Kauhanyo 20

Kana Kamita U Batanga Ku Ba Wa Pili?

KANA wa ziba mutu ya batanga ku ba wa pili?— A kana a kasha yo muñwi mwa mulaini ilikuli a be kwapili. Kana u kile wa bona nto yeo i ezahala?— Muluti yo Mutuna n’a boni kuli ba bahulu ni bona ne ba likanga ku ikungela lipula za pili kamba ze kutekeha hahulu. Mi n’a si ka tabela cwalo. Ha lu bone se ne si ezahezi.

Bibele i lu bulelela kuli Jesu n’a memilwe kwa mukiti o mutuna kwa ndu ya Mufalisi, munna ya kutekeha ya n’a li yo muhulu wa bulapeli. Jesu ha s’a fitile kwa ndu yeo, a kalisa ku talima ba ba memilwe ba bañwi ha ba kena ni ku iketela lipula ze nde ka ku fitisisa.  Kacwalo, a kandekela be ne ba memilwe bao likande. Kana wa tabela ku li utwa?—

Jesu n’a ize: ‘Mutu h’a mi mema kwa mukiti wa sinawenga, mu si ke mwa iketela sibaka se sinde kamba se si kutekeha hahulu.’ Kana wa ziba libaka Jesu ha n’a bulezi cwalo?— N’a talusize kuli mwendi ku memilwe yo muñwi ya kutekeha ku ba fita. Kacwalo, sina ha u kona ku bona mwa siswaniso sale, yena mumemi y’o wa taha ni ku t’o bulela kuli: ‘U fe yo sibaka, mi u ye u yo ina fale.’ Kacwalo, ya memilwe y’o n’a ka ikutwa cwañi?— N’a ka ikutwa maswabi kakuli ba ba memilwe ba bañwi ne ba ka mu bona a ya kwa sibaka se si sa kutekehi hahulu.

Jesu n’a bonisa kuli ha ku si ka luka ku lakaza sibaka se sinde ka ku fitisisa. Kacwalo, a bulela kuli: ‘Ha mu memiwa kwa mukiti wa sinawenga, mu ine mwa sibaka sa mafelelezo. Mi yena ya mi memile u ka taha ni ku t’o bulela kuli: Mulikani, sutelela kwapili. Fohe u ka kutekiwa fapil’a ba bañwi ba ba memilwe kaufela ha u nze u ya kwa sibaka se sinde ni ku fita.’—Luka 14:1, 7-11.

Kana u utwisisize sisupo sa n’a luta Jesu mwa likande la hae?— Ki o mutala kuli lu bone haiba u utwisisize. U hupule kuli u bata ku kena mwa mbasi mo ku na ni batu ba bañata. Kana wa lukela ku akufa kuli u fumane fa ku ina ni ku tuhelela yo muhulu inz’a yemi?— Kana Jesu n’a ka tabela ha n’o ka eza cwalo?—

Yo muñwi n’a ka bulela kuli Jesu h’a na taba ni ze lu eza. Kana wa lumela cwalo?— Jesu ha n’a li kwa mukiti o mutuna kwa ndu ya Mufalisi, n’a talimisisize batu ha ne ba nze ba iketela lipula za bona.  Kana wena u bona kuli haki ya tabela ze lu eza ni kacenu?— Jesu cwale h’a li kwa lihalimu, kaniti u mwa sibaka se sinde sa ku lu talimisisa.

Mutu h’a lika ku ba wa pili, kwa kona ku tahisa butata. Hañata, ku banga likañi, mi batu ba nyemanga. Fokuñwi, ku ezahalanga cwalo banana ha ba kenanga hamoho mwa mbasi. Munyako wa mbasi u sa kwalulwa fela, banana ba mata kuli ba be ba pili. Ba bata maino a pili, ona a’ li bukaufi ni mawindo. Ku kona ku ezahalañi cwale?— Ba kona ku nyemelana.

Ku bata ku ba wa pili ku kona ku tahisa matata a mañata. Mane ne ku tahisize butata kwa baapositola ba Jesu. Sina ha ne lu itutile mwa Kauhanyo 6 ya buka ye, ne ba kananile ka za kuli ya kutekeha hahulu ku bona ki mañi. Jesu n’a ezizeñi cwale?— N’a ba hakuluzi. Kono hape ba ba ni kañi ye ñwi. Ha lu bone mo ne i kalezi.

 Baapositola, hamoho ni ba bañwi, ne ba li mwa musipili wa mafelelezo ni Jesu wa ku ya kwa muleneñi wa Jerusalema. Jesu n’a sweli ku bulela ni bona ka za Mubuso wa hae, kacwalo, bo Jakobo ni Joani ne ba sweli ku nahana ka za ku busa ni yena. Mane ne se ba bulezi ni m’a bona, yena Salome, ka za teñi. (Mateu 27:56; Mareka 15:40) Kacwalo, ha ba nze ba libile kwa Jerusalema, Salome a taha ku Jesu, a kubama fapil’a hae, mi a mu kupa nto ye ñwi.

Jesu u mu buza kuli: “U batañi?” A alaba kuli u kupa kuli Jesu a lumeleze bana ba hae ku ina kwatuko a hae mwa Mubuso wa hae, yo muñwi ku la bulyo ni yo muñwi ku la nzohoto la hae. Ka m’o bonela wena, baapositola ba bañwi ba 10 ne ba ikutwile cwañi ha ne ba utwile zeo bo Jakobo ni Joani ne ba bulelezi m’a bona ku yo ba kupela?—

Ne ba nyemezi hahulu bo Jakobo ni Joani. Kacwalo, Jesu a fa baapositola  ba hae kaufela kelezo ye nde. Jesu a ba bulelela kuli babusi ba macaba ba lata ku ba ba batuna, ba ba kutekeha. Ba bata ku ba ni situlo se situna, ilikuli mañi ni mañi a ba utwe. Kono Jesu a bulelela balateleli ba hae kuli ne ba sa lukeli ku ba cwalo. Ka ku fapahana, Jesu u li: ‘Ya lata ku ba wa pili, ibe yena mutang’a mina.’ Nahana fela za teñi!—Mateu 20:20-28.

Kana wa ziba s’a ezanga mutanga?— U sebeleza batu ba bañwi, a sa libeleli ku sebelezwa ki ba bañwi. U nganga sibaka sa mafelelezo, isiñi sa pili. U ezanga sina wa mafelelezo, isiñi sina ya kutekeha hahulu. Mi u si libali kuli Jesu n’a ize yena ya bata ku ba wa pili u lukela ku eza sina mutanga ku ba bañwi.

Kacwalo, ka m’o bonela wena, seo si talusañi ku luna?— Kana mutanga n’a ka kanana ni mulen’a hae ka za ya ka nga sibaka se sinde ka ku fitisisa? Kamba kana n’a ka kanana ka za kuli ki mañi ya n’a ka ca pili? Wena u bona cwañi?— Jesu n’a talusize kuli mutanga kamita u beyanga mulen’a hae kwapil’a hae.—Luka 17:7-10.

Kacwalo, ku fita ku bata ku ba wa pili, lu lukela ku ezañi?— Lu lukela ku ba sina batanga ba ba bañwi. Mi f’o ku talusa kuli lu beya ba bañwi kwapil’a luna. Ku talusa ku nga kuli ba bañwi ba kutekeha hahulu ku lu fita. Kana ku na ni mo kuñwi m’o bona wena kuli wa kona ku beya ba bañwi mwa sibaka sa pili?— Ha ku apule fa makepe 40 ni 41 mi u bone hape mo kuñwi mo u kona ku beela ba bañwi mwa sibaka sa pili ka ku ba sebeleza.

U ka hupula kuli Muluti yo Mutuna n’a beile ba bañwi kwapili ka ku ba sebeleza. Busihu bwa mafelelezo bwa n’a bile ni baapositola ba hae, mane n’a kubami ni ku tapisa mahutu a bona. Haiba ni luna lu beya ba bañwi kwapili ka ku ba sebeleza, lu ka be lu tabisa Muluti yo Mutuna ni Ndat’ahe, yena Jehova Mulimu.

Ha lu bale mañolo a mañwi a mwa Bibele a lu susueza ku beya ba bañwi kwapil’a luna: Luka 9:48; Maroma 12:3; ni Mafilipi 2:3, 4.

[Siswaniso se si fa likepe 107]

Kana u kile wa bona batu ba ba bata ku ba ba pili?

[Maswaniso a fa likepe 109]

Jesu n’a luta tuto mañi ha n’a kandekile likande la batu be ne ba bata ku ba mwa lipula ze nde ka ku fitisisa, kamba za pili?

[Siswaniso se si fa likepe 110]

Salome u kupañi ku Jesu, mi ku zwañi mwateñi?