Nihaike kuli Mulimu naasika lukisa kale milao yebonisa za kusa lapela milimu ya maswaniso, Jakobo naaziba kuli Jehova ki yena feela yaswanela kulapelwa. (Exo. 20:3-5) Kacwalo Jehova hasamubulelezi kuli akutele kwa Betele, Jakobo alaela batu kaufela bane bali ni yena kuli bazwise milimu ya maswaniso mwahalaa bona. Mi Jakobo ayumba milimu yeo, kukopanyeleza cwalo ni masale ane batinanga ka mulelo wa kuisileleza. (Gen. 35:1-4) Ka niti Jehova naatabisizwe ki kezo ya Jakobo.

Luna lukona kubonisa cwañi kuli Jehova ki yena feela yaswanela kulapelwa? Lukona kubonisa cwalo ka kuambuka lika kaufela zeswalisana ni tumelo ya mioya. Taba yeo ikopanyeleza kuyumba lika kaufela zeswalisana ni madimona ni kutatuba ka tokomelo lika zeluitabisanga ka zona. Ka mutala, muipuze kuli: ‘Kana libuka ni mafilimu zeniitabisanga ka zona linani litaba zeama lika zecwale ka bilumba, bingilinginja, kamba bikishikishi? Kana lika zeniitabisanga ka zona libonisanga inge kuli lika zecwale ka mabibo, kuposa mutu siposo kamba kuambelela mutu hakusika fosahala?’ Luswanela kuambuka lika kaufela zatoile Jehova.—Samu 97:10.

MUBUHE VIDIO YELI “MUHANYEZE DIABULOSI,” MI KIHONA MUKAALABA LIPUZO ZELATELELA:

• Ki butata mañi bone bakopani ni bona bo Palesa?

• Ki kabakalañi hakuli kwa butokwa kukupanga tuso kwa baana-bahulu halukatazwa ki madimona?

• Haiba lubata kusilelezwa ki Jehova, ki lika mañi zeluswanela kuikambusa ku zona?

• Ki muhato mañi wa butokwa one baangile bo Palesa?

• Mwa sibaka semupila ku sona, ki linzila mañi zemukona kuambuka ka zona madimona?