Kauhanyo 33

Jesu Wa Kona Ku Lu Sileleza

JESU ha n’a hulile ni ku ziba mwa n’a silelelizwe ha n’a sa li mwanana, kana u bona kuli n’a lapezi ku Jehova ni ku itumela ku yena?— Ka m’o bonela wena, ki sifi seo mwendi Jesu n’a bulelezi bo Maria ni Josefa ha n’a zibile kuli ne ba pilisize bupilo bwa hae ka ku mu isa kwa Egepita?—

Ki niti kuli Jesu h’a sa li mbututu cwale. Mane ni fa lifasi h’a sa pila fateñi sina ha n’a kile a pila teñi kale-kale k’o. Kono kana s’o lemuhile kuli batu ba bañwi kacenu ba bonahala k’u nga kuli Jesu u sa li mbututu inz’a li mwa licelo?— Ku banga cwalo ka nako ya Ngilisimusi mwa libaka ze ñata m’o ku boniswanga maswaniso a Jesu inge a li mbututu.

Nihaike Jesu h’a sa pila fa lifasi, kana wa lumela kuli wa pila?— Ee, n’a zusizwe kwa bafu, mi cwale s’a li Mulena ya m’ata kwa lihalimu. Ki sifi s’o bona wena kuli u kona ku eza ilikuli a sileleze ba ba mu sebeleza?— Ka mutala, Jesu ha n’a li fa lifasi, n’a bonisize mw’a kona ku sileleleza ba ba mu lata. Ha lu bone mwa n’a ezelize cwalo zazi le liñwi ha n’a li mwa sisepe ni balutiwa ba hae.

 S’e li manzibwana luli. Jesu n’a sweli ku luta lizazi mutumbi bukaufi ni Lisa la Galilea, ili lisa le li eza likilomita ze 20 mwa butelele ni ze 12 mwa bupala. Cwale u bulelela balutiwa ba hae kuli: “Lu silele mwa buse bwa lisa.” Kacwalo, ba kena mwa sisepe mi ba kalisa ku fuluha ku liba kwa buse bwa lisa. Jesu u katezi hahulu, kacwalo u ya mwa litusi la sisepe mi u y’o lobala fa musamo. Hanyinyani fela, u ya mwa buloko.

Balutiwa bona ba sa tona kuli ba zwelepili ku fuluha sisepe. Lika kaufela li iketile ka nakonyana, kono cwale ku taha liñungwa le lituna. Li zwelapili ku fuka ka m’ata, mi mandinda a ekezeha. Mezi a kalisa ku bayulela mwa sisepe, mi sisepe ne se si kala ku tala mezi.

Balutiwa ba saba kuli ba ka tiba. Kono Jesu yena h’a sabi. U sa itobalezi mwa litusi la sisepe. Kwa mafelelezo, balutiwa ba mu zusa, mi ba li: ‘Muluti, muluti, ha ku lu pilise; liñungwa le li tuha li lu bulaya.’ Jesu cwale kih’a zuha mi a omanya moya ni mandinda. U li: “Kuza, u li tu!”

Honaf’o, moya wa tuhela  ku fuka, mi lisa la ombala. Balutiwa ba ikomokela. Ba li ku pepwa ba sa boni nto ye cwalo i ezahala. Ba kalisa ku bulelisana, ba li: “Kana yo ki mañi, kuli mane a laele moya ni mezi, mi li mu utwe?”—Luka 8:22-25; Mareka 4:35-41.

Kana Jesu wa mu ziba?— Kana wa ziba kw’a zwa m’ata a hae a matuna?— Balutiwa ne ba sa swaneli ku saba Jesu ha n’a li ni bona mwa sisepe, kakuli Jesu n’a si mutu-tu fela. N’a kona ku eza lika ze makaza ze n’e sa konwi ku eziwa ki mutu ufi kamba ufi. Teeleza ni ku kandekele nto ye ñwi ya n’a ezize ha ne ku fukile moya o muñata mwa lisa.

Se ku fitile nako, mi ki lizazi le liñwi hape. Lizazi ha li likela, Jesu u bulelela balutiwa ba hae kuli ba nge sisepe mi ba itangete kwapil’a hae kwa buse bwa lisa. Cwale Jesu u ya a nosi fa lilundu. Ki fa sibaka se si kuzize f’a kona ku lapela ku Ndat’ahe, yena Jehova Mulimu.

Balutiwa ba kena mwa sisepe mi ba kalisa ku fuluhela kwa buse  bwa lisa. Kono ha se ku fitile nakonyana fela, moya wa kalisa ku fuka. U kalisa ku fuka hahulu. Cwale s’e li busihu. Banna bao ba pahulula masila a sisepe mi ba kalisa ku laba. Ha ba koni ku fuluhela kwahule kakuli moya u sweli ku ba fukela. Sisepe si sweli ku kasha-kashezwa kafa ni kafa ki mandinda, mi mezi a sweli ku bayulela mwa sisepe. Banna bao ba sebeza ka t’ata kuli ba y’o fita fa likamba, kono ba palelwa.

Jesu u sa li a nosi mwa lilundu. S’a bile teñi ka nako ye telele. Kono cwale u bona kuli balutiwa ba hae ba mwa kozi mwa mandinda a matuna. Kacwalo, u shetumuka ku zwa fa lilundu ku t’o fita fa likamba la lisa. Jesu u bata ku tusa balutiwa ba hae, kacwalo u kalisa ku zamaya fa mezi a mandinda ka ku liba ku bona!

Ne ku ka ezahalañi ha n’o ka lika ku zamaya fa mezi?— N’o ka mina mikope, mi mwendi n’o ka shwa. Kono ku Jesu ha ku cwalo. U na ni m’ata a ipitezi. Jesu u na ni ku zamaya musipili o mutelele kuli a katanyeze sisepe. Kacwalo, masa n’a s’a patalala balutiwa ha ba bona Jesu a taha a ba libile inz’a zamaya fa mezi. Kono ba komoka bakeñisa ze ne ba boni. Ba sabile hahulu, mi ba kalisa ku huwa ka ku saba. Jesu cwale u bulela ni bona, u li: “Mu tiye lipilu, ki na, mu si ke mwa saba.”

Jesu a sa kena fela mwa sisepe, moya wa ombala. Balutiwa hape ba komoka. Ba kubama fapil’a Jesu mi ba li: “Kaniti ki wena Mwan’a Mulimu.”—Mateu 14:22-33; Joani 6:16-21.

Kana ne ku si ke kwa tabisa ku pila mwa linako zeo ni ku bona Jesu a eza lika ze cwalo?— Kana wa ziba libaka Jesu ha n’a ezize limakazo zeo?— N’a ezize limakazo zeo kakuli n’a lata balutiwa ba hae mi n’a bata ku ba tusa. Kono hape n’a ezize limakazo zeo kuli a bonise m’ata a matuna a n’a na ni ili a’ ka itusisa kwapili ka ku ba Mubusi wa Mubuso wa Mulimu.

 Niheba kacenu, Jesu hañata u itusisanga m’ata a hae kuli a sileleze balateleli ba hae kwa buikatazo bwa Satani bwa ku ba tuhelisa ku bulelela ba bañwi ka za Mubuso wa Mulimu. Kono Jesu h’a itusisi m’ata a hae kuli a sileleze balutiwa ba hae ilikuli ba si ke ba kula kamba ku ba folisa ha ba kula. Mane niheba baapositola ba Jesu kaufela ne ba shwile. Jakobo, muhulwan’a Joani, n’a bulailwe, mi yena Joani n’a beilwe mwa tolongo.—Likezo 12:2; Sinulo 1:9.

Ni kacenu ku cwalo. Batu ni ko ba sebeleza Jehova ni ko ba sa mu sebelezi, kaufel’a bona ba kona ku kula ni ku shwa. Kono honafa, ka nako y’a ka busa Jesu sina Mulena wa mulonga wa Mulimu, lika li ka cinca. Ha ku na ku ba ni yo mukana y’a ka ba ni sabo, kakuli Jesu u ka itusisa m’ata a hae kuli a tuse batu kaufela ba ba mu utwa.—Isaya 9:6, 7.

Mañolo a mañwi a’ bonisa m’ata a matuna ao Jesu, yena ya ketilwe ki Mulimu ku ba Mubusi wa Mubuso wa Mulimu, ki Daniele 7:13, 14; Mateu 28:18; ni Maefese 1:20-22.

[Siswaniso se si fa likepe 172]

U nga cwañi Jesu—sina Mulena ya m’ata kamba sina mbututu ye sa koni ku isileleza?

[Siswaniso se si fa likepe 173]

Jesu u bulelelañi moya ni mandinda?

[Siswaniso se si fa likepe 174]

Jesu n’a ezelizeñi limakazo?

[Siswaniso se si fa likepe 176]

Jesu u sileleza cwañi balateleli ba hae kacenu?