2 Makolonika 3:1-17
3 Cwale Salumoni akala kuyaha ndu ya Jehova+ mwa Jerusalema fa Lilundu la Moria,+ fanaaiponahalelize Jehova ku Davida ndatahe,+ mwa sibaka sanaalukisize Davida fa mapulelo a Orinani+ wa Mujebusi.
2 Akala kuyaha ka lizazi labubeli la kweli yabubeli, mwa silimo sabune sa puso yahae.
3 Mi mutomo wanaaezize Salumoni wa ndu ya Mulimu wa niti neueza liñokolwa ze 60 mwa butelele ni liñokolwa ze 20 mwa bupala,+ ka kuya ka tikanyo yakale.*
4 Malibela a kwapili naaeza liñokolwa ze 20 mwa butelele, ili kulikanelela ni bupala bwa ndu,* mi butelele bwaona bwa kuya mwahalimu nebueza 120;* mi aapesa malibela ao mwahali ka gauda yekenile.+
5 Akwahela ndu yetuna ka mabala a kota ya junipa, mi aiapesa ka gauda yende,+ kihona aikabisa ka maswaniso a kota ya nzalu+ ni likabisa za mawenge.+
6 Hape akabisa ndu ka macwe amande a butokwa;+ mi gauda+ yanaaitusisize neli gauda yezwa kwa Paravaimi.
7 Aapesa ndu, miambeso, mabala a fa minyako, mamota ayona, ni likwalo zayona ka gauda;+ mi fa mamota acakula fateñi maswaniso a likerubimi.+
8 Cwale aeza muzuzu* Okenile Hahulu;+ butelele bwaona nebulikanelela ni bupala bwa ndu mi nebueza liñokolwa ze 20, mi mwa bupala neueza liñokolwa ze 20. Auapesa ka gauda yende yeeza litalenta* ze 600.+
9 Bukiti bwa gauda ya kuezisa limapo nebueza lishekele* ze 50; mi aapesa mizuzu ya fahalimu ka gauda.
10 Cwale aeza likerubimi zepeli zebetilwe mwa muzuzu* Okenile Hahulu, mi aliapesa ka gauda.+
11 Butelele bwa mafufa a likerubimi+ nebueza liñokolwa ze 20; lifufa lililiñwi la kerubimi yapili nelieza liñokolwa zeketalizoho mwa butelele mi neliyo fita kwa limota la ndu, mi lifufa layona leliñwi nelieza liñokolwa zeketalizoho mwa butelele mi neliyo kopana ni leliñwi la mafufa a kerubimi yeñwi.
12 Mi lifufa la kerubimi yeñwi nelieza liñokolwa zeketalizoho mwa butelele mi neliyo fita kwa limota leliñwi la ndu, mi lifufa layona leliñwi nelieza liñokolwa zeketalizoho mwa butelele mi neliyo kopana ni leliñwi la mafufa a kerubimi yapili.
13 Mafufa a likerubimi zeo naabapuhile kueza liñokolwa ze 20; neliyemi ka mahutu azona, mi nelitalimezi mwahali.*
14 Hape aeza lisila+ la bwanda bwa mubala wa ndilu, boya bwa mubala wa pulipela, bwanda bwa mubala wa bufubelu bobutibile, ni line yende, mi alukela fateñi maswaniso a likerubimi.+
15 Kihona aeza misumo yemibeli+ kwapilaa ndu, mi misumo yeo neieza liñokolwa ze 35 mwa butelele, mi toho ya musumo ni musumo neieza liñokolwa zeketalizoho.+
16 Aeza mawenge anaabonahala inge lifaha, mi aabeya kwahalimwaa misumo, mi aeza lipomegaraneti ze 100 ni kulibeya kwa mawenge.
17 Atoma misumo yeo kwapilaa tempele, omuñwi kwa bulyo* ni omuñwi kwa nzohoto;* abeya musumo wa kwa bulyo libizo la Jakini* ni wa kwa nzohoto libizo la Boazi.*
Litaluso ze kwatasi
^ Ñokolwa yene iitusiswa kamita neieza lisentimita ze 44.5 (mainci a 17.5), kono babañwi baikutwa kuli pulelo ya “tikanyo yakale” italusa ñokolwa yetelele yene ieza lisentimita ze 51.8 (mainci a 20.4). Mubone Litaba Zeekelizwe B14.
^ Hakuzibahali kuli butelele bo nebukuma kai luli.
^ Kamba “ili liñokolwa ze 20 mwa bupala bwa ndu.”
^ Talenta neieza makilogilamu a 34.2. Mubone Litaba Zeekelizwe B14.
^ Linzwi ka linzwi, “ndu.”
^ Shekele neieza ligilamu ze 11.4. Mubone Litaba Zeekelizwe B14.
^ Linzwi ka linzwi, “ndu.”
^ Fo kikuli, kwa Sibaka Sesikenile.
^ Kamba “kwa mboela.”
^ Kamba “kwa mutulo.”
^ Lelitalusa “Haike Yena [fo kikuli, Jehova] Atiise.”
^ Mwendi ili kutalusa “Ka Maata.”
