Kana munani lilimo ze mwahalaa 23 ni 65 mi mu mwa sebelezo ya nako kaufela? Kana muiketile hande kwa mubili mi mwakona kusebeleza kai kamba kai kokutokwahala hahulu bakutazi? Haiba ki cwalo, kana munahanile za kukupa kukena Sikolo sa Bakutazi ba Mubuso? Kuzwa feela fosikalela sikolo se, mizwale ni likaizeli babañata, babanyalani ni makwasha, bakupile kukena sikolo se. Nihakulicwalo, lutokwa mizwale ba makwasha babañata kuli bakene sikolo se. Mukupe Jehova kuli amituse kuba ni takazo yetuna ya kumutabisa ni kulikanyisa mwanaa hae. (Samu 40:8; Mat. 20:28; Maheb. 10:7) Kihona cwale mukanyakisisa momukona kukusufaleza kwa nako yemutandanga kwa mubeleko kamba kwa kueza lika za ka butu ilikuli mukwanise zetokwahala.

Mizwale ni likaizeli babakwazize sikolo se baikola matohonolo mañi mwa sebelezo yabona ku Jehova? Babañwi balumilwe kuyo sebeleza kwa libaka kokubulelwa lipuo lisili kamba kuli baabane mwa mukutalezo oipitezi wa fa nyangela. Babañwi hamulaho baketiwanga kuba batusi ba baokameli ba mupotoloho, baokameli ba mupotoloho, kamba balumiwa. Hamunze munahanisisa zemukona kueza mwa sebelezo yamina ku Jehova, haike mube ni maikuto anaanani ona mupolofita Isaya yanaabulezi kuli: “Ki na yo! Haku nilume!”—Isa. 6:8.

MUBUHE VIDIO YELI BALUMIWA—BABELEKA MWA MUSEBEZI WA KUKUTULA, MI KIHONA MUKAALABA LIPUZO ZELATELELA:

• Balumiwa baketiwanga cwañi?

• Balumiwa bapeta misebezi mañi yeminde?

• Ki lifi zeñwi za limbuyoti zebaikola balumiwa?