Joshua 20:1-9
-
Mileneñi ya masabelo (1-9)
20 Jehova kihaa li ku Joshua:
2 “Bulelela Maisilaele, uli: ‘Muiketele mileneñi ya masabelo+ yene nimibulelezi zateñi ka Mushe,
3 kuli mutu yabulaya yomuñwi ka kusalela* kamba isi ka bomu asabele kwateñi. Mi ikaba masabelo amina kuli musilelezwe ku mulifisi wa mali.*+
4 Mutu yo uswanela kusabela ku omuñwi wa mileneñi yeo+ ni kuyo yema kwa munyako wa muleneñi,+ abihe taba yahae kwa baana-bahulu ba muleneñi wo. Mi bona baka muamuhela mwa muleneñi ni kumufa sibaka mi ukapila ni bona.
5 Haiba mulifisi wa mali* alatelela mutu yo yabulaile yomuñwi, habaswaneli kufa mutu yo mwa mazoho ahae, kakuli naabulaile mwanahabo yena ka kusalela* mi naasika mutoya.+
6 Uswanela kuina mwa muleneñi wo kufitela aatulwa fapilaa sicaba,+ mi ukaina mwateñi kufitela lifu la muprisita yapahami+ yaliteñi ka nako yeo. Muprisita yapahami hasashwile, mutu yo yabulaile yomuñwi wakona kukutela kwa muleneñi kwanaabalehile, mi wakona kukena mwa muleneñi wo ni kukena mwa ndu yahae.’”+
7 Kiha baeza muleneñi wa Kedeshi kuba okenile,*+ ona ofumaneha mwa Galilea mwa naha ya malundu ya Nafetali, ni muleneñi wa Sikemi+ ofumaneha mwa naha ya malundu ya Efraimi, ni muleneñi wa Kiriati-ariba,+ fo kikuli, Hebroni, ofumaneha mwa naha ya malundu ya Juda.
8 Mwa naha ya Jordani, ye kwa upa wa Jeriko, baketa muleneñi wa Bezeri+ o mwa lihalaupa mwa naha yelumbile yepatami ya ba lusika lwa Rubeni, ni muleneñi wa Ramoti+ o mwa Giliadi, naha ya ba lusika lwa Gadi, ni muleneñi wa Golani+ o mwa Bashani, naha ya ba lusika lwa Manase.+
9 Yeo yaba yona mileneñi yeneketezwi Maisilaele kaufela ni bazwahule babayahile mwahalaa bona, ilikuli mutu yabulaile yomuñwi ka kusalela asabele kwateñi+ mi asike abulaiwa ki mulifisi wa mali* pili mutu yo asika aatulwa kale fapilaa sicaba.+
Litaluso ze kwatasi
^ Kamba “ka kusaziba.”
^ Kamba “mulomboti wa mali.”
^ Kamba “mulomboti wa mali.”
^ Kamba “ka kusaziba.”
^ Kamba “Kiha baketa muleneñi wa Kedeshi.”
^ Kamba “mulomboti wa mali.”
