Batu kamukana ba kwa moya ba na bupile Jehova ne li ba bande. Kono cwale lingeloi li li liñwi la fita fa ku ba le li maswe. Ki Satani Diabulosi. Satani n’a bata kuli batu ba fa lifasi-mubu ba lapele yena ku fita ku lapela Jehova. Se ne si ezahezi ki se:

Mwa simu ya Edeni, ne ku na ni likota ze ñata ze ne li beya miselo ye tabusa. Jehova n’a taluselize Adama ni musal’a hae, Eva, kuli ne ba kona ku ca ku zona ka tukuluho. Kono ne ku na ni kota i liñwi yeo Mulimu n’a bulezi kuli ba si ke ba ca ku yona. N’a bulezi kuli haiba ne ba ka ca ku yona, ne ba ka shwa luli.—Genese 2:9, 16, 17.

Ka zazi le liñwi Eva na inzi a li nosi noha ha ne i bulezi ku yena. Ka mo ku inezi fela, ne si noha ka sibili ye ne i bulela; ne li Satani Diabulosi ya n’a ezisize kuli ku bonahale inge kuli noha ki yona ye ne i bulela. Satani a taluseza Eva kuli haiba n’a ka ca kwa muselo o ne u hanisizwe, n’a ka fita fa ku ba y’a butali sina Mulimu. Hape a talusa kuli Eva n’a si ke a shwa. Bubeli bwa zona lipulelo zeo ne li za buhata. Nihakulicwalo, Eva a lumela sa n’a bulela Satani mi a ca kwa muselo. Hamulaho, a fa ye miñwi ku Adama, mi ni yena a ca.—Genese 3:1-6.

Ku zwelela ku yona taba yeo ye buniti, lu ituta kuli Satani ki mukwenuheli ni lihata. N’a taluselize Eva kuli haiba n’a ka tula taelo ya Mulimu, na si ke a shwa. Leo  ne li lishano. Eva a fita fa ku shwa mi ni Adama n’a shwile. Satani n’a si ka shwa ka nako yeo, nihaike kuli u kabe a shwile kwa nalule-lule bakeñisa kuli u ezize sibi. Ka nako ye, nihakulicwalo, u sa pila mi u zwelapili ku yembulula mufuta wa mutu. U s’a li lihata, mi u lika ku susueza batu kuli ba lobe milao ya Mulimu.—Joani 8:44.

Hamulaho, mangeloi a mañwi a fita fa ku ba a’ maswe. Ona mangeloi ao a bona basali ba ne ba buheha fa lifasi-mubu mi n’a bata ku ba ni tobali ni bona. Kacwalo a taha fa lifasi-mubu ni ku ipilula ka ku ikapesa mibili ye swana ni ya banna ba fa lifasi-mubu. Mi ba ikungela basali. Seo ne si lwanisana ni mulelo wa Mulimu.—Genese 6:1, 2; Juda 6.

Seo hape ne si tisize butata bo butuna kwa mufuta wa mutu. Basali ba ona mangeloi ao ba pepa bana, kono ne si bana ba ba iketile. Ba hula ni ku fita fa ku ba bilankwe bya mifilifili ni bya situhu. Kwa nalule-lule lifasi la fita fa ku tala mifilifili kuli mane Jehova a lela ku timeza batu ba ba maswe ka munda o mutuna. Batu fela ba ne ba punyuhile Munda ne li Nuwe ya n’a lukile ni lubasi lwa hae.—Genese 6:4, 11; 7:23.

Nihakulicwalo, mangeloi a’ maswe n’a kutezi kwa liluko la kwa moya; n’a si ka shwa. Kono n’a filwe koto. N’a si ka lumelezwa ku kutela kwa lubasi lwa Mulimu lwa mangeloi a lukile. Fahalimw’a seo, Jehova n’a si ka a lumeleza hape kuli a ipilule ka ku ikapesa mibili  ya batu ba fa lifasi-mubu. Mi kwa nalule-lule a ka shwa mwa katulo ye tuna.—2 Pitrosi 2:4; Juda 6.

Kwa makalelo a lilimo za mwanda wa luna, ne ku na ni ndwa mwa lihalimu. Buka ya Sinulo ye mwa Bibele i talusa cwana se ne si ezahezi: “Cwale ndwa ya lwanwa mwa lihalimu. Mikaele [Jesu Kreste ya zusizwe kwa bafu] ni mangeloi a hae [a mande] a lwanisa drakoni [Satani]. Drakoni ya lwana, i na ni mangeloi a yona [a maswe]. Kono mangeloi a Drakoni h’a si ka tula, mi sisa sa ona ha si si ka bonwa hape kwa lihalimu. Mi drakoni ye tuna, yona noha ya kale, ye bizwa Diabulosi ni Satani, ye pumanga lifasi kamukana, ya nepelwa mwa lifasi, ni mangeloi a yona [a maswe] a nepwa hamoho ni yona.”

Ki sifi se ne si zwile mwateñi? Taba i zwelapili kuli: “Ka zeo, mina mahalimu ni ba ba yahile mwateñi, a mu tabe!” Mangeloi a mande n’a kona ku ba a tabile bakeñisa kuli Satani ni mangeloi a maswe, kamba mioya, h’a sa li yo kwa lihalimu. Kono ku cwañi kwa neku la batu fa lifasi-mubu? Bibele i talusa kuli: “Mu na ni bumai mina ba ba yahile mwa lifasi ni mwa liwate! kakuli Diabulosi u shetumukezi ku mina a halifile maswe, ka ku ziba kuli nako ya hae ki ye nyinyani.”—Sinulo 12:7-9, 12.

Ee, Satani ni balikani ba hae ba ba maswe ba puma ni ku tisa bumai bo butuna kwa batu ba fa lifasi-mubu. Ona mangeloi a’ maswe ao a bizwa badimona. Ki lila za Mulimu. Kaufel’a ona ki a maswe.