ibulela kuli muuna yanyezi uswanela kupeta buikalabelo bwahae ka nzila yebonisa lilato.—Makolose 3:19.

•   Buikalabelo bwa musali yanyezwi. Bibele ibulela kuli “musali yena uswanela kukuteka hahulu muunaa hae.” (Maefese 5:33) Mulimu watabanga haiba musali akuteka buikalabelo bwafilwe muunaa hae.

   Buikalabelo bwahae buama kutusa muunaa hae kueza likatulo zelukile ni kukuteka butoho bwahae. (Genese 2:18) Bibele ibabaza musali yanyezwi yapeta hande buikalabelo bwa butokwa bwanani bona mwa linyalo.—Liproverbia 31:10.

 Batili. Kwamulaho, Mulimu naalaezi batanga bahae babañwi kuli babe ni bana. (Genese 1:28; 9:1) Kono taelo yeo haiami Bakreste. Jesu naasika laela balateleli bahae kuba ni bana. Nihaiba balateleli bahae ba kwa makalelo nebasika bulela kuli baana ni basali babanyalani baswanela kuba ni bana. Baana ni basali babanyalani bakona kuiketela kuba ni bana kamba kutokwa.

 Mwa Bibele, kunani likuka zekona kutusa baana ni basali babanyalani kuba ni linyalo lelinde kuzwa feela kwa makalelo. Likuka za mwa Bibele hape zakona kutusa baana ni basali babanyalani kutokolomoha kamba kutula miinelo yetaata.

 Likuka za mwa Bibele zakona kutusa muuna ni musali babanyalani . . .

•  kubonisa lilato la niti.—1 Makorinte 13:4-7; Makolose 3:14.

•   kutatulula butata.—1 Makorinte 10:24.

•   kuba bateelezi babande.—Jakobo 1:19.

•   kubonisa likute.—Maroma 12:10.

•   kulata kuswalela.—1 Pitrosi 4:8.

•   kusepahala.—Mareka 10:9.

•   kuba ni pilu-telele.—Maefese 4:2, 3.

•   kueza lika hamoho.—Muekelesia 4:9.

•   kuzwelapili kutiisa silikani sabona.—Pina ya Salumoni 8:7.