KAUHANYO 37

Kana naswanela kukolobezwa?

Mwa litaba zelatelela, mulaitele mwa mbokisi yeli, ki niti kamba yeli, ki buhata:

Bakreste kaufela baswanela kukolobezwa.

□ Ki niti

□ Ki buhata

Libaka lelituna hamuswanela kukolobezwa kikuli, kolobezo itusa kuli musike mwaeza sibi.

□ Ki niti

□ Ki buhata

Kolobezo ikatahisa kuli mupiliswe.

□ Ki niti

□ Ki buhata

Haiba hamusika kolobezwa, uzibe hamutokwi kuikalabela ku Mulimu kabakala lika zemueza.

□ Ki niti

□ Ki buhata

Haiba balikani bamina basweli kuunga muhato wa kukolobezwa, uzibe ni mina mukwanisize zetokwahala kuli mukolobezwe.

□ Ki niti

□ Ki buhata

HAIBA mwamamela likuka za Mulimu, munani silikani sesinde ni yena, mi mwatalusezanga babañwi ka za tumelo yamina, uzibe mwaswanela kunahanisisa za kukolobezwa. Kono mukona kuziba cwañi kuli muitukiselize kuunga muhato wo? Kuli lualabe puzo yeo, halunyakisiseñi litaba zekolohanyizwe fahalimu zenetokwa kualabiwa ka kulaitela mwa mbokisi yeli ki niti-kamba-yeli ki buhata.

● Bakreste kaufela baswanela kukolobezwa.

Ki niti. Jesu naalaezi kuli balutiwa bahae baswanela kukolobezwa. (Mateu 28:19, 20) Esi mane Jesu yena kasibili naakolobelizwe. Kuli mulikanyise Jesu, mutokwa kuunga muhato wa kukolobezwa haiba muhulile mi mwakona kueza katulo yeo ni haiba mubata luli kukolobezwa.

● Libaka lelituna hamuswanela kukolobezwa kikuli, kolobezo itusa kuli musike mwaeza sibi.

Ki buhata. Kolobezo ibonisa batu kaufela kuli muineezi ku Jehova. Buineelo bwamina haki tumelelano yemipaleliswa kueza lika zeñwi zene mukatabela kueza kwa mukunda. Kono libaka hamuneela bupilo bwamina ku Jehova kikuli mubata kupila ka likuka zahae.

● Kolobezo ikatahisa kuli mupiliswe.

Ki niti. Bibele ibulela kuli kolobezo ki muhato wa butokwa hahulu waswanela kuunga mutu kuli apiliswe. (1 Pitrosi 3:21) Nihakulicwalo, kolobezo yashutana ni muhato wakana aanga mutu kuli aisileleze kwa kozi ya ka taho yekona kubateñi. Kono libaka luli hamuswanela kukolobezwa kikuli mwalata Jehova mi mubata kumusebeleza ka pilu yamina kaufela kuya kuile.—Mareka 12:29, 30.

● Haiba hamusika kolobezwa, uzibe hamutokwi kuikalabela ku Mulimu kabakala lika zemueza.

Ki buhata. Jakobo 4:17 ibulela kuli: “Haiba mutu aziba kueza sesilukile kono asa siezi, ueza sibi”—ibe kuli ukolobelizwe kamba kutokwa. Kacwalo, haiba mwaziba kueza sesilukile, muhulile, mi mwakona kueza likatulo za butokwa mwa bupilo, uzibe ye ki yona nako ya kuli muikambote ni bashemi bamina kamba Mukreste yomuñwi yahulile kwa moya ka za kolobezo. Kueza cwalo, kuka mitusa kuziba zemulukela kueza kuli mukolobezwe.

● Haiba balikani bamina basweli kuunga muhato wa kukolobezwa, uzibe ni mina mukwanisize zetokwahala kuli mukolobezwe.

Ki buhata. Muswanela kuunga muhato wa kukolobezwa ka kuitatela ni ka pilu yamina kaufela. (Samu 110:3) Muswanela feela kukolobezwa haiba mwaziba hande sekutalusa luli kuba yomuñwi wa Lipaki za Jehova mi mwakona kupeta buikalabelo bo.—Muekelesia 5:4, 5.

Kolobeza Yakona Kucinca Bupilo Bwamina

Kolobezo yakona kucinca bupilo bwamina ni kumitahiseza limbuyoti zeñata. Nihakulicwalo, kuunga muhato wo ki buikalabelo bobutuna—uama kupila ka nzila yebonisa kuli muineezi ku Jehova.

Kana muitukiselize kuneela bupilo bwamina ku Jehova? Haiba kucwalo, mulukela kuba ni tabo luli. Mukaba ni tohonolo yeipitezi hahulu—yona ya kusebeleza Jehova ka pilu yamina kaufela ni kupila ka nzila yebonisa luli kuli muineezi ku yena.—Mateu 22:36, 37.

IN OUR NEXT CHAPTER

Learn how to set goals so that you can make the most of your life.

LIÑOLO LA BUTOKWA

“Mufe mibili yamina sina sitabelo sesipila, sesikenile, sesiamuheleha ku Mulimu, ili sebelezo yekenile yemufa ka maata amina a kunahana.”—Maroma 12:1.

AKALEZO

Ka tuso ya bashemi bamina, mufumane mutu yomuñwi mwa puteho yaka mitusa kueza zwelopili ya kwa moya.—Likezo 16:1-3.

KANA MWAZIBA . . . ?

Kolobezo ki kalulo ya butokwa hahulu ya “liswayo” lelibonisa kuli mwaswanela kupiliswa.—Ezekiele 9:4-6.

ZENILELA KUEZA!

Kuli nikwanise zetokwahala ilikuli nikolobezwe, nikaekeza kwa kutwisiso yaka ya lituto za mwa Bibele zelatelela: ․․․․․

Zenibata kubuza bashemi baka ka za taba ye ki ․․․․․

MUBONA CWAÑI?

● Ki kabakalañi kolobezo haili muhato wa butokwa hahulu?

● Ki kabakalañi babanca babañwi haba zina-zinanga kuneela bupilo bwabona ni kukolobezwa?

● Ki kabakalañi babanca babañwi haba zina-zinanga kuneela bupilo bwabona ni kukolobezwa?

[Manzwi]

Kuziba kuli nikolobelizwe neku nitusize kueza likatulo zende ni kutokolomoha lika zeneka nitahiseza butata.”—Holly

[Mbokisi/​Siswaniso]

Lipuzo zebuziwanga hañata ka za kolobezo

Kolobezo italusañi? Kunweliswa mwa mezi ni kuzwisiwa mwateñi kutalusa kuli mushwile kwa neku la bupilo bwamina bwakale bwa kubata zamina feela, mi cwale mukalisa bupilo bobunca bwa kueza tato ya Jehova.

Kuneela bupilo bwamina ku Jehova kutalusañi? Kutalusa kuitoboha bupilo bwamina ni kusepisa kuli kueza tato ya Mulimu ikaba yona nto ya butokwa hahulu mwa bupilo bwamina. (Mateu 16:24) Muswanela kuneela bupilo bwamina ku Jehova ka tapelo pili musika kolobezwa kale.

Muswanela kuezañi pili musika kolobezwa kale? Muswanela kumamela litaba zeñozwi mwa Linzwi la Mulimu ni kutaluseza babañwi ka za tumelo yamina. Muswanela kutiisa silikani samina ni Mulimu ka kulapelanga ku yena ni ka kuituta Linzwi lahae. Muswanela kusebeleza Jehova kabakala kuli muikatulezi kueza cwalo—isiñi kabakala kuli batu babañwi babata kuli mueza cwalo.

Mulukela kukolobezwa hase mukwanisize lilimo zekai? Lilimo zanani zona mutu haki yona nto ya butokwa hahulu. Nihakulicwalo, mulukela kuba batu base babahulile ilikuli muutwisise hande sekutalusa kuneela bupilo bwamina.

Mukaeza cwañi haiba mubata kukolobezwa kono bashemi bamina bona bali mulibelele pili? Mwendi babata kuli pili muzibe hande mwakupilela sina Mukreste. Muutwe kelezo yabona mi muitusise nako yeo kutiisa silikani samina ni Jehova.—1 Samuele 2:26.

[Mbokisi]

Worksheet

kana mubata kukolobezwa?

Munyakisise lipuzo ni litaba zebonisizwe kwatasi kuli mubone haiba muitukiselize kukolobezwa. Mubale mañolo kaufela abonisizwe pili musika ñola kale likalabo zamina.

Ki lika mañi zemueza cwale zebonisa kuli musepile Jehova?—Samu 71:5. ․․․․․

Ki lika mañi zebonisa kuli mutwaelize maata amina a kulemuha ilikuli mutaluhanye zelukile ku zesika luka?—Maheberu 5:14. ․․․․․

Mulapelanga hakai? ․․․․․

Kana mulapelanga ka kunonga mi kana litapelo zamina libonisa kuli mwalata Jehova?—Samu 17:6. ․․․․․

Muñole lika zemubata kueza kuli litapelo zamina libange zende. ․․․․․

Muezanga hakai tuto ya Bibele ya ka butu?—Joshua 1:8. ․․․․․

Ki litaba mañi zemunyakisisanga hamueza tuto ya ka butu? ․․․․․

Muñole likonkwani zemubata kuitomela zeama tuto ya ka butu. ․․․․․

Kana mueza momukonela kaufela kukutaza ku babañwi? (Mitala: Kana mwakona kutaluseza babañwi lituto za Bibele za matatekelo? Kana mwaezanga misipili ya makutisezo kwa batu babatabela? Kana musweli kueza momukonela kaufela kuli mube ni tuto ya Bibele?)

□ Eni □ No

Kana mwayanga mwa bukombwa bashemi bamina niha basayi?—Likezo 5:42.

□ Eni □ No

Muñole likonkwani zemubata kuitomela zeama bukombwa.—2 Timotea 2:15. ․․․․․

Kana mwayanga kwa mikopano ya puteho kamita kamba muyanga feela ka siwela?—Maheberu 10:25. ․․․․․

Ki lika mañi zemuezanga kuli muabane mwa mikopano ya puteho? ․․․․․

Kana mwayanga kwa mikopano bashemi bamina niha basayi (haiba bamilumeleza kueza cwalo)?

□ Eni □ No

Kana mwatabela luli kueza tato ya Mulimu?—Samu 40:8.

□ Eni □ No

Kana mwakona kuñola ka kunonga linako fone muhanezi kukukuezwa ki litaka zamina?—Maroma 12:2. ․․․․․

Ki lika mañi zemulela kueza kuli muzwelapili kulata hahulu Jehova?—Juda 20, 21. ․․․․․

Kana mukazwelapili kusebeleza Jehova bashemi bamina ni balikani bamina niha nebaka tuhela kueza cwalo?—Mateu 10:36, 37.

□ Eni □ No

[Siswaniso]

Ka kuswana ni linyalo, kolobezo ki muhato okona kucinca bupilo bwamina—mutokwa kunahanisisa pili musika anga kale muhato wo