Estere 10:1-3
10 Mulena Asuerusi afa batu ba mwa naha ni mwa lioli za liwate misebezi ya kuhapelezwa.
2 Haili ka za misebezi yahae kaufela yemaata, ni litaba kaufela za butuna bwa Morodekai+ bwanaa mufile mulena,+ hanili liñozwi mwa buka ya litaba zakale+ za malena ba Media ni Peresia?+
3 Kakuli Morodekai wa Mujuda neli yena wabubeli ku Mulena Asuerusi. Naanani situlo sesituna* mwahalaa Majuda mi naakutekiwa ki banabahabo yena babañata, kakuli naaezeza sicaba sahabo yena lika zende mi naabata kuli bana babona kaufela bapile mwa buiketo.*
Litaluso ze kwatasi
^ Kamba “Naabubekwa.”
^ Linzwi ka linzwi, “mi naabulela za kozo kwa bana babona kaufela.”
