“Taba Yende ye ya Mubuso Ikakutazwa”

“Taba yende ye ya Mubuso ikakutazwa mwa lifasi kaufela kuli ibe bupaki kwa macaba kaufela, kihona kukataha mafelelezo.”—MATEU 24:14.

Taluso ya Manzwi A: Luka, yomuñwi wa bañoli ba Libuka za Evangeli, naabulezi kuli Jesu “aya mwa muleneñi ni muleneñi ni mwa munzi ni munzi anze akutaza ni kushaela taba yende ya Mubuso wa Mulimu.” (Luka 8:1) Jesu yena kasibili naabulezi kuli: “Nilukela kuyo shaela taba yende ya Mubuso wa Mulimu ni kwa mileneñi yemiñwi, kakuli ki sona senilumezwi.” (Luka 4:43) Naalumile balutiwa bahae kuyo kutaza taba yende mwa litolopo ni mwa minzi, mi hasamulaho abafa taelo yeli: “Mukaba lipaki zaka . . . kuyo fita kwa libaka za kwahule hahulu za lifasi.”—Likezo 1:8; Luka 10:1.

Bakreste ba Kwa Makalelo Nebakutalize Taba Yende ya Mubuso: Balutiwa ba Jesu nebaezize zene babulelezwi kusina kuzina-zina. “Zazi ni zazi mwa tempele ni fa ndu ni ndu bazwelapili kuluta batu ni kushaela taba yende ya Kreste, basaliseli.” (Likezo 5:42) Musebezi wa kukutaza neueziwa ki batu kaufela mwa puteho isiñi feela basikai. Caziba wa litaba zakale yabizwa Neander utalusa kuli: “Muuna yabizwa Celsus, yena wapili kuñola litaba zelwanisa Bakreste, naasheunuzi Bakreste ka kubulela kuli neli batu-tu feela mi nebasika ituta niha nebakutaza evangeli ka kutukufalelwa.” Muuna yomuñwi yabizwa Jean Bernardi, naabulezi cwana mwa buka yenani toho ya taba yeli, The Early Centuries of the Church: “[Bakreste] nebakutazanga mwa libaka kaufela ni kwa batu kaufela. Nebakutazanga mwa linzila ni mwa mileneñi, mwa mapatelo ni mwa mandu. Nebaezanga cwalo ibe kuli batu neba baamuhezi kamba kutokwa. . . . Nebakutalize kuyo fita kwa libaka za kwahule za lifasi.”

Ki bo Mañi Babakutaza Taba Yende Kacenu? Muprisita wa Keleke ya Anglican, yabizwa David Watson, utalusa kuli: “Libaka lelitahisa kuli batu babañata kacenu basike baisa pilu kwa kusebeleza Mulimu ki bakeñisa kuli Keleke ikeshebisize musebezi wa kukutaza ni kuluta batu Linzwi la Mulimu.” Mwa buka yahae yeli, Why Are the Catholics Leaving? muuna wa libizo la José Luis Pérez Guadalupe naañozi ka za batu baba mwa keleke ya Evangelical, Adventist ni likeleke zeñwi kuli “habakutazangi fa ndu ni ndu.” Nihakulicwalo, naañozi ka za Lipaki za Jehova kuli: “Banani tomahanyo yende ya kukutaza fa ndu ni ndu.”

Muuna yabizwa Jonathan Turley, naabulezi taba yetabisa mi ki ya niti, ili yefumaneha mwa hatiso ya Cato Supreme Court Review, 2001-2002, yeli: “Haiba mutu abulela feela kuli Lipaki za Jehova, batu babañata bakaziba kuli utalusa bakutazi babapotelanga batu fa mandu abona ka nako yebasika balibelela. Lipaki za Jehova baanga musebezi wa kukutaza kuba wa butokwa hahulu.”

[Mbokisi]

Bakreste ba Niti ki bo Mañi?

Hamulaho wa kunyakisisa litaba ze ka kuitusisa Bibele, ki bo mañi kacenu bomubona kuli ki Bakreste ba niti? Nihaike kuli kunani likeleke ni likwata zeñata-ñata mo batu baipapata kuba Bakreste, muhupule zanaabulelezi balutiwa bahae Jesu, hanaaize: “Haki mutu kaufela yali ku na, ‘Mulena, Mulena,’ yakakena mwa Mubuso wa mahalimu, kono kukakena feela yaeza tato ya Ndate ya kwa mahalimu.” (Mateu 7:21) Haiba mulemuha babaeza tato ya Ndate—ili kutalusa Bakreste ba niti—mi muswalisana ni bona, mukaikola limbuyoti zeñata zekatahiswa ki Mubuso wa Mulimu. Shangwe, mubuze Lipaki za Jehova kuli muzibe litaba zeñata ka za Mubuso wa Mulimu ni limbuyoti zende zebaka ikola batu kabakala Mubuso wo.—Luka 4:43.