“Nizibahalize Libizo Lahao”

“Nibonahalize libizo lahao kwa batu bane unifile mwa lifasi. . . . Nizibahalize libizo lahao ku bona mi nika lizibahaza.”—JOANI 17:6, 26.

Taluso ya Manzwi A: Jesu naazibahalize libizo la Mulimu ka kuitusisa lona mwa bukombwa bwahae. Kusina kukakanya, Jesu kamita naabalanga mwa Mañolo mi naapundanga libizo la Mulimu. (Luka 4:16-21) Naalutile balutiwa bahae kulapela kuli: “Ndate, libizo lahao likeniswe.”—Luka 11:2.

Bakreste ba Kwa Makalelo Nebazibahalize Libizo la Mulimu: Muapositola Pitrosi naataluselize baana-bahulu kwa Jerusalema kuli Mulimu uungile ku ba macaba “batu bababizwa ka libizo lahae.” (Likezo 15:14) Baapositola ni batu babañwi nebakutalize kuli “mutu kaufela yabiza fa libizo la Jehova ukapiliswa.” (Likezo 2:21; Maroma 10:13) Hape nebaitusisize libizo la Mulimu mwa Mañolo A Sigerike A Sikreste. Hatiso mokufumaneha milao ya Sijuda yenefelizwe kuñoliwa ibato ba ka 300 C.E., yebizwa The Tosefta, ibulela zeneezahezi balwanisi hane bacisa libuka za Sikreste, ili: “Hakuna yanaayangwezi Libuka za Evangeli ni litaba zeñwi zeñozwi zekulubelwa kuba za Bakreste ba Majuda ka nako yene liciswa mwa mulilo. Neba lituhelezi kuli liyonge, . . . hamohocwalo ni litaba zebonisa Libizo la Mulimu zenefumaneha mwateñi.”

Ki bo Mañi Babazibahaza Libizo la Mulimu Kacenu? Manzwi a makalelo mwa toloko yeñwi ya Bibele yebizwa Revised Standard Version yelumelelizwe ki ba National Council of the Churches of Christ kwa America, abulela kuli: “Kufosahalile kuitusisa libizo la Mulimu wa niti anosi mwa likeleke za Sikreste kakuli haatokwi kutaluhanywa kwa milimu isili mi ba bulapeli bwa Sijuda nebatuhezi kuitusisa libizo la Mulimu lilimo zeñata pili Jesu asika pepwa kale.” Kacwalo, mwa toloko ya Bibele yeo, libizo la Mulimu liyolisizwe ka lilumbatina la “MULENA.” Cwanoñu fa, baeteleli ba Keleke ya Katolika nebalaezi mabishopu ba keleke yeo kuli: “Hamuopela ni hamulapela, musike mwaitusisa kamba kupunda libizo la Mulimu leliyemelwa ki litaku zeene za Siheberu za YHWH *.”

Ki bo mañi kacenu babaitusisa libizo la Mulimu ni kulizibahaza? Bo Sergey babapila kwa naha ya Kyrgyzstan, nebanani lilimo ze 15 hababuha filimu yenebulezi kuli libizo la Mulimu ki Jehova. Nekufitile lilimo zebato ba zelishumi basautwi libizo leo hape. Hamulaho wa nako, bo Sergey batutela kwa America; teñi ko, bapotelwa ki basali bababeli babali Lipaki za Jehova, mi bababonisa libizo la Mulimu mwa Bibele. Bo Sergey nebatabile hahulu kufumana batu babaitusisa libizo la Jehova mwa bulapeli bwabona. Kwatabisa hape kuziba kuli dikishinari yebizwa Webster’s Third New International Dictionary ibulela za “Jehova Mulimu” kuli “ki Mulimu yapahami mi ki yena feela Mulimu yebalapela Lipaki za Jehova.”

[Litaluso za kwatasi]