“Hakuna mutu yanani lilato lelifita le, kuli mutu atobohe bupilo bwahae kabakala balikani bahae.”—Joani 15:13, Bibele ya Toloko ya Lifasi Lelinca.

 “Hakuna lilato lelifita le, kuli mutu afe balikani bahae bupilo bwahae.”—Joani 15:13, Bibele ya New King James Version.

 Jesu naatusa balateleli bahae kuutwisisa kuli lilato labona neliswanela kuba lelitiile hahulu kuli mane baitatele kushwela babañwi.

 Pili asika bulela kale manzwi ao, Jesu naabulelezi baapositola bahae kuli: “Wo ki ona mulao waka, kuli mulatane sina moni milatezi.” (Joani 15:12) Ki lilato lelicwañi lanaanani lona Jesu kwa baapositola bahae? Neli lilato lelisina buitati, leliama kuitombola lika zeñwi. Ka nako ya bukombwa bwahae bwa fa lifasi, naaisize hahulu pilu kwa lika zene batokwa balateleli bahae ni batu babañwi ni zene batabela kufita kuisa pilu ku zanaabata yena. Naafolisize batu bane bakula ni kubaluta ka za Mubuso wa Mulimu. a Mane naaezanga misebezi ya batu ba mayemo a kwatasi kuli atuse babañwi. (Mateu 9:35; Luka 22:27; Joani 13:3-5) Kono kwa Joani 15:13, Jesu naabulela za kezo yebonisa lilato lelituna hahulu. Mane, lihora lisikai feela kuzwa fabulelela manzwi ao, naabonisize lilato lelituna leo ka kufa “bupilo bwahae sina tiululo kuli aliulule babañata.” (Mateu 20:28; 22:39) Ka kueza cwalo, naabonisize ka nzila yeipitezi kuli naalata hahulu babañwi kufita mwanaaitatela.

 Jesu walata batu. Kono ulata hahulu batu babamamela lituto zahae. Naanga balutiwa bahae sina balikani bahae babatuna bakeñisa kuli nebamamela litaelo zahae mi nebali ni yena mwa miliko yahae. (Luka 22:28; Joani 15:14, 15) Taba yeo ni yona nei mususuelize hahulu kutoboha bupilo bwahae kabakala bona.

 Bakreste ba mwa linako za baapositola ni bona nebamamezi manzwi a Jesu mi nebakona kutoboha bupilo bwabona kabakala babañwi. (1 Joani 3:16) Kaniti luli, lilato lelisina buitati lanaabonisize Jesu nelikaba lona sizibelo sesituna sa Bakreste ba niti.—Joani 13:34, 35.

 Mwa likauhanyo 13-17 za buka ya Evangeli ya Joani, kunani kelezo ya Jesu hanaalaeza baapositola bahae ba 11 bane basepahala ni tapelo ya mafelelezo yanaalapezi ni bona. Hamulaho wa lihora lisikai kuzwa fo, ashwa. Mwa kauhanyo 15, Jesu naafile mutala one ubonisa kuli balutiwa bahae nebatokwa kuzwelapili kuswalisana ni yena ilikuli babonise kuli neli balateleli bahae ba niti, naababapanyize kwa miselo yemela kwa kota ya veine. Naabasusuelize kuli ‘bazwelepili kubeya hahulu miselo.’ (Joani 15:1-5, 8) Nzila yeñwi yebaeza cwalo ka yona ki ka kubonisa lilato leliama kuitombola lika zeñwi kabakala babañwi, lelikopanyeleza kukutaza lushango lwanaakutalize Jesu, ili “taba yende ya Mubuso wa Mulimu.”—Luka 4:43; Joani 15:10, 17.

 Mubuhe vidio yekuswani ye kuli mubone litaba zeñwi zefumaneha mwa buka ya Joani.