Tuto 11

Litumelo ni Lizo ze Sa Tabisi Mulimu

Ki litumelo ni lizo ze cwañi ze fosahezi? (1)

Kana Bakreste ba swanela ku lumela kuli Mulimu ki Silalu? (2)

Ki kabakalañi Bakreste ba niti ha ba sa ezi mikiti ya Ngilisimusi, Isita, kamba mazazi a ku pepwa? (3, 4)

Kana bafu ba kona ku holofaza ba ba pila? (5)

Kana Jesu n’a shwezi fa sifapano? (6)

Ku tabisa Mulimu ki kwa butokwa cwañi? (7)

1. Haki litumelo ni lizo kaufela ze li ze maswe. Kono Mulimu ha li lumelezi haiba li zwa kwa bulapeli bwa buhata kamba li lwanisa lituto za Bibele.—Mateu 15:6.

2. Silalu: Kana Jehova ki Silalu—batu ba balalu ku Mulimu a li muñwi? Batili! Jehova, Ndate, ki yena fela “Mulimu a nosi wa niti.” (Joani 17:3; Mareka 12:29) Jesu ki yena Mwan’a Hae wa mweli, mi u mwatas’a Mulimu. (1 Makorinte 11:3) Ndate ki yo mutuna ku Mwana. (Joani 14:28) Moya o kenile haki mutu; ki m’ata a’ sebeza a Mulimu.—Genese 1:2; Likezo 2:18.

3. Ngilisimusi ni Isita: Jesu n’a si ka pepiwa la December 25. N’a pepilwe ibat’o ba October 1, ili nako ya silimo yeo balisana ne ba buluka mitapi ya bona mwa naheñi busihu. (Luka 2:8-12) Jesu ni kamuta n’a si ka laela Bakreste ku eza mukiti wa ku pepwa kwa hae. Ka ku fapahana, n’a bulelezi balutiwa ba hae ku eza kupuzo, kamba ku hupula, lifu la hae. (Luka 22:19, 20) Ngilisimusi ni lizo za yona li zwa kwa bulapeli bwa buhata bwa kwaikale. Ki nto ye swana ni lizo za Isita, ze cwale ka ku itusisa mai ni lishakame. Bakreste ba kwa makalelo ne ba sa ezi mikiti ya Ngilisimusi kamba Isita, mi ni Bakreste ba niti ha ba i ezi kacenu.

4. Mazazi a ku pepwa: Mikiti ye mibeli fela ya lizazi la ku pepwa ye bulezwi mwa Bibele ne i ezizwe ki batu ba ne ba sa lapeli Jehova. (Genese 40:20-22; Mareka 6:21, 22, 24-27) Bakreste ba kwa makalelo ne ba sa ezi mikiti ya mazazi a ku pepwa. Sizo sa ku eza mikiti ya mazazi a ku pepwa si zwa kwa bulapeli bwa buhata bwa kwaikale. Bakreste ba niti ba fa limpo mi ba banga ni linako ze nde hamoho ka linako li sili mwahal’a silimo.

5. Ku Saba Bafu: Bafu ha ba koni ku eza nto ifi kamba ifi kamba ku utwa nto ifi kamba ifi. Ha lu koni ku ba tusa, mi bona ha ba koni ku lu holofaza. (Samu 146:4; Muekelesia 9:5, 10) Moyo wa shwa; ha u zwelipili ku pila hamulaho wa lifu. (Ezekiele 18:4) Kono ka linako ze ñwi mangeloi a’ maswe, a’ bizwa badimona, a ipumiseza ku ba mioya ya bafu. Lizo lifi kamba lifi ze ama ku saba bafu kamba ku ba lapela li fosahezi.—Isaya 8:19.

6. Sifapano: Jesu n’a si ka shwela fa sifapano. N’a shwezi fa musumo, kamba fa kota. Linzwi la Sigerike le li tolokilwe “sifapano” mwa Libibele ze ñata ne li talusa fela kota ya timba. Sisupo sa sifapano si zwa kwa bulapeli bwa buhata bwa kwaikale. Sifapano ne si sa itusiswi kamba ku lapelwa ki Bakreste ba kwa makalelo. Kacwalo, kana mu nahana kuli ne ku ka ba ko ku lukile ku itusisa sifapano mwa bulapeli?—Deuteronoma 7:26; 1 Makorinte 10:14.

7. Ne ku kana kwa ba t’ata hahulu ku siya ze ñwi za litumelo ni lizo zeo. Bahabo mina ni balikani ba mina ne ba kana ba lika ku mi kolwisa kuli mu si ke mwa cinca litumelo za mina. Kono ku tabisa Mulimu ki kwa butokwa ku fita ku tabisa batu.—Liproverbia 29:25; Mateu 10:36, 37.

[Siswaniso se si fa likepe 22]

Mulimu haki Silalu

 [Siswaniso se si fa likepe 23]

Ngilisimusi ni Isita li zwa kwa bulapeli bwa buhata bwa kwaikale

[Siswaniso se si fa likepe 23]

Ha ku na libaka ha lu swanela ku lapela bafu kamba ku ba saba