Bo musalaa bona neba lemuhile mukwa wabona one baezanga kwa mukunda. Bakupa swalelo ka taata. Babasepisa kuli bakatuhela, mi nebaezize cwalo ka nakonyana. Kihona bakalisa kuezanga cwalo hape, bo musalaa bona balemuha taba yeo mi hape baikupela swalelo ni kubasepisa kuli bakatuhela.

 Kana ni mina mu mwa muinelo oswana? Haiba ki cwalo, mutokwa kulemuha mo mukwa wamina wa kubuhanga maswaniso a mapunu usweli kuamela bakumina ni momukona kuufeliseza. a

Ze mwa taba ye

•  Zemuswanela kuziba

•  Zemukona kueza

•  Haiba bakumina babuhanga maswaniso a mapunu

 Kubuha maswaniso a mapunu kwakona kusinya linyalo. Kukona kutahisa kuli mutu yemunyalani ni yena yasaezangi cwalo abe ni ndimbelela ni kutuhela kumisepa. b

 Musali ili yo muunaa hae ubuhanga maswaniso a mapunu wakona kuba ni maikuto alatelela:

•   Kubetekiwa. Musali yomuñwi yanyezwi wa libizo la Sarah utalusa kuli, “Neniikutwile inge kuli bo muunaaka nebaezize bubuki hañata-ñata.”

•   Kuikutwa kusaba wa butokwa. Musali yomuñwi yanyezwi ubulela kuli mukwa wa bo muunaa hae wa kubuhanga maswaniso a mapunu neu mutahiselize kuli aikutwe “maswabi ni kuli haki yomunde.”

•   Kusasepa bakubona. Musali yomuñwi yanyezwi wa libizo la Helen utalusa kuli, “Nako kaufela nibatanga kuziba lika kaufela zebaeza bo muunaaka.”

•   Lipilaelo. Musali yomuñwi yanyezwi wa libizo la Catherine ubulela kuli, “Kubilaela hahulu ka za mukwa wa bo muunaaka kona nto yene niisa hahulu pilu mwa bupilo bwaka.”

 Za kunahanisisa: Bibele ibulela kuli muuna uswanela kulata musalaa hae. (Maefese 5:25) Haiba aeza lika zetahisa kuli musalaa hae abe ni maikuto abulezwi fahalimu, fohe habonisi kuli walata musalaa hae.

 Mukwa wa kubuhanga maswaniso a mapunu utaata kuutuhela. Musali yomuñwi yanyezwi wa libizo la Stacey utalusa kuli, “Bo muunaaka nebakonile kutuhela kuzubanga kwai, matokwani, ni kunwa bucwala, kono basa fumana taata kutuhela kubuhanga maswaniso a mapunu.”

 Haiba ni mina mu mwa muinelo ocwalo, liakalezo zelatelela zakona kumitusa kutuhela kamba mane ni kufelisa mukwa wo.

•   Muutwisise libaka kubuhanga maswaniso a mapunu hakuli kokumaswe. Kubuha maswaniso a mapunu kutahisanga kuli mutu aeze lika zanahana kuli likamutahiseza tabo, ili nto yesinyanga lilato ni busepahali zetokwahala mwa linyalo kuli kube ni tabo. Hape kubonisa kutokwa likute ku Musimululi wa linyalo, yena Jehova Mulimu.

   Sikuka sa mwa Bibele: “Linyalo likutekiwe.”—Maheberu 13:4.

•   Muikalabelange lika zemueza. Musike mwabulela kuli, ‘Nenisike nabuhanga maswaniso a mapunu kambe musalaaka wanibonisanga lilato.’ Kufa musalaa mina mulatu hakusika luka, mi kukona feela kumifa libaka la kuikemela la kubuha maswaniso a mapunu hape, musalaa mina hakaeza nto yeñwi yesa mitabisi.

   Sikuka sa mwa Bibele: “Mutu ni mutu ulikiwa ka kuhohiwa ni kuhapiwa ki takazo yahae.”—Jakobo 1:14.

•   Muikambote ni bo musalaa mina mi mubulele niti. Muuna yanyezi wa libizo la Kevin ubulela kuli: “Zazi ni zazi naabuzanga bo musalaaka haiba niezize kamba kutalima nto yeñwi yesika batabisa. Kuambolisananga ni bona ka nzila ye kubatusanga kulemuha kuli hakuna lika zeni bapatelanga.”

   Sikuka sa mwa Bibele: ‘Lubata kupila ka busepahali mwa lika kaufela.’—Maheberu 13:18.

•   Mube babaitukiselize nako kaufela. Mutu wakona kukutela kubuha maswaniso a mapunu nihaiba hamulaho wa lilimo zeñata kuzwa fatuhelezi kuezanga cwalo. Bo Kevin, bababulezwi kwamulaho, batalusa kuli: “Nenituhezi kubuhanga maswaniso a mapunu ka lilimo ze 10 mi neniikolwisize kuli mukwa wo neufelile luli. Kono mukwa wo neuswana sina sibatana sesiipatile ili sene silibelela feela nako yeswanela kuli siniholofaze.”

   Sikuka sa mwa Bibele: “Yanahana kuli uyemi atokomele kuli asike awa.”—1 Makorinte 10:12.

•   Hamulikiwa, musike mwaanga muhato kapili. Nihaike kuli hamukoni kuhanyeza kuba ni takazo yemaswe, mwakona kuketa kueza kamba kusaeza nto yeo. Takazo yeo ikafela haiba muituta kunahananga lika lisili mwa sibaka sa kunahana ka za nto yeo.

   Sikuka sa mwa Bibele: “Yomuñwi ni yomuñwi wamina uswanela kuziba mwakuzamaiseza mubili wahae ka bukeni ni ka likute, isiñi ka litakazo za kulobala ni mutu zetulile tikanyo zetiswa ki moya wa mukwañuli.”—1 Matesalonika 4:4, 5.

•   Muambuke miinelo yekona kutahisa kuli mukene mwa muliko. Buka ya Willpower’s Not Enough ibulela kuli, “Haiba mu mwa muinelo otahisa kuli mukene mwa muliko, kuswana feela inge kuli mutukisize ka kota ka mankisi. Zemutokwa feela ki bucwañi bobunyinyani . . . kuli mutumbule mulilo.”

   Sikuka sa mwa Bibele: “Sesimaswe sisike sanibusa.”—Samu 119:133.

•   Musike mwafelelwa ki sepo. Kukona kuunga nako yetelele mane nihaiba lilimo zeñata kuli bo musalaa mina bamisepe hape. Kono batu babañata babanyalani bakonile kueza cwalo.

   Sikuka sa mwa Bibele: “Lilato linani pilu-telele.”—1 Makorinte 13:4.