“Haike Mulimu yafa sepo amitaze tabo ni kozo kaufela ka kumusepa kwamina, kuli mutale sepo ka maata a moya okenile.”—Maroma 15:13, Bibele ya Toloko ya Lifasi Lelinca.

 “Haike Mulimu yafa sepo amitaze tabo ni kozo kaufela hamunze mumusepa, ilikuli mutale sepo ka maata a Moya Okenile.”—Maroma 15:13, Bibele ya New International Version.

 Muapositola Paulusi naabulezi manzwi ao kakuli naabata kuli Mulimu ataze “tabo ni kozo” Bakreste ka yena. Tulemeno totunde to twaswalisana ni sepo yafa Mulimu ni maata a moya okenile.

 Luituta za sepo yafa Mulimu mwa Linzwi lahae, yona Bibele. Ka kuya ka Maroma 15:4, “lika kaufela zeneñozwi kwamulaho [mwa Bibele] neliñolezwi kululuta, kuli ka buitiiso bwaluna ni ka kuomba-ombiwa ki Mañolo lukone kuba ni sepo.” Bibele italusa za sepiso ya Mulimu ya kufelisa miinelo yetaata kaufela yetahisa kuli batu basike baikola bupilo kacenu, inge cwalo bubotana, katulo yesika luka, makulanu, ni lifu. (Sinulo 21:4) Mulimu ukaitusisa Jesu kutaleleza lisepiso ze; kacwalo, lwakona kuba ni sepo ya kuli lika likaba hande kwapili.—Maroma 15:12.

 Lukona feela ‘kutala’ sepo yalufa Mulimu haiba lumusepa. Haiba luituta zeñata ka za hae, lukaba ni buikolwiso bobutezi bwa kuli lwakona kumusepa ka kutala. (Isaya 46:10; Tite 1:2) Lwaitumela kwa sepo ya luli yalufa Mulimu kakuli ikona kutusa mutu kuba ni tabo ni kozo, niha kopana ni miinelo yetaata.—Maroma 12:12.

 Kozo, tabo, ni sepo ni zona zaswalisana ni “moya okenile,” ili maata a Mulimu asebeza. a Mulimu uitusisanga moya okenile kutaleleza lisepiso zahae, mi taba yeo ilufa sepo. Moya wo hape ukona kutusa batu kuba ni tulemeno totunde, totucwale ka tabo ni kozo.—Magalata 5:22.

 Buka ya Maroma ki liñolo lene liñolezwi Bakreste bane bapila mwa muleneñi wa Roma. Babañwi kwa Bakreste bao nebazwa mwa mabasi a Majuda, kono babañwi bona nebasa zwi mwa mabasi ao. Paulusi naasusuelize Bakreste bao kaufela kuikataza kuba ni mihupulo ni likezo zeswana kusina taba ni kushutana kwa lisimuluho zabona ni lizo.—Maroma 15:6.

 Muapositola Paulusi naahupulisize Bakreste ba kwa Roma kuli kale-kale ko, Mulimu naapolofitile za nako ili fo macaba kaufela naakaswalisana hamoho kumulumbeka. Paulusi naabonisize buniti bwa taba yeo ka kukutela kubulela manzwi a mwa Mañolo A Siheberu b hane. (Maroma 15:9-12) Sanaatalusa kikuli: Majuda hamoho ni batu ba macaba kaufela nebakona kutusiwa ki bukombwa bwa Kreste. Batu ba mwa likwata zepeli zeo kaufelaa bona nebanani sepo yeswana yezwa ku Mulimu. Kacwalo, batu kaufela mwa puteho mwa Roma kusina taba ni lisimuluho zabona, nebatokwa ‘kuamuhelana,’ fo kikuli, kuamuhela babañwi hande ni kubabonisa sishemo.—Maroma 15:7.