1 Makolonika 19:1-19
19 Hasamulaho, Nahashi mulena wa Maamoni ashwa, mi mwanaa hae amuyola fa bulena.+
2 Davida hautwa cwalo, ali: “Nikabonisa lilato lelisa feli+ ku Hanuni mwanaa Nahashi, kakuli ndatahe naanibonisize lilato lelisa feli.” Ka mukwa ocwalo, Davida aluma linumwana kuyo muomba-omba kabakala lifu la ndatahe. Kono batanga ba Davida habafita mwa naha ya Maamoni+ kuli bayo omba-omba Hanuni,
3 manduna ba Maamoni babulelela Hanuni kuli: “Kana unahana kuli Davida ukuteka ndataho halumile batu kuli bato kuomba-omba? Kana batanga bahae habasika tela feela kuto batisisa naha, kuitwela, ni kukutulula fa bulena?”
4 Hanuni kihaa nga batanga ba Davida mi ababeula+ ni kupuma liapalo zabona fahali kwa mainelo, kihona abaleleka.
5 Davida hazibiswa zeezahezi kwa baana bao, kapili-pili aluma baana babañwi kuli bayo bakatanyeza, kakuli baana bao nebashubuzwi hahulu; mi mulena ababulelela kuli: “Muine mwa Jeriko+ kufitela milelu yamina ihula hape, kihona mukakuta.”
6 Hamulaho wa nako, Maamoni balemuha kuli ki kale batoiwa ki Davida, mi kabakaleo Hanuni ni Maamoni baluma litalenta* za silivera ze 1,000 kuli bafiwe likoloi ni bapahami ba lipizi ba kwa Mesopotamia,* Arami-maaka, ni Zoba.+
7 Kiha sebalifela likoloi ze 32,000 ni mulena wa Maaka ni batu bahae kuli babatuse mwa ndwa. Mi bataha ni kuto tibelela fapilaa Medeba.+ Maamoni bazwa mwa mileneñi yabona, bakopana hamoho, mi baya kwa ndwa.
8 Davida hautwa cwalo, aluma Joabi+ ni mpi kaufelaa yona, hamohocwalo ni lindwalume zahae zemaata hahulu.+
9 Mi Maamoni bazwa mi bayema mwa libaka zabona kuitukiseza ndwa kwa munyako wa muleneñi mi malena bane batile nebali banosi mwa libala.
10 Joabi habona kuli lila zabona neliatumela kuli limulwanise, babañwi kwapili ni babañwi kwamulaho wahae, aketa masole babañwi babasepilwe hahulu mwa Isilaele mi ababeya mwa libaka zabona kuli bakatanyeze Masiria ka ndwa.+
11 Asiya baana babañwi kuli bazamaiswe* ki muhabo yena Abishai,+ ilikuli bayeme mwa libaka zabona kuitukiseza kulwanisa Maamoni.
12 Kihona ali: “Haiba Masiria+ baka nifita kwa maata, uto nitusa; kono haiba Maamoni baka kufita kwa maata, fohe nikato kutusa.
13 Lutiye mi lube ni bundume+ bwa kulwanela sicaba saluna ni mileneñi ya Mulimu waluna, mi Jehova ukaeza sesilukile mwa meeto ahae.”
14 Cwale Joabi ni batu bahae basutelela kuyo lwanisa Masiria, mi Masiria babaleha fapilaa hae.+
15 Maamoni hababona kuli Masiria babalehile, ni bona babaleha fapilaa Abishai mwanahabo yena ni kukena mwa muleneñi. Hasamulaho, Joabi ataha mwa Jerusalema.
16 Masiria hababona kuli batuzwi ki Maisilaele, baluma linumwana kuli liyo biza Masiria ba kwa Nuka,*+ mi nebaetelelwa ki Shofaki muzamaisi wa mpi ya Hadadezeri.+
17 Davida hazibiswa za taba yeo, kapili-pili akopanya Maisilaele kaufela mi asila Jordani ni kuya ku bona mi ayema mwa sibaka sahae kuitukiseza ndwa kuli abataseze. Davida ayema mwa sibaka sahae kuitukiseza ndwa kuli akatanyeze Masiria, mi balwana ni yena.+
18 Kono Masiria babaleha fapilaa Maisilaele; mi Davida abulaya masole ba Masiria babazamaisa likoloi ba 7,000 ni masole babazamaya ka mahutu ba 40,000, mi abulaya Shofaki yena muzamaisi wa mpi.
19 Batanga ba Hadadezeri hababona kuli batuzwi ki Maisilaele,+ kapili-pili baeza tumelelano ya kozo ni Davida mi baba batanga bahae;+ mi kuzwa ka nako yeo, Masiria habasika tabela kutusa Maamoni hape.
Litaluso ze kwatasi
^ Talenta neieza makilogilamu a 34.2. Mubone Litaba Zeekelizwe B14.
^ Linzwi ka linzwi, “Arami-naharaimi.”
^ Linzwi ka linzwi, “mwa lizoho.”
^ Fo kikuli, Nuka ya Eufrati.
