Kauhanyo 48

Lifasi Le Linca La Mulimu La Kozo—mo U Kona Ku Pilela Teñi

MULIMU n’a beile bo Adama ni Eva mwa simu ya Edeni. Nihaike ne ba ipanguzi ku yena mi ba shwa, Mulimu u konisize kuli bana ba bona, hamohocwalo ni luna, lu pile ku ya ku ile mwa Paradaisi. Bibele i sepisa kuli: “Ba ba na ni niti ba ka yola sanda sa naha, ni ku [pila] mwateñi ku ya ku ile.”—Samu 37:29.

Bibele i bulela ka za “mahalimu a manca” ni “lifasi le linca.” (Isaya 65:17; 2 Pitrosi 3:13) “Mahalimu” a cwale a talusa milonga ya kacenu ya batu, kono Jesu Kreste ni ba ba busa ni yena kwa lihalimu ba ka ba “mahalimu a manca.” Ku ka tabisa luli mahalimu a manca, ili mulonga o lukile wa kozo wa Mulimu, ha u ka busa lifasi kamukana!

Cwale “lifasi le linca” lona ki nto mañi?— Lifasi le linca ikaba batu ba bande ba ba lata Jehova. Wa bona, Bibele ha i bulela za “lifasi le linca,” fokuñwi i talusa batu ba ba pila fa lifasi, isiñi lona lifasi luli. (Genese 11:1; Samu 66:4; 96:1) Kacwalo, batu ba ba ka ba lifasi le linca ba ka pila ona fa lifasi fa.

Lifasi la kacenu la batu ba ba maswe ha li sa na ku ba teñi. U si libali kuli Munda wa mwa miteñi ya Nuwe n’o bulaile lifasi le li maswe la batu. Mi sina ha se lu itutile, lifasi le li maswe le, li ka sinyiwa fa Armagedoni. Ha lu bone cwale mo ku ka bela ku pila mwa lifasi le linca la Mulimu hamulaho wa Armagedoni.

 Kana wa lata ku pila ku ya ku ile mwa Paradaisi mwa lifasi le linca la Mulimu la kozo?— Ha ku na dokota ya kona ku lu konisa ku pila ku ya ku ile. Ha ku na mulyani o kona ku lu sileleza kwa lifu. Nzila i nosi yeo ka yona lu kona ku pila ku ya ku ile ki ka ku sutelela ku Mulimu. Mi Muluti yo Mutuna u lu bulelela mwa ku ezeza cwalo.

Ha lu nge Libibele za luna mi lu apule kwa Joani kauhanyo 17, timana 3. Kwateñi lu fumana manzwi a Muluti yo Mutuna a, a li: “Bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.”

Kacwalo, Jesu n’a bulezi kuli lu tokwa ku ezañi kuli lu pile ku ya ku ile?— Pili, lu lukela ku ba ni zibo ya ku ziba Ndat’a luna wa kwa lihalimu, Jehova, ni ya ku ziba Mwan’a hae, yena ya n’a itombozi bupilo bwa hae bakeñisa luna. F’o ku talusa kuli lu tokwa ku ituta Bibele. Buka ye, ya Itute ku Muluti Yo Mutuna, i sweli ku lu tusa ku eza cwalo.

Kono ku ituta ka za Jehova ku ka lu tusa cwañi ku pila ku ya ku ile?— Sina ha lu tokwa sico ka zazi, lu tokwa ku ituta za Jehova ka zazi. Bibele i li: “Mutu h’a na ku pila buhobe fela, kono u ka pila ni ona manzwi kaufela a’ zwa mwa mulomo wa Mulimu.”—Mateu 4:4.

Hape lu tokwa ku ba ni zibo ya ku ziba Jesu Kreste kakuli Mulimu n’a lumile Mwan’a hae kuli a t’o felisa sibi sa luna. Bibele i li: “Ku piliswa, ha ku yo ku yo muñwi.” Mi Bibele hape i li: “Ya lumela ku Mwana u na ni bupilo bo bu sa feli.” (Likezo 4:12; Joani 3:36) Cwale, ‘ku lumela’ ku Jesu ku talusañi?— Ku talusa kuli luli lwa lumela ku Jesu ni ku ziba kuli ha lu koni ku pila ku ya ku ile konji ka yena. Kana lwa lumela taba yeo?— Haiba lwa lumela, lu ka zwelapili ku ituta ku Muluti yo Mutuna ka zazi, mi lu ka eza z’a lu bulelela.

 Nzila ye ñwi ye nde yeo ka yona lu kona ku ituta ku Muluti yo Mutuna ki ka ku kuta-kutela ku bala buka ye ni ku buha maswaniso kaufela ni ku a nahanisisa. U like ku alaba lipuzo ze zamaelela ni ona maswaniso ao. Hape, u bale buka ye ni bom’aho kamba ni bondat’aho. Haiba bashemi ba hao ha ba yo, u i bale ni ba bahulu ba bañwi ni banana ba bañwi. Kana ne ku si ke kwa tabisa ha n’o ka tusa ba bañwi ku ituta ku Muluti yo Mutuna ze ba tokwa ku eza kuli ba pile ku ya ku ile mwa lifasi le linca la Mulimu?—

Bibele i lu bulelela kuli: “Lifasi la fela.” Kono cwale Bibele i talusa mo lu kona ku pilela ku ya ku ile mwa lifasi le linca la Mulimu. I li: “Ya eza tato ya Mulimu u ina ku ya ku ile.” (1 Joani 2:17) Kacwalo, lu kona ku pila cwañi ku ya ku ile mwa lifasi le linca la Mulimu?— Ki ka ku ba ni zibo ya ku ziba Jehova ni Mwan’a hae ya latwa, yena Jesu. Kono hape lu lukela ku eza ze lu ituta. Haike ku ituta buka ye ku ku tuse ku eza lika ze.

 [Mbokisi/Siswaniso se si fa likepe 251]

Ha u nze u bala Isaya 11:6-9 ni Isaya 65:25, u ituta ka za ku pila mwa kozo kwa lifolofolo. Ha ku bone maswaniso a. Ha ku bone ngunyana, mwan’a puli, ngwe, namani, tau ye tuna, ni banana ba ba inzi ni zona. Kana wa kona ku bulela mabizo a lifolofolo ze ñwi ze bulelwa mwa Bibele?— Bona mushimani yani y’a bapala ni mbumbe! Ha ku na ya pila mwa lifasi le linca ya ka ba ni sabo. (Hosea 2:18) U nahanañi ka za taba yeo?—

 [Mbokisi/Maswaniso a fa likepe 252, 253]

Cwale, ha ku bone kozo ye ba na ni yona batu ba mifuta kaufela. Kaufel’a bona ba latana, sina Jesu ha n’a ize balateleli ba hae ne ba ka latana. (Joani 13:34, 35) Lilwaniso li sweli ku fetulwa ku ba lisebeliso za ku itusisa kwa ku babalela lifasi. Bibele i lu bulelela za kozo ni buiketo ze makaza zeo batu ba ka i kola mwa lifasi le linca la Mulimu. Lwa kona ku bala ka za teñi mwa mañolo a cwale ka Samu 72:7; Isaya 2:4; 32:16-18; ni Ezekiele 34:25.

 Ha ku bone batu ba ba fa likepe le. Ba sweli ba babalela lifasi, ili ku li bisa sibaka se sinde. Ha ku bone ndu ye nde ye ba sweli ku yaha ni litolwana ni miloho ye minde kaufela ye bonisizwe fa. Batu ba pila mwa kozo fa lifasi, kacwalo se li bile paradaisi sina simu ya Edeni. Lwa kona ku bala ka za lika ze makaza zeo kwa Samu 67:6; 72:16; Isaya 25:6; 65:21-24; ni Ezekiele 36:35.

 [Mbokisi/Siswaniso se si fa likepe 254]

Sina ha u kona ku bona fa, batu kaufela ba iketile mwa mubili mi ba tabile. Batu ba kona ku tula mwahalimu sina lizwii. Ha ku na sihole, sibofu, kamba mukuli. Mi ha ku bone batu bale ba ba zusizwe kwa bafu! Bibele i lu bulelela ka za zeo kwa Isaya 25:8; 33:24; 35:5, 6; Likezo 24:15; ni Sinulo 21:3, 4.