Tuto 5

Mulelo wa Mulimu kwa Neku la Lifasi-Mubu Ki Ufi?

Ki kabakalañi Jehova ha n’a bupile lifasi-mubu? (1, 2)

Ki kabakalañi lifasi-mubu ha li si paradaisi cwale? (3)

Ki sifi se si ka ezahala kwa batu ba ba maswe? (4)

Mwa nako ya kwapili, ki sifi seo Jesu a ka ezeza bakuli? basupali? bafu? (5, 6)

Kuli mu te mu abane mwa limbuyoti za kwapili, ki sifi se mu tokwa ku eza? (7)

1. Jehova n’a bupile lifasi-mubu le kuli batu ba kone ku ikola ku pila ku lona ku ya ku ile. N’a bata kuli lifasi-mubu li yahiwe kamita ki batu ba ba lukile, ili ba ba tabile. (Samu 115:16; Isaya 45:18) Lifasi-mubu ni kamuta ha li na ku sinyiwa; li ka ba teñi ku ya ku ile.—Samu 104:5; Muekelesia 1:4.

2. Pili Mulimu a si ka eza kale mutu, N’a ketile kalulo i liñwi ya lifasi-mubu ni ku i eza paradaisi ye buheha. N’a i bizize simu ya Edeni. Ne li mona m’o mwa n’a beile munna ni musali ba pili, bo Adama ni Eva. Mulimu n’a lelile kuli ba pepe bana ni ku taza lifasi-mubu kamukana. Hanyinyani-hanyinyani ne ba ka be ba fetuzi lifasi-mubu kamukana ku ba paradaisi.—Genese 1:28; 2:8, 15.

3. Adama ni Eva ne ba ezize sibi ka ku loba mulao wa Mulimu ka bomu. Kacwalo Jehova a ba lundula mwa simu ya Edeni. Paradaisi ne i luzizwe. (Genese 3:1-6, 23) Kono Jehova h’a si ka libala mulelo wa hae kwa neku la lifasi-mubu le. U sepisa ku li eza paradaisi, ili m’o batu ba ka pila ku ya ku ile. U ka eza cwañi seo?—Samu 37:29.

4. Pili lifasi-mubu le li si ka ba kale paradaisi, batu ba ba maswe ba lukela ku zwisiwa mwateñi. (Samu 37:38) Seo si ka ezahala fa Armagedoni, ili ndwa ya Mulimu ya ku feza bumaswe. Ku zwa f’o, Satani u ka tamiwa ka lilimo ze 1,000. Seo si talusa kuli ha ku na ba ba maswe ba ba ka siyala kuli ba sinya-sinye lifasi-mubu. Ki batu ba Mulimu fela ba ba ka punyuha.—Sinulo 16:14, 16; 20:1-3.

5. Cwale Jesu Kreste u ka busa sina Mulena wa lifasi-mubu le ka lilimo ze 1,000. (Sinulo 20:6) U ka zwisa sibi hanyinyani-hanyinyani mwa minahano ni mibili ya luna. Lu ka ba batu ba ba petehile sina mo ne ba bezi bo Adama ni Eva pili ba si ka eza kale sibi. F’o ha ku sa na ku ba ni makulanu, busupali, ni lifu. Bakuli ba ka folisiwa, mi basupali ba ka ba ba banca hape.—Jobo 33:25; Isaya 33:24; Sinulo 21:3, 4.

6. Mwahal’a Puso ya Jesu ya Lilimo ze Sikiti, batu ba ba sepahala ba ka sebeza ili ku fetula lifasi-mubu kamukana ku li bisa paradaisi. (Luka 23:43) Hape, bolule-lule ba bafu ba ka zusezwa kwa bupilo bwa butu fa lifasi-mubu. (Likezo 24:15) Haiba ba eza seo Mulimu a tokwa kuli ba si eze, ba ka zwelapili ku pila fa lifasi-mubu ku ya ku ile. Haiba ba sa si ezi, ba ka timezwa ku ya ku ile.—Joani 5:28, 29; Sinulo 20:11-15.

7. Kacwalo mulelo wa Mulimu wa kwa makalelo kwa neku la lifasi-mubu u ka konda. Kana ne mu ka tabela ku abana mwa limbuyoti zeo za kwapili? Haiba ku cwalo, mu tokwa ku zwelapili ku ituta ka za Jehova ni ku ipeya ku utwa zeo a tokwa. Ku fumaneha kwa mikopano kwa Ndu ya Mubuso ya fa sibaka ya Lipaki za Jehova ku ka mi tusa ku eza cwalo.—Isaya 11:9; Maheberu 10:24, 25.

[Siswaniso se si fa likepe 10]

Ku luziwa kwa paradaisi

 [Maswaniso a fa likepe 11]

Hamulaho wa Armagedoni, lifasi-mubu li ka eziwa paradaisi