Kauhanyo 28

Mo U Kona Ku Zibela Y’o Lukela Ku Utwa

FOKUÑWI ku t’ata ku ziba ye lu lukela ku utwa. Mwendi bom’aho kamba bondat’aho ba ku bulelela ku eza nto ye ñwi. Kono cwale mwendi bo muluti kwa sikolo kamba mupokola ba ku bulelela ku sa eza mo ba ku bulelezi bashemi ba hao. Ha ne ku ka ezahala cwalo, ki mañi ku bona yo n’o ka utwa?—

Kwa makalelo mwa buka ye, mwa Kauhanyo 7, ne lu balile Maefese 6:1-3 mwa Bibele. Teñi, i bulela kuli bana ba lukela ku utwa bashemi ba bona. Liñolo leo li li: ‘Mu utwe bashemi ba mina ku Mulena.’ Kana wa ziba se ku talusa ku ba ‘ku Mulena’?— Bashemi ba ba li ku Mulena ba luta bana ba bona ku utwa milao ya Mulimu.

Kono batu ba bañwi ba bahulu ha ba lumeli kuli Jehova u teñi. Kacwalo, ku cwañi haiba yo muñwi wa bona a bulela kuli ku lukile ku kopisa ha u ñola litatubo kwa sikolo kamba k’u nga nto ye ñwi mwa sintolo u sa i lifeli? Kana kwa swanela kuli mwanana a pume kamba ku uzwa?—

U si libali kuli Mulena Nebukadenezare n’a laezi batu kaufela ku kubamela siswaniso sa gauda sa n’a ezize. Kono bo Shadrake, Meshake, ni Abedi-Nego ne ba si ka si kubamela. Kana wa ziba libaka?— Libaka kikuli Bibele i li batu ba lukela ku lapela Jehova a nosi.—Exoda 20:3; Mateu 4:10.

Jesu ha s’a shwile, baapositola ba hae ba tahiswa fapil’a Kuta ye Tuna ya bulapeli bwa Sijuda. Kayafa, Muprisita yo Mutuna, n’a ize: “Kikuli ha lu si ka mi laela hahulu kuli mu si ke mwa lutanga ka  Libizo [la Jesu]? Kanti mu tazize Jerusalema tuto ya mina.” Ki kabakalañi baapositola ha ne ba si ka utwa Kuta ye Tuna yeo?— Pitrosi, ka ku yemela baapositola ba bañwi kaufela, a alaba Kayafa, a li: “Ki swanelo kuli lu utwe Mulimu ku fita batu.”—Likezo 5:27-29.

Mwa miteñi yeo, ba bahulu ba bulapeli bwa Sijuda ne ba na ni m’ata a matuna. Kono naha ya bona ne i li mwatas’a puso ya mulonga wa Maroma. Mubusi wa mulonga w’o n’a bizwa kuli Sesare. Nihaike Majuda ne ba sa lati kuli Sesare a ba buse, mubuso wa Maroma n’o ezelize batu lika ze nde ze ñata. Mi mibuso ya kacenu ni yona i eza lika ze nde ze ñata ze tusa batu ba mwa linaha ze i busa. Kana wa ziba ze ñwi za lika zeo?—

Milonga i ezanga mikwakwa ya ku zamaya ku yona mi hape i lifa mapokola ni batimi ba mililo kuli ba lu sileleze. Mwendi hape ba kona ku lukiseza banana likolo ni ku babalela basupali. Muuso u sinyehelwa ki masheleñi kuli u eze lika zeo. Kana wa ziba k’o mulonga u fumana masheleñi ao?— U a fumana kwa batu. Masheleñi e ba tela batu kwa mulonga a bizwa kuli mitelo.

Muluti yo Mutuna ha n’a pilile fa lifasi, Majuda ba bañata ne ba  sa lati ku tela mitelo kwa mulonga wa Roma. Kacwalo, zazi le liñwi, baprisita ba itusisa banna ba bañwi kuli ba y’o buza Jesu ilikuli ba mu kenye mwa butata. Ne ba mu buzize puzo ye li: ‘Kana lwa swanela ku tela mutelo ku Sesare kamba kutokwa?’ Yeo ne i li puzo ya kalole. Jesu ha n’a ka alaba kuli, ‘Ee, mwa swanela ku tela mitelo,’ Majuda ba bañata ne ba si ke ba tabela za n’a ka bulela. Kono Jesu n’a sa koni ku bulela kuli, ‘Kutokwa, ha mu tokwi ku tela mitelo.’ Ku bulela cwalo neikaba ku fosa.

Kacwalo, Jesu n’a ezizeñi? N’a ize: ‘Ha mu ni bonise masheleñi a mutelo.’ Ba mu tiseza i liñwi, mi Jesu a ba buza, a li: ‘Siswaniso ni libizo ze fateñi ki za mañi?’ Ba alaba ba li: “Ki za Sesare.” Kacwalo, Jesu a li: “Kifohe, mu kutiseze Sesare z’e li za Sesare, mi mu zwiseze Mulimu, z’e li za Mulimu.”—Luka 20:19-26.

Ne ku si na niheba yo mukana ya n’a kona ku fumana mafosisa kwa kalabo ya n’a file. Haiba Sesare a ezeza batu lika, kwa swanela luli ku itusisa masheleñi a ezize Sesare kwa ku mu lifa kabakala lika zeo. Kacwalo, ka nzila yeo, Jesu n’a bonisize kuli kwa swanela ku tela mitelo kwa mulonga kabakala lika ze lu amuhela.

 Cwale, mwendi ha u si ka hula kuli u kone ku tela mitelo. Kono ku na ni nto ye ñwi y’o lukela ku fa kwa mulonga. Kana wa i ziba yona nto yeo?— Ki ku utwa milao ya mulonga. Bibele i li: ‘Mu utwe ba ba beilwe fa bulena.’ Ba ba beilwe fa bulena bao ki bona ba ba na ni m’ata mwa mulonga. Kacwalo, Mulimu ki yena y’a bulela kuli lu swanela ku utwa milao ya mulonga.—Maroma 13:1, 2.

Mwendi ku na ni mulao o bulela kuli ha lu lukeli ku yumba mapepa kamba masila a mañwi mwa mikwakwa. Kana wa swanela ku utwa mulao w’o?— Ee, Mulimu u bata kuli u utwe mulao w’o. Kana wa swanela ku utwa ni mapokola?— Mulonga u lifa mapokola kuli ba sileleze batu. Ku ba utwa ku swana fela ni ku utwa mulonga.

Kacwalo, haiba u bata ku tula mukwakwa mi mupokola u ku bulelela kuli “Litela!” u lukela ku ezañi?— Ba bañwi niha ne ba ka mata ku tula, kana ni wena wa swanela ku eza cwalo?— U lukela ku litela, niha neikaba kuli ki wena fela u nosi ya litela. Mulimu u ku bulelela kuli u utwe.

Mwendi ku na ni mufilifili mwa libaka ze lu pila ku zona, mi mupokola a kana a bulela kuli: “Mu si ke mwa ya mwa mikwakwa. Mu si ke mwa zwela kwande.” Kono mwendi wa utwa mihuwo, mi u kana wa ipuzaka kuli ku ezahalañi. Kana wa swanela ku zwela kwande kuli u y’o bona?— Kana f’o n’o ka utwa “ba ba beilwe fa bulena”?—

Mwa libaka ze ñata, mulonga hape u yahanga likolo, mi u lifanga baluti. Kacwalo, kana u hupula kuli Mulimu u bata kuli u utwe bo muluti?— Nahana ka za teñi. Mulonga u lifa bo muluti kabakala kuli ba luta, sina ha u lifa mupokola kabakala kuli u sileleza batu. Kacwalo, ku utwa mupokola kamba bo muluti ku swana ni ku utwa mulonga.

Kono ku cwañi bo muluti ha ne ba ka ku bulelela kuli u kubamele siswaniso se siñwi? N’o ka ezañi f’o?— Maheberu ba balalu  bale ne ba si ka kubamela siswaniso, nihaike Mulena Nebukadenezare n’a ba bulelezi ku si kubamela. Kana wa hupula libaka?— N’e li ka libaka la kuli ne ba sa lati ku loba mulao wa Mulimu.

Muñoli wa ze ezahezi ya bizwa Will Durant n’a ñozi ka za Bakreste ba pili mi n’a ize ye ne ‘ba utwa hahulu [kamba ku sepahala hahulu ku yena] ka ku fitisisa n’e si Sesare.’ Kutokwa, n’e li Jehova! Kacwalo, u si libali kuli Mulimu u lukela ku ba wa pili mwa bupilo bwa luna.

Lu utwa mulonga kakuli Mulimu u bata kuli lu u utwe. Kono haiba lu bulelelwa ku eza nto ye ñwi y’a bulela Mulimu kuli ha lu lukeli ku i eza, lu lukela ku bulela cwañi?— Lu lukela ku bulela mo ne ba bulelezi baapositola ku muprisita yo muhulu kuli: “Ki swanelo kuli lu utwe Mulimu ku fita batu.”—Likezo 5:29.

Ku utwa milao kwa lutiwa mwa Bibele. U bale ze ñozwi kwa Mateu 5:41; Tite 3:1; ni 1 Pitrosi 2:12-14.

[Siswaniso se si fa likepe 148]

Pitrosi u bulelelañi Kayafa?

[Siswaniso se si fa likepe 149]

Jesu u alaba cwañi puzo ya kalole ya banna ba?

[Siswaniso se si fa likepe 151]

Ki kabakalañi ha lu lukela ku utwa mupokola?