Exoda 13:1-22
-
Baeli kaufela babashimani ni lifolofolo za maizibulo kaufela zabaana ki za Jehova (1, 2)
-
Mukiti wa Linkwa Zesika ya Mumela (3-10)
-
Baeli kaufela babashimani ni lifolofolo za maizibulo kaufela zabaana lifiwe ku Mulimu (11-16)
-
Maisilaele baetelelwa kwa Liwate Lelifubelu (17-20)
-
Lilu leliyemi nonga ni mulilo oyemi nonga (21, 22)
13 Jehova hape abulelela Mushe, ali:
2 “Uniketele baeli kaufela babaana* mwahalaa Maisilaele. Baeli ba batu babaana ki baka, ni lifolofolo za maizibulo zabaana ki zaka.”+
3 Mushe kihaa li kwa sicaba: “Muhupulange lizazi le, lene muzwile mwa Egepita,+ lemuzwa mwa ndu ya butanga, kakuli Jehova naamizwisize mwa naha ye, ka lizoho lelimaata.+ Hakulicwalo, musike mwaca sesiile mumela.
4 Lizazi le ki lona lemufunduka, mwa kweli ya Abibi.*+
5 Jehova hasaa mitisize mwa naha ya Makanana, ya Mahiti, Maamori, Mahivi, ni Majebusi,+ yanaakonkile ku bo kuku wamina kuli uka mifa yona,+ ili naha mokububa mabisi ni linosi,+ muswanela kuezanga mukiti wa kuhupula lizazi le mwa kweli ye.
6 Mukaca sinkwa sesisika ya mumela ka mazazi a 7,+ mi lizazi labu 7 likaba la kuezeza Jehova mukiti.
7 Mukaca sinkwa sesisika ya mumela mwa mazazi ao a 7;+ mi kusike kwafumanwa ku mina sesiile mumela,+ mi mumela usike wafumanwa ku mina mwa naha* yamina kaufela.
8 Mi fa lizazi leo mubulelele mwanaa mina wamushimani kuli: ‘Nieza cwalo kabakala sanaa niezelize Jehova nako yenizwa mwa Egepita.’+
9 Mi mukiti wo ukaba sina poniso ya fa mazoho amina mi ukaba sina kupuzo* ya fa lipata zamina,*+ kuli mulao wa Jehova ube mwa milomo yamina, kakuli Jehova naamizwisize mwa Egepita ka lizoho lelimaata.
10 Muswanela kumamela mulao wo ka nako yetomilwe, silimo ni silimo.+
11 “Jehova haka mitisa mwa naha ya Makanana, yasepisize ka luci ku mina ni bo kuku wamina kuli uka mifa yona,+
12 mufe Jehova baeli kaufela babaana,* ni za maizibulo zabaana kaufela kwa limunanu zemuluwa. Zabaana ki za Jehova.+
13 Muliulule mbongolo kaufela ya maizibulo ka ngu, mi haiba musa iliululi, muilobe mulala. Mi muliulule mweli kaufela wamuuna kwa bana bamina babashimani.+
14 “Mi haiba kwapili mwanaa mina amibuza kuli: ‘Taba ye italusañi?’ mumubulelele, muli: ‘Jehova naaluzwisize mwa Egepita, mwa ndu ya butanga, ka lizoho lelimaata.+
15 Faro hanaatatafalile pilu ni kuhana kululukulula,+ Jehova abulaya baeli kaufela mwa naha ya Egepita, kukala ka baeli ba batu kuisa kwa lifolofolo za maizibulo.+ Ki lona libaka haniezeza Jehova matabelo a lifolofolo zabaana za maizibulo kaufela,* ni kuliulula mweli kaufela kwa bana baka babashimani.’
16 Mukiti wo ukaba sina poniso ya fa mazoho amina ni sina lisila la fa lipata zamina,*+ kakuli Jehova naaluzwisize mwa Egepita ka lizoho lelimaata.”
17 Cwale Faro hasaalukuluzi batu kuli baye, Mulimu naasika bazamaisa ka nzila yefita kwa naha ya Mafilisita, nihaike neipuma. Kakuli Mulimu naaize: “Batu bakasuhana bacinca muhupulo habaka lwaniswa mi bakakutela kwa Egepita.”
18 Ka mukwa ocwalo, Mulimu azamaisa batu ka nzila yepotoloha, ya lihalaupa lelili bukaufi ni Liwate Lelifubelu.+ Kono Maisilaele nebazwile mwa naha ya Egepita ka likwata, sina limpi za ndwa.
19 Mushe hape ashimba masapo a Josefa, kakuli Josefa naakonkisize bana ba Isilaele kuli: “Kaniti Mulimu uka mitusa, mi muswanela kulwala masapo aka hamuzwa mo.”+
20 Bafunduka mwa Sukoti mi bayo tibelela mwa Etami, kwatuko ni lihalaupa.
21 Cwale Jehova naabaetelela mwa nzila ka lilu leliyemi nonga ka nako ya musihali+ ni ka mulilo oyemi nonga ka nako ya busihu ili kubamonyehela, kuli bakone kuzamaya musihali ni busihu.+
22 Lilu leliyemi nonga nelisa zwangi fapilaa sicaba ka nako ya musihali, mi mulilo oyemi nonga ni ona neusa zwangi fapilaa bona ka nako ya busihu.+
Litaluso ze kwatasi
^ Linzwi ka linzwi, “mweli kaufela yazwa mwa mba ni mba.”
^ Mubone Litaba Zeekelizwe B15.
^ Linzwi ka linzwi, “milulwani.”
^ Linzwi ka linzwi, “mwahalaa meeto amina.”
^ Kamba “kupuliso.”
^ Linzwi ka linzwi, “mutu kaufela wapili kuzwa mwa mba.”
^ Linzwi ka linzwi, “nto kaufela yapili kuzwa mwa mba.”
^ Linzwi ka linzwi, “mwahalaa meeto amina.”
