PIHO YA BAKUTAZI BA MUBUSO

Nebazibile Mulelo wa Bupilo

JESU ubulela kuli waziba lingu zahae. (Joani 10:14) Haiba mutu unani pilu yende mi walata kozo ni kuluka, ukaswalisana ni balateleli ba Jesu. Mutu yo ukaziba mulelo wa bupilo, sina feela mwanaaezelize musali yomuñwi wa kwa Belgium. Likande lahae ki le:

“Ka nako yebato ngongota Lipaki za Jehova fa munyako waka, nenizwafile hahulu kuli mane nenikenezwi ki mulelo wa kubata kuipulaya. Nenitabezi zene babulezi Lipaki ka za molukona kutatululela matata elukopana ni ona mwa lifasi lelimaswe le, kono nenisika tabela taba ya kuli Mulimu wakona kulutusa mwa taba yeo. Nenikwanisize lilimo ze 8 inze nisayi kwa keleke bakeñisa buipi bone babonisa batu kwa keleke yaluna. Kono hane nipotezwi ki Lipaki, nenilemuhile kuli litaba zene babulela ki za niti, mi hape neniziba kuli batu habakoni kupila basa tusiwi ki Mulimu.

“Ka bumai, hamulaho wa kupotelwa ki Lipaki ka misipili isikai, natuhela kuikambotanga ni bona. Neniikutwile hahulu bumaswe. Nakala kuzubanga misanga ya kwai yemine ka zazi, mi mane nakalisa kuitusisa milyani yekola. Bakeñisa kuli nenibata kuambolanga ni bo kuku bane batimezi kale, naikenya mwa litumelo za mioya. Zazi leliñwi busihu, nenisabile hahulu hane nitaselizwe ki madimona kabakala kuikenya mwa litumelo za mioya! Mi nekuungile likweli lisikai inze nikopana ni muinelo wo. Mi nako kaufela nenisabanga hane nihupulanga kuli niinzi ni nosi.

“Zazi leliñwi, naya kwa kuhata-hata, mi nafita nzila isili yene nisafitangi, mi nafumana muyaho omutuna one usweli kuyahiwa. Nenikomokile hahulu kubona batu babañata-ñata. Hase nisutelezi, nabona kuli neli Lipaki za Jehova bane basweli kuyaha Ndu ya Mubuso. Nahupula nako yene nipotelwanga ki Lipaki kwa ndu, mi naipulelisa nali, lifasi nelikaba lelinde kambe batu kaufela mwa lifasi le, bapila sina mobapilela batu ba.

“Nenibata hahulu kupotelwa ki Lipaki hape, kacwalo naikambota ni batu babañwi bane basweli kuyaha Ndu ya Mubuso yeo. Nenilapezi ku Mulimu ka za taba yeo, mi hamulaho wa mazazi a 10, natopotelwa ki muuna yanaakile anipotela lwapili. Anitaluseza kuli luzwelepili kuitutanga Bibele, nenitabezi hahulu luli, mi nalumela. Honafo feela animemela kwa mikopano kwa Ndu ya Mubuso. Mi nalumela. Neniiponezi nto yene nisika bona kale mwa bupilo bwaka! Nenilikile kubata batu bane balatana ili bane banani tabo mwa bupilo, kono nenisika bafumana. Kono hane nili kwa Ndu ya Mubuso, nalemuha kuli Lipaki balatana mi banani tabo mwa bupilo!

“Kuzwa feela ona fo, nakalisa kuyanga kwa mikopano kaufela. Hamulaho wa lisunda zetaalu, natuhela kuzuba kwai. Nayumba libuka zenebulela za banuhi ni lipina zateñi, mi hasamulaho nakala kuikutwa kuli madimona azwile ku na. Neniezize licinceho ilikuli nipile ka kulumelelana ni likuka za Jehova, mi hamulaho wa likweli zetaalu, nakala kukutaza taba yende. Hamulaho wa likweli ze 6, nakolobezwa. Mi hamulaho wa mazazi a mabeli kuzwa fonikolobelezwa, nakalisa bupaina bwa kutusa.

“Niitumela hahulu ku Jehova kwa lika kaufela zaniezelize. Ka nako ya cwale seniziba mulelo wa bupilo. Libizo la Jehova ki tawala yetiile nimatelanga mwateñi mi nasilelezwa. (Liproverbia 18:10) Niikutwa sina mwanaaikutwezi wa Lisamu hanaañozi Samu 84:10: ‘Kuina lizazi lililiñwi mwa malapa ahao ki kokunde kufita kuina mazazi a 1,000 kusili! Niketile kuyema mwa munyako wa ndu ya Mulimu waka kufita kupila mwa litende za babamaswe.’”

Musali yaishuwa yo naalemuhile mulelo wa bupilo. Kacwalo, mutu kaufela yabata Mulimu ka pilu yende wakona kufumana mulelo wa bupilo.