Lwakona kuzwafiswa ki miinelo yetaata sihulu haiba izwelapili. Davida naanani sepo ya kuli Jehova naakafelisa butata bwanaatalimana ni bona bone butahiswa ki Mulena Saule, ni kuli naaka mueza mulena sina mwanaa musepiselize. (1 Sam. 16:13) Tumelo ya Davida neimutusize kuba ni pilu-telele ni kuzwelapili kulibelela kuli Jehova ukacinca muinelo wanaali ku ona.

Halutalimana ni muinelo otaata, lwakona kuitusisa butali, zibo, kamba buikoneli bwaluna bwa kunahana ilikuli lukone kucinca muinelo oluli ku ona. (1 Sam. 21:12-14; Liprov. 1:4) Nihakulicwalo, kusina taba ni buikatazo boluezize kuli lutatulule miinelo yetaata ka kulumelelana ni likuka za mwa Bibele, miinelo yemiñwi yazwelangapili. Mwa miinelo yecwalo, luswanela kuzwelapili kubonisa pilu-telele ni kulibelela ku Jehova. Honacwale-cwale fa ukafelisa miinelo yetaata kaufela yelutalimana ni yona mi “ukatakula miyoko kaufela” kwa meeto aluna. (Sin. 21:4) Ibe kuli miinelo yelukopana ni yona yakona kufela kabakala lika zakona kueza Jehova kamba ka mabaka amañwi, lunani buikolwiso bwa kuli: Miinelo yetaata kaufela ikafeliswa nako yeñwi. Kuziba taba yeo kwakona kuluomba-omba.

MUBUHE VIDIO YELI BATU BA JEHOVA BONA NEBASWALISANI BABAÑWI HANE BASASWALISANI, MI KIHONA MUKAALABA LIPUZO ZELATELELA:

• Ki miinelo mañi yetaata yene bakopani ni yona Bakreste ba kwa mboela wa United States?

• Nebabonisize cwañi pilu-telele ni lilato?

• Nebazwezipili cwañi kulemuha “lika za butokwa hahulu nikufita”?—Mafil. 1:10