Kauhanyo 11

Ku Tusiwa Ki Mangeloi A Mulimu

BATU ba bañwi ba bulela kuli ba lumela fela ze ba bona. Kono bo ki butoto. Ku na ni lika ze ñata za luli ze lu si ka bona kale fateñi. Kana wa kona ku bulela i liñwi ku zona?—

Ku cwañi ka za moya o lu buyela? Kana lwa kona ku u utwa?— Ha ku nge lizoho la hao, mi u fute mwateñi. Kana ku na ni z’o utwile?— Ee, kono ha u koni ku bona moya, nji cwañi?—

Se lu bulezi kale za batu ba moya, be lu sa koni ku bona. Lu itutile kuli ba bañwi ku bona ki ba bande, kono ba bañwi ki ba ba maswe. Ki bafi batu ba moya ba bande be u ziba be lu sa koni ku bona?— Ku na ni Jehova Mulimu, Jesu, ni mangeloi a mande. Kana hape ku na ni mangeloi a maswe?— Bibele i li a teñi. Ha ku ni bulelele z’o itutile ka za ona.—

Taba ye ñwi ye lu ziba kikuli mangeloi a mande ni a’ maswe ki a m’ata ku lu fita. Muluti yo Mutuna n’a ziba ze ñata ka za mangeloi. Libaka kikuli n’a li lingeloi a si ka pepwa kale sina mbututu fa lifasi. N’a pilile ni mangeloi a mañwi mwa lihalimu. N’a ziba a mañata-ñata a ona. Kana mangeloi ao kaufela a na ni mabizo?—

Lu itutile kuli Mulimu na beile linaleli mabizo. Kacwalo, lwa kona ku kolwa kuli mangeloi kaufela ni ona a na ni mabizo. Mi lwa ziba kuli a ambolisana kakuli Bibele i lu bulelela za ‘puo ya mangeloi.’ (1 Makorinte 13:1) Ka m’o bonela wena, ki lifi zeo mangeloi a bulelanga ka za teñi? Kana a bulelanga ka za luna fa lifasi?—

Lwa ziba kuli mangeloi a Satani, bona badimona, ba sweli ba lika ku lu tuhelisa ku utwa Jehova. Kacwalo, ba lukela ku bulela ka za  mo ba kona ku ezeza cwalo. Ba bata kuli lu be inge bona ilikuli Jehova a si ke a lu tabela sina h’a sa ba tabeli. Kono ku cwañi ka za mangeloi a Mulimu a sepahala? Kana u hupula kuli ni ona a lu bulelanga?— Ee. A bata ku lu tusa. Teeleza ni ku bulelele m’o mangeloi a mañwi a Mulimu n’a tuselize batu be ne ba lata Jehova ni ku mu sebeleza.

Ka mutala, ne ku na ni munna ya n’a bizwa Daniele ya n’a pila mwa Babilona. Batu ba bañata ba mwa muleneñi w’o ne ba sa lati Jehova. Mane batu ne ba tomile mulao wa kuli mutu kaufela ya ka lapela ku Jehova Mulimu a fiwe koto. Kono Daniele n’a si ke a tuhela ku lapela ku Jehova. Kana wa ziba se ne ba ezize ku Daniele?—

Batu ba ba maswe ne ba tahisize kuli Daniele a nepelwe mwa musima wa litau. Teñi, Daniele n’a li a nosi ni litau ze shwile tala. Kana wa ziba se ne si til’o ezahala?— Daniele n’a ize: ‘Mulimu u  lumile lingeloi la hae, mi li tibile milomo ya litau.’ N’a si ka holofazwa ni hanyinyani! Mangeloi a kona ku ezeza ba ba sebeleza Jehova lika ze nde.—Daniele 6:18-22.

Ku tuha f’o, Pitrosi nako ye ñwi n’a li mwa tolongo. U ka hupula kuli Pitrosi n’a li mulikan’a Muluti yo Mutuna, yena Jesu Kreste. Batu ba bañwi ne ba sa tabeli Pitrosi ha n’a ba bulelela kuli Jesu n’a li Mwan’a Mulimu. Kacwalo, ba beya Pitrosi mwa tolongo. Masole ne ba sweli ku libelela Pitrosi ilikuli a si ke a mata. Kana ne ku na ni ya n’a kona ku mu tusa?—

Pitrosi n’a itobalezi fahal’a balibeleli ba babeli, mi n’a tamilwe  mawenge kwa mazoho. Kono Bibele i li: ‘A mu bone! Lingeloi la Jehova la taha, mi liseli la benya mwa tolongo. La swala Pitrosi, mi la mu zusa, la li: Zuha kapili!’

Honaf’o, mawenge a Pitrosi a wa kwa mazoho a hae! Mi lingeloi leo la li ku yena: ‘Ha ku apale liapalo, u tine likatulo za hao, mi u ni latelele.’ Balibeleli bao ne ba sa koni ku ba tibela kakuli lingeloi ne li sweli ku tusa Pitrosi. Cwale ba taha kwa munyako wa sipi, mi kwa ezahala nto ye ñwi ye makaza. Munyako w’o wa kwaluha ili ona! Lingeloi leo ne li lukuluzi Pitrosi ilikuli a zwelepili ku kutaza.—Likezo 12:3-11.

Kana mangeloi a Mulimu a kona ku lu tusa ni luna?— A kona. Kana f’o ku talusa kuli ni kamuta h’a na ku lu tuhelela kuli lu holofale?— Kutokwa, mangeloi h’a lu silelezi kwa ku holofala ha lu eza lika ze ñwi za butoto. Kono niha lu sa ezi lika za butoto, lu sa kona ku holofala. Mangeloi h’a si ka bulelelwa ku tibela lika zeo kuli li si ke za ezahala. Kono Mulimu u a file musebezi o mutuna kuli a u eze.

Bibele i bulela za lingeloi le liñwi le li bulelela batu kai ni kai kuli ba lapele Mulimu. (Sinulo 14:6, 7) Lingeloi leo li ba bulelela cwañi cwalo? Kana la huweleza ku zwelela kwa lihalimu ilikuli mañi ni mañi a li utwe?— Kutokwa, ku talusa kuli balateleli ba Jesu fa lifasi ba kona ku ambola ni ba bañwi ka za Mulimu, mi mangeloi a ba etelela mwa musebezi wa bona. Mangeloi a bona teñi kuli batu ba ba bata luli ku ziba za Mulimu ba fiwa nako ya ku utwa. Lwa kona ku abana mwa musebezi wa ku kutaza, mi mangeloi a ka lu tusa.

Kono ku cwañi haiba batu ha ba lati Mulimu mi ba lu kataza? Ku cwañi haiba ba lu beya mwa tolongo? Kana mangeloi n’a ka lu lukulula?— A kona ku eza cwalo. Kono haki kamita a ezanga cwalo.

Paulusi, mulateleli wa Jesu, muta o muñwi n’a li mwa tolongo. N’a li mwa musipili ka sisepe, mi ne ku fuka moya o mutuna. Kono mangeloi n’a si ka mu lukulula honaf’o. Libaka kikuli ne ku na ni batu  ba bañwi be ne ba tokwa ku utwa za Mulimu. Lingeloi le liñwi ne li ize: “Si sabi Paulusi, u na ni ku y’o yema fapil’a Sesare.” Ee, Paulusi n’a na ni ku iswa ku Sesare, ya n’a li mubusi wa lifasi, ilikuli Paulusi a y’o kutaza ku yena. Mangeloi kamita n’a ziba kwa n’a li Paulusi, mi n’a mu tusanga. Ni luna a ka lu tusa haiba luli lu sebeleza Mulimu.—Likezo 27:23-25.

Ku na ni musebezi o muñwi o mutuna o a ka eza mangeloi, mi a ka tuha a u eza honafa. Nako ya Mulimu ya ku bulaya batu ba ba maswe i fakaufi hahulu. Batu kaufela ba ba sa lapeli Mulimu wa niti ba ka bulawa. Ba ba bulela kuli ha ba lumeli kuli mangeloi a teñi kakuli ha ba koni ku a bona ba ka t’o lemuha kuli ne ba fosize.—2 Matesalonika 1:6-8.

Seo si ka talusañi ku luna?— Haiba lu kwa lineku la mangeloi a Mulimu, a ka lu tusa. Kono kana lu kwa lineku la ona?— Haiba lu sebeleza Jehova, lu kwa lineku la ona. Mi haiba lu sebeleza Jehova, lu ka bulelelanga ba bañwi kuli ni bona ba mu sebeleze.

Kuli u itute ze ñwi ka za m’o mangeloi a amela bupilo bwa batu, u bale Samu 34:7; Mateu 4:11; 18:10; Luka 22:43; ni Likezo 8:26-31.

[Siswaniso se si fa likepe 63]

Mulimu n’a ezizeñi kuli a pilise Daniele?

[Siswaniso se si fa likepe 64]

Lingeloi ne li tusize cwañi Pitrosi kuli a zwe mwa tolongo?

[Siswaniso se si fa likepe 66]

Lingeloi li bulelelañi Paulusi?