Taba Yende Yeneñozwi ki Joani 17:1-26
17 Jesu abulela lika ze, mi ainulela meeto ahae kwa lihalimu, ali: “Ndate, nako ifitile. Ukanyise mwanaa hao, kuli mwana akukanyise,+
2 sina hau mufile maata fahalimwaa batu kaufela,+ ilikuli akone kufa bupilo bobusa feli+ ku beu mufile kaufela.+
3 Kuli bafumane bupilo bobusa feli,+ batokwa kuzwelapili kukuziba,* wena Mulimu anosi wa niti,+ ni yene ulumile, yena Jesu Kreste.+
4 Nikukanyisize mwa lifasi,+ mi nifelize musebezi ou nifile kueza.+
5 Cwale Ndate, unikanyise kwatuko ahao ka kanya yene ninani yona hane nili bukaufi ni wena pili lifasi lisika ba kale teñi.+
6 “Nibonahalize* libizo lahao kwa batu bane unifile mwa lifasi.+ Neli bahao, mi neu nifile bona, mi bamamezi* linzwi lahao.
7 Cwale ki kale baziba kuli lika kaufela zene unifile lizwa ku wena;
8 kakuli nibafile manzwi ene unifile,+ mi baaamuhezi mi bazibile luli kuli nenitile sina muyemeli wahao,+ mi balumezi kuli neu nilumile.+
9 Nikupela bona; hanikupeli lifasi, kono nikupela beu nifile, kakuli ki bahao;
10 mi lika kaufela zeli zaka ki zahao, mi zahao ki zaka,+ mi nikanyisizwe mwahalaa bona.
11 “Hanisa liyo mwa lifasi, kono bona ba mwa lifasi,+ mi nitaha ku wena. Ndate Yakenile, ubasileleze+ kabakala libizo lahao leu nifile, ilikuli babe alimuñwi* sina luna haluli alimuñwi.*+
12 Hane nisainzi ni bona, neni basilelezanga+ kabakala libizo lahao leu nifile; mi nibasilelelize, mi ku bona hakuna nihaiba alimuñwi yasinyehile+ kwandaa mwanaa sinyeho,+ ilikuli liñolo litalelezwe.+
13 Kono cwale nitaha ku wena, mi nibulela lika ze mwa lifasi, kuli tabo yaka ikwanelele ku bona.+
14 Nibafile linzwi lahao, kono lifasi libatoile, kakuli haki ba lifasi,+ sina na, hanisi wa lifasi.
15 “Hanikupi kuli ubazwise mwa lifasi, kono kuli ubasileleze kabakala yamaswe.+
16 Haki ba lifasi,+ sina na, hanisi wa lifasi.+
17 Ubakenise* ka niti;+ linzwi lahao ki yona niti.+
18 Sina hane unilumile mwa lifasi, ni na, nibalumile cwalo mwa lifasi.+
19 Mi niikenisa kabakala bona, kuli ni bona bakeniswe ka niti.
20 “Hanikupeli bona feela, kono nikupela ni babalumela ku na ka linzwi labona,
21 kuli kaufelaa bona babe alimuñwi,+ sina wena Ndate hauswalisani ni na, ni na haniswalisani ni wena,+ kuli ni bona baswalisane ni luna, ilikuli lifasi lilumele kuli neu nilumile.
22 Nibafile kanya yeu nifile, kuli babe alimuñwi sina feela luna haluli alimuñwi.+
23 Na niswalisani ni bona ni wena uswalisani ni na, kuli babe babapetehile mwa buñwi,* kuli lifasi lizibe kuli neu nilumile ni kuli ubalatile sina mou nilatezi.
24 Ndate, nibata kuli beu nifile babe ni na koniinzi,+ kuli babone kanya yeu nifile, kakuli unilatile pili lifasi lisika ba kale teñi.+
25 Ndate yalukile, lifasi kaniti halisika kuziba,+ kono na nikuzibile,+ mi ba, bazibile kuli neu nilumile.
26 Nizibahalize libizo lahao ku bona mi nika lizibahaza,+ kuli lilato leu nilatile ka lona libe ku bona mi na niswalisane ni bona.”+
Litaluso ze kwatasi
^ Kamba “batokwa kuzwelapili kuba ni zibo yahao.”
^ Kamba “Nizibahalize.”
^ Kamba “bautwile.”
^ Kamba “baswalisane.”
^ Kamba “haluswalisani.”
^ Kamba “Ubakauhanye.”
^ Kamba “baswalisane ka kutala.”
