Kauhanyo 21

Kana Lwa Swanela Ku Ikutwisisa?

KU IKUTWISISA ku talusañi? Kana wa ziba se ku talusa?— Ki o mutala. Kana u kile wa lika ku eza nto ye ñwi y’o sa zibi hande ku eza? Mwendi n’o likile ku laha mbola. Kamba mwendi n’o likile ku tengenya sikala sa mezi fa toho. Kana mutu yo muñwi n’a ku sehile ni ku bulela kuli: “Na kona ku eza cwalo hande ku ku fita”?— Mutu y’o n’a ikutwisisa.

U ikutwanga cwañi ba bañwi ha ba ezanga cwalo? Kana wa ikutwanga hande?— Kacwalo, ka m’o bonela wena, ba bañwi ba ikutwanga cwañi wena ha u ikutwisisa?— Kana ki ko kunde ku bulelela mutu kuli, “Na ku fita”?— Kana Jehova wa tabela batu ba ba ezanga cwalo?—

Muluti yo Mutuna n’a ziba batu be ne ba ikutwa kuli ki ba bande ku fita ba bañwi. Ne ba ikutwisisa, kamba ku itumba, ni ku kenda ba bañwi. Kacwalo, zazi le liñwi Jesu a ba kandekela likande kuli a ba bonise kuli ku ikutwisisa ku fosahezi. Ha lu teeleze kwa likande leo.

Likande leo li bulela za Mufalisi ni mutelisi. Bafalisi ne ba li baluti ba za bulapeli, mi ne ba ezanga inge ba ba lukile kamba ba ba kenile ku fita batu ba bañwi. Mufalisi wa mwa likande la Jesu n’a il’o lapela kwa tempele ya Mulimu mwa Jerusalema.

Jesu n’a ize mutelisi ni yena n’a il’o lapela kwa tempele. Batu ba bañata ne ba sa lati batelisi. Ne ba ikutwa kuli batelisi ne ba sweli ku lika ku ba uzweza. Mi ki niti kuli batelisi ba bañata kamita ne ba sa sepahali.

Kwa tempele, Mufalisi a kalisa ku lapela ku Mulimu, a li: ‘Oho  Mulimu, na itumela ku wena kuli ha ni muezalibi sina batu ba bañwi. Ha ni pumangi batu kamba ku eza lika ze ñwi ze maswe. Ha ni swani ni mutelisi yale fale. Ni mutu ya lukile. Na itimanga lico habeli ka viki ilikuli ni be ni nako ye ñata ya ku nahana za hao. Mi ni fanga kwa tempele sa bulishumi kaufela se ni fumana.’ Mufalisi y’o luli n’a nahana kuli n’a fita ba bañwi, nji cwañi?— Mi hape n’a bulelezi Mulimu ka za teñi.

Kono mutelisi n’a si cwalo. Mane n’a si ka talima kwa lihalimu ha n’a lapela. N’a yemi cwalo kwahule inz’a inamisize toho. Mutelisi y’o n’a swabile hahulu ka za libi za hae, mi n’a inata fa sifuba ka ku swaba. N’a si ka lika ku bulelela Mulimu ka za bunde bwa hae. Kono n’a lapezi kuli: ‘Mulimu, u ni shemube, na muezalibi.’

Ki ufi kwa banna ba babeli bao y’o bona kuli n’a tabisize Mulimu? Kana n’e li Mufalisi, ya n’a ipona ku ba yo munde? Kamba kana n’e li mutelisi, ya n’a swabile bakeñisa libi za hae?—

Jesu n’a ize mutelisi n’e li yena ya n’a tabisize Mulimu. Libaka? Jesu n’a talusize kuli: ‘Kakuli mutu kaufela ya lika ku ipahamisa ku fita ba bañwi u ka kokobezwa. Kono yena ya ipona kuli u kwatasi u ka huliswa.’—Luka 18:9-14.

Jesu n’a luta tuto mañi mwa likande leo?— N’a luta tuto ya kuli ha ku si ka luka ku ikutwa kuli lu ba bande ku fita ba bañwi. Lu kana lwa sa buleli kuli ki mona mo lu ikutwela cwalo, kono ka  likezo za luna, lu kona ku bonisa kuli ki mona mo lu ikutwela cwalo. Kana u kile wa eza cwalo?— Nahana ka za muapositola Pitrosi.

Jesu ha n’a bulelezi baapositola ba hae kuli kaufel’a bona ne ba ka mu siya ha n’a ka tamiwa, Pitrosi a itumba, a li: ‘Ba bañwi kaufela niha ne ba ka ku siya, na ha ni na ku ku siya!’ Kono Pitrosi f’o n’a sa buleli niti. N’a ikutwisisa hahulu. N’a siile Jesu. Kono n’a kutile, sina ha lu ka bala ka za teñi mwa Kauhanyo 30 ya buka ye.—Mateu 26:31-33.

Ha lu nge mutala wa mwa mazazi a cwale. Mwendi wena ni y’o kena ni yena sikolo mu sweli mwa buziwa lipuzo ze ñwi kwa sikolo. Ku cwañi haiba wa kona ku fa kalabo honaf’o, kono muituti yo muñwi y’o h’a koni ku eza cwalo? Kaniti, wa ikutwa hande ha u ziba likalabo. Kono kana ne ku ka ba hande ha n’o ka ibapanya ni ya sa alabi kapili?— Kana ku lukile ku lika ku iponisa kuli u fita yo muñwi ka ku mu utwisa bumaswe?—

Mufalisi y’o n’a ezize honacwalo. N’a itumba kuli n’a li yo munde ku fita mutelisi. Kono Muluti yo Mutuna n’a ize Mufalisi y’o n’a fosize. Ki niti kuli mutu yo muñwi wa kona ku eza hande nto ye ñwi ku fita yo muñwi. Kono f’o ha ku talusi kuli yena ki yo munde luli ku fita ba bañwi.

Kacwalo, haiba lu ziba ze ñata ku fita mutu yo muñwi, kana lwa swanela ku ikutwisisa?— Nahana ka za teñi. Kana ki luna lu ikezelize booko bwa luna?— Kutokwa, Mulimu ki yena ya file mañi ni mañi wa luna booko. Mi buñata bwa lika ze lu ziba lu itutile zona ku yo muñwi. Mwendi ne lu balile lika mwa buka. Kamba mwendi mutu yo muñwi n’a lu bulelezi zona. Niha lu fumana kalabo kwa nto ye ñwi ka i li luna, lu i fumani cwañi?— Ki ka ku itusisa booko bw’a lu file Mulimu.

Mutu h’a sebeza ka t’ata, ki ko kunde ha n’o ka mu bulelela nto ye ñwi ye ka mu tabisa. U mu bulelele kuli wa tabela z’a ezize. Mwendi  mane wa kona ku mu tusa ku i eza hande hahulu. Ni wena u bata kuli batu ba ezange cwalo ku wena, nji cwañi?—

Batu ba bañwi ba tiile ku fita ba bañwi. Ku cwañi haiba u tiile ku fita munyan’a hao? Kana wa swanela ku ikutwisisa?— Kutokwa. Ki lico ze lu ca ze lu tiisa. Mi Mulimu u fa lizazi ni pula ni ze ñwi kaufela ze tokwahala kuli lico li mele, nji cwañi?— Kacwalo he, Mulimu ki yena ye lu lukela ku itumela ku yena ha lu ba ba ba tiile.—Likezo 14:16, 17.

Ha ku na ni yo mukana ku luna ya n’a ka tabela ku utwa mutu ya ikutwisisa, nji cwañi?— Lu si libali za n’a bulezi Jesu ha n’a ize: ‘Hona mo mu batela batu ba bañwi ku mi ezeza, ni mina mu ba eze cwalo.’ Ha lu eza cwalo, ni kamuta ha lu na ku ba sina Mufalisi ya n’a ikutwisisa yani wa mwa likande la n’a kandekile Muluti yo Mutuna.—Luka 6:31.

Zazi le liñwi, mutu yo muñwi n’a bizize Jesu kuli yo munde. Kana Muluti yo Mutuna n’a ize, ‘Ee, ni yo munde’?— Kutokwa, n’a si ka bulela cwalo. Kono n’a ize: “Yo munde h’a yo, konji Mulimu  a nosi.” (Mareka 10:18) Muluti yo Mutuna niha n’a li ya petehile, n’a si ka ikutwisisa. Kono n’a file tumbo kaufela ku Ndat’ahe, yena Jehova.

Kacwalo, kana ku na ni ye lu kona ku itumba ka za hae?— Ee. Lwa kona ku itumba ka za Mubupi wa luna, yena Jehova Mulimu. Ha lu bona lizazi li bonahala hande ha li likela, kamba ku bona lika ze ñwi ze makaza ze bupilwe, lwa kona ku bulelela mutu kuli, ‘Mulimu wa luna yo munde, yena Jehova, ki yena ya ezize nto ye!’ Kamita lu be ba ba itukiselize ku bulela ka za lika ze tuna za s’a ezize kale Jehova ni z’a ka eza kwapili.

U bale z’a bulela Mañolo ka za ku ikutwisisa, kamba ku itumba, mi u itute mo lu lukela ku tokolomohela ku ikutwisisa: Liproverbia 16:5, 18; Jeremia 9:23, 24; 1 Makorinte 4:7; ni 13:4.

[Siswaniso se si fa likepe 113]

Ki kabakalañi Mulimu ha n’a tabezi mutelisi mi isiñi Mufalisi?

[Siswaniso se si fa likepe 115]

Ha u ziba lika ze ñwi ku fita yo muñwi, kana ku ku bisa yo munde ku fita mutu y’o?

[Siswaniso se si fa likepe 115]

Ki kabakalañi ha ku fosahezi ku ikutwisisa ha lu li ba ba tiile ku fita mutu yo muñwi?

[Siswaniso se si fa likepe 116]

Ki lifi z’a itumba mushimani y’o?