Liproverbia 30:1-33
-
MANZWI A AGURU (1-33)
30 Litaba za butokwa zefumaneha mwa manzwi a Aguru mwanaa Jake, anaabulelezi Itiele ni Ukali.
2 Kwa batu kaufela, ki na yasina zibo,+Mi hanina kutwisiso yaswanela kuba ni yona mutu.
3 Hanisika ituta butali,Mi hanina zibo ya Yakenile Hahulu.
4 Ki mañi yakambamezi kwa lihalimu ni kushetumuka kuzwa kwateñi?+
Ki mañi yafumbatezi moya mwa mazoho ahae amabeli?
Ki mañi yaputezi mezi mwa siapalo sahae?+
Ki mañi yatiisize* maneku kaufela a lifasi?+
Libizo lahae ki mañi, ni libizo la mwanaa hae ki lifi—haiba waziba?
5 Linzwi ni linzwi labulela Mulimu likenile.+
Ki tebe ku babasabela ku yena.+
6 Usike waekeza sesiñwi kwa manzwi ahae,+Hakusicwalo, uka kunyaza,
Mi wena ukabonahala kuba lihata.
7 Nikupa lika zepeli ku wena.
Usike wanitima zona nisika shwa kale.
8 Uzwise zesi za niti ni buhata ku na, libe kwahule ni na.+
Usike wanifa bubotana kamba bufumu.
Unituhelele feela nice kabelo yaka ya sico,+
9 Kuli nisike naatelwa ni kukulatula, mi nali: “Jehova ki mañi?”+
Mi usike wanituhelela kuba mubotana kuli ni uzwe ni kushwaulisa* libizo la Mulimu waka.
10 Usike wasawana mutanga ku mulenaa hae,Hakusicwalo, akasuhana akukuta mi wena ukafumanwa ni mulatu.+
11 Kunani lusika lwa batu babakuta bo ndataa bonaNi babasa kuteki bo maa bona.+
12 Kunani lusika lwa batu babaipona kukena mwa meeto abona+Kono habasika keniswa kwa masila* abona.
13 Kunani lusika lwa batu babanani meeto aikuhumusa hahuluNi meeto abonahala kuipahamisa hahulu!+
14 Kunani lusika lwa batu babanani meeno ali mikwaleNi mitahali yeli litipa za kubulaisa;Bamiza babashebile mwa lifasiNi babotana mwahalaa batu.+
15 Minyopi inani bana babasizana bababeli babalila inze bali: “Amulufe! Amulufe!”
Kunani lika zetaalu zesakuli,Zeene zesabuleli kuli: “Kulikani!”
16 —Ki Libita*+ ni mba yesapepi,Naha yesina mezi,Ni mulilo osabuleli kuli: “Kulikani!”
17 Liito la yasheununa ndatahe ni la yalimbulula mahe+—Mañwalala a mwa musindi* aka litongola,
Mi likaciwa ki limbande zabana.+
18 Kunani lika zetaalu zenisa koni kuutwisisa,*Mi ki zeene zenisa utwisisi:
19 Nzila ya mbande mwa mahalimu,Nzila ya noha fa macwe,Nzila ya sisepe mwa liwate,Ni nzila ya muuna ku kalibe.
20 Ye ki yona nzila ya musali wa mubuki:
Waca, mi waipukuta kwa milomo;Kihona ali: “Hakuna senifosize.”+
21 Kunani lika zetaalu zenyanganyisa lifasiMi ki zeene zeo lifasi lisa koni kutiyela:
22 Mutanga habusa sina mulena,+Sikuba hasikusi hahulu lico,
23 Musali yatoilwe* hanyalwa,Ni mutanga wamusizana haanga sibaka sa* mulenaa hae wamusali.+
24 Kunani lika zeene kwa lika zenyinyani hahulu mwa lifasi,Kono libupilwe ni butali:*+
25 Butwa habuna maata,*Kono bulukisanga lico zabona ka nako ya litabula.+
26 Tumbila+ hatuna maata,*Kono tuikezeza mandu mwa macwe.+
27 Nziye+ haina mulena,Kono kaufelaa yona izamaya hande ka sikutu.*+
28 Mukolozwani obelela+ ukumalela ka mahutu aona,Mi ukena mwa ndu ya mulena.
29 Kunani lika zetaalu zebuheha molihatela,Zeene zebuheha molizamaela:
30 Tau, yemaata hahulu mwahalaa libatana,Yesasabi mutu;+
31 Nja yezuma; puli yamuuna;Ni mulena yazamaya ni mpi yahae.
32 Haiba wena uipahamisize ka bukuba+Kamba haiba ulela kueza cwalo,Uiswale kwa mulomo ka lizoho lahao.+
33 Kakuli sina kufeta mabisi hakutahisa mbataNi kupyata ngo hakuzwisa mookola,Kushemaeta buhali ni kona kutahisa likomano.+
Litaluso ze kwatasi
^ Linzwi ka linzwi, “yapahamisize.”
^ Kamba “kulwanisa.”
^ Linzwi ka linzwi, “ñanda.”
^ Kamba “Sheoli,” fo kikuli, sibaka sa swanisezo sa babashwile. Mubone Litaluso za Manzwi.
^ Kamba “mulapo.”
^ Kamba “zeenikomokisa hahulu.”
^ Kamba “yasalatiwi.”
^ Kamba “hayola.”
^ Kamba “libutali hahulu-hulu.”
^ Linzwi ka linzwi, “ki sicaba sesisina maata.”
^ Linzwi ka linzwi, “ki sicaba sesisina maata.”
^ Kamba “ialuhani ka likwata.”
