Davida naakonile kutula Goliati kabakala kuli naaitingile ku Jehova. (1 Sam. 17:45) Jehova ubata kubonisa maata ahae kuli atuse batanga bahae kaufela. (2 Makol. 16:9) Lukona kuitinga cwañi kwa tuso yalufa Jehova mwa sibaka sa kuitinga fa lika zeezahezi kuluna kamba buikoneli bolunani? Ki ze linzila zetaalu:

• Mulapelange kamita. Hamuswaneli kulapelanga feela ku Jehova kukupa swalelo hamufosize kono hape mukupange maata hamulikiwa kueza nto yemaswe. (Mat. 6:12, 13) Hamuswaneli kulapelanga feela ku Jehova kuli afuyaule katulo yemuezize kale kono hape mulapelange kuli amife ketelelo ni butali pili musika eza kale katulo.—Jak. 1:5

• Mube ni tomahanyo ya kubalanga ni kuituta Bibele. Mubalange Bibele zazi ni zazi. (Samu 1:2) Munahanisisange ka za mitala ya batu bababulezwi mwa Bibele, mi muitusise litaba zemuitutile. (Jak. 1:23-25) Muitukisezange pili musikaya kale mwa bukombwa mwa sibaka sa kuitinga fa lika zene muezize kwa mulaho. Kuli mutusiwe hahulu ki mikopano ya puteho, muitukisezange pili musikaya kale kwa mikopano.

• Muswalisane ni kopano ya Jehova. Mubone teñi kuli mwaziba ketelelo yenca yelufiwa ki kopano mi muilatelele kapili. (Num. 9:17) Muamuhelange kelezo ni litaelo zemufiwa ki baana-bahulu.—Maheb. 13:17

MUBUHE VIDIO YELI HALUSWANELI KUSABA NYANDISO, MI KIHONA MUKAALABA LIPUZO ZELATELELA:

• Ki lika mañi zene tahisize kuli mizwale ni likaizeli boluboni mwa vidio babe ni sabo?

• Ki lika mañi zene batusize kufelisa sabo yabona?