Kauhanyo 23

Libaka Batu Ha Ba Kulanga

KANA ku na ni y’o ziba ya kula?— Mwendi wena luli wa kulanga fokuñwi. Wa kona ku kula libelenge, kamba ku nyapa mwa mba. Batu ba bañwi ba kula hahulu. Mane ha ba koni ku yema ku si na ya ba tusa. Ku ezahalanga cwalo hañata batu ha ba supala.

Mutu ni mutu wa kulanga ka linako ze ñwi. Kana wa ziba libaka batu ha ba kulanga, ku supala, ni ku shwa?— Zazi le liñwi munna ya n’a sa koni ku zamaya ha n’a tisizwe ku Jesu, Jesu n’a bonisize libaka batu ha ba kulanga ni ku shwa. Teeleza ni ku kandekele ka za teñi.

Jesu n’a fitezi mwa ndu ye ñwi mwa munzi o muñwi o n’o li bukaufi ni Liwate la Galilea. Batu ba bañata ba taha ku t’o mu bona. Ne ku tile batu ba bañata hahulu kuli mane ba bañwi ne ba sa koni ku kena mwa ndu. Ne ku si na nihaiba a li muñwi ya n’a kona ku sutelela kwa munyako wa ndu. Kono batu ba zwelapili ku taha ka buñata! Sikwata se siñwi sa batu sa tisa mutu ya n’a omelezi luñañali ya n’a sa koni mane ni ku zamaya. Ne ku tokwiwa banna ba bane ku mu shimba fa kambeta, kamba bulobalo.

Kana wa ziba libaka ha ne ba bata ku tisa munna y’o ya kula ku Jesu?— Ne ba na ni tumelo ya kuli Jesu n’a kona ku mu tusa. Ne ba lumela kuli Jesu n’a kona ku mu folisa. Kana wa ziba mo ne ba ezelize kuli ba fitise munna y’o ya n’a omelezi luñañali ku Jesu niha ne ku tezi batu cwalo mwa ndu?—

Siswaniso s’o bona f’o si bonisa mo ne ba ezelize cwalo. Pili, ne ba pahamisize munna y’o fa situwa sa ndu yeo. N’e li situwa se si patami. Kihona ba punya lisuba le lituna fa situwa. Cwale, fona fo ku  punyizwe f’o, ba shulumuseza bulobalo fo ne ku lobezi munna y’o ya n’a kula. Ne ba na ni tumelo ye tiile luli!

Batu kaufela be ne ba inzi mwa ndu ne ba komokile ha ne ba boni se ne si ezahala. Munna ya n’a omile luñañali n’a shulumukiselizwe mwahal’a bona luli. Kana Jesu n’a nyemile ha n’a boni ze ne ba ezize banna bao?— Kutokwa ni hanyinyani! N’a tabile ku bona kuli ne ba na ni tumelo. A bulelela munna y’o ya n’a omelezi luñañali kuli: ‘Libi za hao li swalezwi.’

Batu ba bañwi kiha ba ikutwa kuli ne ku si ka luka kuli Jesu a bulele cwalo. Ne ba sa ikutwi kuli n’a kona ku swalela libi. Kacwalo, kuli a bonise kuli luli n’a kona ku swalela libi, Jesu a  bulelela munna y’o kuli: “Nanuha, u nge bulobalo bwa hao, mi u ikele mwa ndu ya hao.”

Jesu ha s’a bulezi cwalo, munna y’o a fola! N’a si ka kutela hape ku omelela luñañali. Cwale n’a kona ku zuha ka i li yena ni ku zamaya. Batu be ne ba boni makazo yeo ne ba komokile. Ba li ku pepwa ba sa boni nto ye komokisa sina yeo! Ne ba lumbile Jehova ka ku ba fa Muluti yo Mutuna y’o, ya n’a kona ku folisa batu kwa matuku a bona.—Mareka 2:1-12.

Lu itutañi kwa makazo yeo?— Lu ituta kuli Jesu u na ni m’ata a ku swalela libi ni ku folisa batu ba ba kula. Kono hape lu ituta nto ye ñwi, ili nto ya butokwa hahulu. Lu ituta kuli batu ba kulanga kabakala sibi.

Bakeñisa kuli kaufel’a luna lwa kulanga fokuñwi, kana ku talusa kuli kaufel’a luna lu baezalibi?— Ee, Bibele i bulela kuli kaufel’a luna lu pepilwe mwa sibi. Kana wa ziba se ku talusa ku pepiwa mwa sibi?— Ku talusa kuli lu pepilwe lu si ka petahala. Fokuñwi lu ezanga lika ka mafosisa, niha lu sa lati ku li eza. Kana wa ziba mo ne ku tezi kuli kaufel’a luna lu be ni sibi?—

Ne lu bile ni sibi kakuli mutu wa pili, yena Adama, n’a si ka utwa Mulimu. N’a ezize sibi ha n’a lobile mulao wa Mulimu. Mi kaufel’a luna ne lu ngile sibi ku Adama. Kana wa ziba m’o kaufel’a luna ne lu ngezi sibi ku yena? Teeleza ni like ku ku taluseza ka nzila ye u kona ku utwisisa.

Mwendi u kile wa bona mutu ya besa sinkwa mwa pani. Ki sifi se  si ka ezahala kwa sinkwa haiba pani i mbobezi? Kana wa ziba?— Ona ku mbobela k’o ku ka bonahala fa sinkwa ni sinkwa s’o ka eza mwa pani yeo, nji cwañi?—

Adama n’a swana ni pani yeo, mi luna lu swana ni sinkwa. N’a bile ya si ka petahala ha n’a lobile mulao wa Mulimu. Ne ku swana inge kuli n’a mbobezi, kamba ku ba ni liswayo le li maswe. Kacwalo, ha n’a bile ni bana, ne ba ka ba cwañi?— Bana ba hae kaufela ni bona ne ba ka ba ni lona liswayo leo la ku sa petahala.

Banana ba bañata ha ba pepiwangi ba na ni ku sa petahala ko kutuna ko u kona ku bona. Ha ba si ka pumeha lizoho kamba lihutu. Kono ku sa petahala kwa bona ki ko kutuna kuli mane ba kona ku kalisa ku kula mi, nako ha i nze i ya, ni ku shwa.

Ki niti kuli batu ba bañwi ba kulanga hahulu ku fita ba bañwi. Ki kabakalañi ha ku li cwalo? Kana ki ka libaka la kuli ba pepilwe ba na ni sibi hahulu?— Kutokwa, mutu ni mutu u pepilwe a li muezalibi. Kaufel’a luna lu pepilwe lu si ka petahala. Kacwalo, nako ha i nze i ya, mutu ni mutu u ka kula butuku bo buñwi. Mane niheba batu ba ba lika ku utwa milao kaufela ya Mulimu ili ba ba sa ezangi ze maswe ba kona ku kula.

Kacwalo, kiñi batu ba bañwi ha ba kulanga hañata-ñata ku fita ba bañwi?— Ku na ni mabaka a mañata. Mwendi ha ba na lico ze likani za ku ca. Kamba mwendi ha ba ci lico ze swanela. Mwendi ba ca maswiti a mañata hahulu. Libaka le liñwi hape ikana ya ba kuli ba tonanga hahulu busihu mi ha ba fumanangi nako ye likani ya ku lobala. Kamba mwendi ha ba tinangi liapalo ze futumala ha ba li  fande ha ku bata. Mibili ya batu ba bañwi i fokola hahulu, mi ha ba koni ku itakeleza kwa matuku, niha ne ba ka lika ku ipabalela.

Kana ku ka ba ni nako fo lu si ke lwa kulanga? Kana muta o muñwi lu ka lukululwa kwa sibi?— Jesu n’a ezizeñi ku munna ya n’a omelezi luñañali yani?— Jesu n’a swalezi libi za hae ni ku mu folisa. Ka nzila yeo, Jesu n’a bonisize z’a ka eza zazi le liñwi kuli a tuse batu kaufela ba ba lika ka t’ata ku eza ze lukile.

Ha lu bonisa kuli ha lu lati ku eza sibi ni ku bonisa kuli lu toile se si fosahezi, Jesu u ka lu folisa. Kwapili, u ka felisa ku sa petahala kwa luna kaufela kwa cwale. U ka eza cwalo ka ku ba Mulena wa Mubuso wa Mulimu. Sibi ha si na ku zwisiwa ku luna ka nako i liñwi fela. Si kana si zwisiwa nako ha i nze i ya. Mi sibi kaufela ha se si felile, ha lu sa na ku kula hape. Kaufel’a luna lu ka iketa hande. Yeo ikaba nako ye nde luli!

Ka za litaba ze ñwi ze bonisa m’o sibi si amela batu kaufela, u bale Jobo 14:4; Samu 51:5; Maroma 3:23; 5:12; ni 6:23.

[Siswaniso se si fa likepe 123]

Jesu n’a bulelezi munna ya n’a omelezi luñañali ku ezañi?

[Siswaniso se si fa likepe 124]

Lu itutañi kwa makazo ye?

[Siswaniso se si fa likepe 125]

Ne ku tile cwañi kuli kaufel’a luna lu be ni sibi?

[Siswaniso se si fa likepe 126]

Lu ka ba cwañi sibi sa luna ha se si felisizwe?