Kauhanyo 19

Mu Zwelepili ku Bulela Linzwi la Mulimu ka Bundume

1. (a) Balutiwa ba Jesu ne ba zibahalize taba mañi ye nde, kono Majuda ba bañwi ne ba ezize cwañi? (b) Lu kona ku buza lipuzo mañi?

SE KU fitile lilimo ze bat’o ba 2,000 ku zwa f’o Mwan’a Mulimu, yena Jesu Kreste, n’a tozelizwe kuli a be yena Mulena wa lifasi kaufela mwa nako ya kwapili. Lila za bulapeli ne li tahisize kuli Jesu a bulaiwe, kono Jehova n’a mu zusize kwa bafu. Ka Jesu, batu cwale ne ba kona ku ba ni bupilo bo bu sa feli. Kono balutiwa ba Jesu ha ne ba zibahalize taba ye nde yeo kwa nyangela, kwa zuha nyandiso. Ba bañwi ku bona ne ba tamilwe, mane ni ku natakiwa ni ku laelwa kuli ba tuhele ku bulela ka za Jesu. (Likezo 4:1-3, 17; 5:17, 18, 40) Ne ba ka eza cwañi? Kambe ne li mina, ne mu ka eza cwañi? Kana kambe ne mu zwezipili ku paka ka bundume?

2. (a) Ki litaba mañi ze nde ze tokwa ku zibahazwa mwa linako za luna? (b) Ki bomañi ba ba na ni buikalabelo bwa ku kutaza taba ye nde?

² Ka 1914 Mulena wa Mubuso wa Mulimu, yena Jesu Kreste, n’a beilwe fa lubona mwa lihalimu kuli a buse ‘mwahal’a lila za hae.’ (Samu 110:2) Ku tuha f’o, Satani ni badimona ba hae ne ba lundulezwi fa lifasi-mubu. (Sinulo 12:1-5, 7-12) Mazazi a maungulelo a muinelo wa linto wa cwale n’a kalile. Nako yeo ha i ka fela, Mulimu u ka yundisa muinelo wa linto kaufela wa Satani. (Daniele 2:44; Mateu 24:21) Ba ba ka punyuha ba ka  ba ni bupilo bo bu sa feli fa lifasi le li ka ba paradaisi. Haiba mu amuhezi taba ye nde yeo, mu ka bata ku i taluseza ba bañwi. (Mateu 24:14) Kono mu kona ku libelela kuli batu ba ka i nga cwañi?

3. (a) Batu ba amuhelanga cwañi lushango lwa Mubuso? (b) Lu lukela ku ipuza puzo mañi?

³ Ha mu zibahaza taba ye nde ya Mubuso, batu ba bañwi ba kana ba i amuhela, kono buñata ha ba na ku i tabela. (Mateu 24:37-39) Ba bañwi ba kana ba mi sheununa kamba ku mi lwanisa. Jesu n’a lemusize kuli twaniso i kana ya zwelela ku bahabo mina. (Luka 21:16-19) Hape i kana ya taha ha mu li kwa musebezi kamba kwa sikolo. Mwa likalulo ze ñwi za lifasi, miuso i kwalezi musebezi wa Lipaki za Jehova. Ha mu ipumana mwa miinelo ye cwalo, kana mu ka zwelapili ku bulela linzwi la Mulimu ka bundume ni ku ‘tiya mwa tumelo’?—1 Makorinte 16:13.

Ku Sa Itinga fa M’ata A Luna

4. (a) Kuli lu be batanga ba Mulimu ba ba sepahala, ki nto mañi ya butokwa ye tokwahala? (b) Ki kabakalañi mikopano ya Sikreste ha i li ya butokwa?

⁴ Nto ya butokwa mwa ku ba mutang’a Jehova ya sepahala ki ku itinga fa litukiso za kwa moya z’a file. Ye ñwi ya litukiso zeo ki mikopano ya puteho. Mañolo a lu susueza kuli lu si ke lwa i keshebisa. (Maheberu 10:23-25) Ba ba zwezipili ku ba Lipaki za Jehova ba ba sepahala ba tiiselize ku ba kwa mikopano kamita ni balapeli ba bañwi. Ku yona mikopano yeo, zibo ya luna ya Mañolo ya ekezeha. Hape kutwisiso ya luna ya liniti ze zibahala hande ya hula, mi zibo ya luna ya mwa ku itusiseza zona ni yona ya ekezeha. Lu sutelela hahulu kwa mizwale ba luna ba Sikreste ni ku swalisana mwa ku  lapela mi lwa tiiswa kuli lu eze tato ya Mulimu. Moya wa Jehova u fa ketelelo ka puteho, mi ka ona moya w’o, Jesu u mwahal’a luna.—Mateu 18:20; Sinulo 3:6.

5. Musebezi wa Lipaki za Jehova ha u kwalezwi, ku eziwangañi ka za mikopano?

⁵ Kana mwa fumanehanga kwa mikopano kaufela kamita, mi kana mwa sebelisanga ze buhisanwa teñi? Fokuñwi, musebezi wa Lipaki za Jehova ha u kwalezwi, ku tokwahala ku eza mikopano ka likwata ze nyinyani, mwa mandu a batu. Libaka ni linako li kana za cinca-cinca mi fokuñwi li kana za sa ba linako ze nde, mikopano ye miñwi i eziwa busihu. Kono ku si na taba ni linako ze si yo hande, ni lubeta, mizwale ni likaizeli ba ba sepahala ba likanga ka t’ata ku fumaneha kwa mukopano ni mukopano.

6. Lu bonisa cwañi kuli lu itingile ku Jehova, mi nto yeo i kona cwañi ku lu tusa ku zwelapili ku bulela ka bundume?

⁶ Ku itinga ku Jehova ku tahanga ka ku lapela ku yena kamita ku zwelela kwa pilu, ka ku lemuha kuli lu tokwa tuso ya Mulimu. Kana mwa ezanga cwalo? Mwa bukombwa bwa hae bwa fa lifasi-mubu, Jesu n’a kuta-kutezi ku lapela. (Luka 3:21; 6:12, 13; 22:39-44) Mi busihu pili a si ka kokotelwa kale, n’a susuelize balutiwa ba hae kuli: “Mu tone mi mu lapele, kuli mu si ke mwa kena mwa muliko.” (Mareka 14:38) Haiba lu fumana kuli batu ha ba lati ku teeleza kwa lushango lwa Mubuso, lu kana lwa kenelwa ki muliko wa ku kutela mwamulaho mwa bukombwa bwa luna. Batu ha ba lu sheununa kamba ku lu nyandisa, lu kana lwa tahelwa ki muliko wa ku tuhela ku kutaza kuli lu si ke lwa nyandiswa. Kono haiba lu lapelela ka t’ata moya wa Mulimu kuli u lu tuse ku zwelapili ku bulela  ka bundume, lu ka silelezwa kwa ku komiwa ki yona miliko yeo.—Luka 11:13; Maefese 6:18-20.

Ze Ñozwi ka za ku Paka ka Bundume

7. (a) Ki kabakalañi litaba ze ñozwi mwa Likezo ha li li za butokwa ku luna? (b) Mu alabe lipuzo ze filwe kwa mafelelezo a paragilafu ye, ni ku koñomeka mo li kona ku lu tuseza litaba zeo.

⁷ Ze ñozwi mwa buka ya Likezo ki za butokwa ku luna kaufela. Li talusa ka za m’o baapositola ni balutiwa ba bañwi ba kwa makalelo ne ba tulezi lika ze tibela, ni ku ba lipaki za Jehova be ne ba na ni bundume, ili be ne ba sepahala. Batu bao ne ba na ni maikuto a swana ni a luna. Ha lu nyakisiseñi kalulo ya zona litaba zeo ka ku itusisa lipuzo ze latelela ni mañolo a bonisizwe. Ha lu nze lu eza cwalo, mu bone mo mu kona ku tusezwa, mina ka sibili, ki ze mu bala.

Kana baapositola ne li batu be ne ba itutile hahulu? Kana ne ba li batu bao ka sipepo ne ba si na sabo, ku si na taba ni ze n’e ezahala? (Joani 18:17, 25-27; 20:19; Likezo 4:13)

Pitrosi n’a konisizwe kiñi ku bulela ka bundume fapil’a kuta ya Sijuda ye n’e bulaile Mwan’a Mulimu? (Mateu 10:19, 20; Likezo 4:8)

Baapositola ne ba ezañi mwa liviki pili ba si ka tiswa kale kwa Kuta ye Tuna? (Likezo 1:14; 2:1, 42)

Babusi ha ne ba laezi baapositola ku tuhela ku kutaza ka libizo la Jesu, bo Pitrosi ni Joani ne ba alabile cwañi? (Likezo 4:19, 20)

Ha se ba lukuluzwi, baapositola ne ba batile kai hape tuso? Kana ne ba lapezi kuli nyandiso i fele, kamba cwañi? (Likezo 4:24-31)

 Jehova n’a file tuso ka nzila ifi balwanisi ha ne ba likile ku kwalela musebezi wa ku kutaza? (Likezo 5:17-20)

Baapositola ne ba bonisize cwañi kuli ne ba utwisisa libaka ha ne ba lukuluzwi? (Likezo 5:21, 41, 42)

Balutiwa ne ba zwezipili ku ezañi buñata bwa bona niha ne ba hasani kabakala nyandiso? (Likezo 8:3, 4; 11:19-21)

8. Bukombwa bwa balutiwa ba kwa makalelo ne bu tahisizeñi ze nde, mi lu til’o amiwa cwañi teñi?

⁸ Musebezi wa ku kutaza taba ye nde ne u petile se siñwi. Balutiwa ba ba bat’o eza 3,000 ne ba kolobelizwe la Pentekonta ya 33 C.E. ‘Ba ba lumezi ku Mulena ne ba nze ba ekezeha ka banna ni basali.’ (Likezo 2:41; 4:4; 5:14) Hasamulaho, nihaiba Saule wa kwa Tarese, ya n’a nyandisanga hahulu-hulu batu ba Mulimu, a ba Mukreste mi ka bundume a kala ku paka niti. A zibahala ka libizo la muapositola Paulusi. (Magalata 1:22-24) Musebezi o n’o kalile mwa lilimo za mwanda wa pili u sa zwelapili. Mwa mazazi a maungulelo a, u hulile mi u fitile mwa likalulo kaufela za lifasi. Lu na ni tohonolo ya ku abana ku ona, mi ha lu nze lu eza cwalo, lu kona ku likanyisa mutala o tomilwe ki lipaki ba ba sepahala be ne ba li teñi kwamulaho.

9. (a) Paulusi n’a kutalize kai? (b) Mu kutazanga lushango lwa Mubuso ku ba bañwi ka linzila mañi?

⁹ Paulusi n’a ezizeñi ha n’a itutile niti ka za Jesu Kreste? “A pakisa a bulela Jesu . . . , a tiisa kuli Jesu ki mwan’a Mulimu.” (Likezo 9:20) N’a itebuhile sishemo sa Mulimu se situna ku yena, mi n’a lemuhile kuli batu kaufela ne ba tokwa taba ye nde ya n’a amuhezi  yena. Paulusi n’a li Mujuda, mi ka ku ya ka sizo sa mwa linako zeo, n’a ile kwa masinagoge ku yo paka. Hape n’a kutalize fa ndu ni ndu ni ku ambolisana ni batu mwa musika. Mi n’a tabela ku ya kwa libaka ze nca ku yo kutaza taba ye nde.—Likezo 17:17; 20:20; Maroma 15:23, 24.

10. (a) Ka mwa n’a pakela, Paulusi n’a bonisize cwañi kuli niha n’a na ni bundume, hape n’a na ni temuho? (b) Ha lu kutaza ku bahabo luna, ku be lu sebeza ni bona, kamba ku be lu kena ni bona sikolo, lu kona cwañi ku bonisa kuli lu eza mwa n’a ezezanga Paulusi?

¹⁰ Paulusi n’a na ni bundume, kono hape n’a na ni temuho. Ni luna lu swanela ku ba cwalo. Kuli a ezise Majuda ku mu teeleza, n’a bulelanga za lisepiso zeo Mulimu n’a sepisize bokukw’a bona. Kwa Magerike n’a bulelanga ka za lika ze ne ba ziba. Fokuñwi n’a bulelanga ze n’e tahisize kuli yena a itute niti ni ku itusisa zona kwa ku fa bupaki. N’a ize: “Ni eza linto kaufela kabakala Evangeli, kuli ni fumane ku abelwa kwateñi.”—1 Makorinte 9:20-23; Likezo 22:3-21.

11. (a) Paulusi n’a ezizeñi kuli a pime ku zwelapili ku lwaniswa ki balwanisi? (b) Ka butali lu kona ku likanyisa mutala wa Paulusi lili, mi ili ka nzila ifi? (c) M’ata a ku zwelapili ku kutaza ka bundume a zwelela kai?

¹¹ Ha ne ku bonahezi kuli kabakala twaniso, ne ku ka ba hande kuli Paulusi a yo kutaleza kwa sibaka si sili, n’a ezize cwalo ku fita ku ina kuli a to talimana hape ni balwanisi. (Likezo 14:5-7; 18:5-7; Maroma 12:18) Kono ni kamuta n’a sa swabeli taba ye nde. (Maroma 1:16) Paulusi niha n’a sa tabeli ku lwahakiwa ni ku lwaniswa ki balwanisi, n’a ‘tiyezi ku Mulimu wa luna,’ ni ku zwelapili ku kutaza. N’a ize: “Mulena ki Yena ya ni yemezi, mi a ni fa mata; kuli ka na, Evangeli i bulelwe ku  feleleza.” (1 Matesalonika 2:2; 2 Timotea 4:17) Toho ya puteho ya Sikreste, yena Jesu, u zwelapili ku fa m’ata e lu tokwa kuli lu eze musebezi wa n’a polofitile kuli ne u ka eziwa mwa linako za luna.—Mareka 13:10.

12. Bundume bwa Sikreste bu pakiwa kiñi, mi bu tomile fañi?

¹² Lwa swanela luli ku zwelapili ku bulela linzwi la Mulimu ka bundume, sina mwa n’a ezelize Jesu ni batanga ba Mulimu ba bañwi be ne ba sepahala ba mwa lilimo za mwanda wa pili. Seo ha si talusi kuli lu si ke lwa kuteka maikuto a ba bañwi kamba ku lika ku hapeleza batu ba ba sa lati lushango. Kono ha lu zwafi kabakala kuli batu ha ba lati ku teeleza; mi hape ha lu tuheliswi ki nyandiso. Sina Jesu, lu bonisa kuli Mubuso wa Mulimu ki ona o lukela mwa lifasi kaufela. Lu bulela ka buikolwiso kakuli lu yemela Jehova, yena Muambakani-ya-Pahami, mi kabakala kuli litaba ze lu zibahaza ha li zwi ku luna kono li zwa ku yena. Mi sihulu se si lukela ku lu susueza luli ku lumbeka Jehova ki lilato la luna ku yena.—Mafilipi 1:27, 28; 1 Matesalonika 2:13.

Lundululo

• Ki kabakalañi ha ku li kwa butokwa ku fitisa lushango lwa Mubuso kwa batu kaufela ha ku konahala, kono lu kona ku libelela kuli lu ka amuhelwa cwañi?

• Lu kona ku bonisa cwañi kuli ha lu si ka itinga fa m’ata a luna mwa ku sebeleza Jehova?

• Buka ya Likezo i lu lutañi za butokwa?

[Lipuzo za Tuto]

 [Maswaniso a fa likepe 173]

Sina kwamulaho, batanga ba Jehova kacenu ba bulela linzwi la Mulimu ka bundume