Numere 36:1-13
36 Litoho za mabasi a bana ba Giliadi mwanaa Makiri+ mwanaa Manase, za mabasi a bana ba Josefa, basutelela mi babulela fapilaa Mushe ni manduna, bona litoho za mabasi a Maisilaele.
2 Bali: “Jehova naalaezi muñaa luna kuli aabe naha ka loto+ kuli ibe saanda sa Maisilaele; mi muñaa luna naalaezwi ki Jehova kuli afe saanda sa mwanahabo luna Zelofehadi kwa bana bahae babasizana.+
3 Haiba banyalwa kwa baana ba mwa lusika lwa Isilaele lusili, saanda sa basali bao ni sona sikazwiswa kwa saanda sa bo ndataa luna mi sikaekezwa kwa saanda sa lusika kobanyalezwi, mi fo, sikazwiswa kwa saanda saluna seluabezwi ka loto.
4 Mi ka Silimo sa Tukuluho*+ ya sicaba sa Isilaele, saanda sa basali bao ni sona sikaekezwa kwa saanda sa lusika kobanyalezwi, mi fo, saanda sabona sikazwiswa kwa saanda sa lusika lwa bo ndataa luna.”
5 Mushe kihaa laela Maisilaele kulikana ni taelo ya Jehova, ali: “Taba yebabulela ba lusika lwa bana ba Josefa ki ya niti.
6 Ki ye taelo yafile Jehova ka za bana ba Zelofehadi babasizana, uize: ‘Bakona kunyalwa ku mutu yebalata kaufela. Kono baswanela kunyalwa ki mutu yasimuluha mwa lubasi lwa mwa lusika lwa ndataa bona.
7 Hakuna saanda sa Maisilaele sesiswanela kushimbululwa mwa lusika loluñwi kuiswa ku loluñwi, kakuli Maisilaele baswanela kukumalela saanda sa lusika lwa bo kuku wabona.
8 Mi mwanaa musizana kaufela yaluwile saanda mwahalaa masika a Isilaele uswanela kunyalwa ki mutu yasimuluha mwa lusika lwa ndatahe,+ ilikuli Maisilaele bazwelepili kuluwa saanda sa bo kuku wabona.
9 Hakuna saanda sesiswanela kushimbululwa mwa lusika loluñwi kuiswa ku loluñwi, kakuli masika a Isilaele aswanela kukumalela saanda saona.’”
10 Bana ba Zelofehadi babasizana kiha baeza sina Jehova mwanaalaelezi Mushe.+
11 Mi bana ba Zelofehadi babasizana, bo Mahala, Tiriza, Hogula, Milika, ni Noa,+ banyalwa kwa bana babashimani bahabo ndataa bona.
12 Banyalwa ki baana babasimuluha mwa mabasi a Manase mwanaa Josefa, ilikuli saanda sabona sizwelepili kuba mwa lusika lwa lubasi lwa ndataa bona.
13 Yeo ki yona milao ni likatulo zanaafile Jehova kwa Maisilaele ka Mushe mwa lihalaupa la mwa naha ya Moabi, kwatuko ni Jordani, kwa Jeriko.+
Litaluso ze kwatasi
^ Kamba “Jubile.”
