1. Ku ka ezahalañi ha lu ‘sutelela ku Mulimu’?

 JEHOVA u lata ba ba mu sebeleza. Haiba mu lapela Jehova, u ka mi fuyola cwale ni kwapili. Bibele i li: “Mu sutelele ku Mulimu mi u ka sutelela ku mina.”—Jakobo 4:8.

2. Lu kona ku sutelela cwañi ku Mulimu, mi ku eza cwalo ku ka ama cwañi litapelo za luna?

² Kuli mu sutelele ku Mulimu, mu lukela ku ituta ni ku sebelisa Linzwi la hae. Ha mu lapela ka tato ya hae, Jehova u ka teeleza kwa litapelo za mina ni ku li alaba. Joani, muapositola wa Sikreste, n’a ñozi kuli: “Sepo ye tuna ye lu na ni yona ku Yena kikuli ha lu kupa nto ka ku lata kwa hae, wa lu utwa. Mi ha lu ziba kuli wa lu utwa niha lu tahisa kupo ifi kamba ifi, lwa ziba kuli lu amuhezi se lu kupile ku Yena.”—1 Joani 5:14, 15.

3-7. Lu kona ku ipumanela cwañi butali bwa Mulimu, mi bu kona ku lu tusa cwañi?

³ Hape, ha mu nze mu sutelela ku Mulimu, u ka mi fa butali kuli mu kone ku tatulula litaba za ka zazi za mwa bupilo. Bibele i li: “Mutu ku mina h’a tokwa butali, a bu kupe ku Mulimu.”—Jakobo 1:5.

⁴ Butali bwa Mulimu bu kona ku mi tusa cwañi? Libaka la pili kikuli bu kona ku mi tusa ku ziba lika ze nyemisa Jehova. Hape mwa kona ku ituta libaka lika zeo ha li li ze fosahezi ni ze mu kona ku eza kuli mu si ke mwa li eza. Zibo ye cwalo ya kona ku mi sileleza kwa butata bo buñata bo bu kataza buñata bwa batu. Ka mutala, ku utwa kelezo ya Mulimu ya ku ba ni muzamao o kenile ku tusa ku sileleza batu ba Mulimu kwa milwalo ya ku sa lela, matuku a sihule, ni manyalo a si na tabo kamba a’ shandaukile.

⁵ Butali b’o Mulimu a fa bu kona ku mi tusa cwañi hape? Bu kona ku mi tusa ku pila bupilo bo bunde hahulu. Bu kona ku mi tusa ku eza liketo ze nde mwa miinelo ye sebeza, inge cwalo mwa ku itusiseza mali a mina. Mu ka kona ku eza misebezi ye minde ni ku tokolomoha misebezi ye tusa ka nako ye kuswani fela.

⁶ Butali bwa Mulimu hape bu kona ku mi tusa mwa liswalisano za mina ni ba bañwi. Mwa kona ku pila bupilo bo bu tabisa bwa lubasi. Mwa kona ku ba ni balikani ba ba inelela ili ba niti, mi mwa kona ku ipumanela likute, mane ni ku ba ba sa sebelezi Mulimu.

⁷ Hape, ha mu ba ni butali bwa Mulimu, mu ka ba ni mubonelo o munde wa bupilo. Bu ka mi tusa ku tatulula butata ni maswabisa a mwa bupilo. Hape, mu ka ba ni mubonelo o itikanelezi ili o munde wa nako ya kwapili. Mubonelo o munde ni ona u ka mi tusa ku ba ni buikangulo bo bunde bwa mwa maikuto ni bwa kwa mubili.—Liproverbia 14:30; Isaya 48:17.

8. Haiba mu sebeleza Mulimu, ki lika mañi ze mu si ke mwa saba?

⁸ Haiba mu sebeleza Mulimu wa niti, mu ka lukululwa kwa sabo ye kataza ba ba sa mu sebelezi. Kakuli mwa ziba kuli bafu ba itobalezi mwa mabita, ha mu na ku  saba ba ba shwile. Kakuli mu kolwa kuli Mulimu u ka taleleza sepiso ya hae ya ku zusa bafu, ha mu na ku saba ku shwa. Mi bakeñisa kuli mwa ziba kuli Mulimu ki ya m’ata ote, ha mu na ku saba buloi.—Joani 8:32.

9-11. Ki bomañi ba ba ka pila mwa Paradaisi, mi ki bomañi ba ba si ke ba pila teñi?

⁹ Ha mu sutelela ku Mulimu, ha mu na ku saba za kwapili. Sina ha se lu boni, Bibele ne i polofitile buñata bwa matata e lu iponela fa lifasi kacenu. Jehova u lu bulelela kuli matata ao ki a swalelele; Mubuso wa Mulimu u ka tuha u fetula lifasi le ku ba paradaisi.—Luka 21:10, 11, 31; 23:43.

¹⁰ Ba ba ka pila mwa Paradaisi ki ba ba sutelela ku Jehova ni ku mu sebeleza. Bibele i li: “Ku sa na ni nakonyana ye nyinyani, mi ya maswe h’a sa na ku ba teñi; e, u ka bata sibaka sa hae, kono si se si ka ba siyo. Kono ba ba ishuwa ba ka luwa naha, ba ka ikola kozo ye tuna.”—Samu 37:10, 11.

¹¹ Ba ba ñañelela ku sa ipeya ku utwa milao ye lukile ya Mulimu ba ka timezwa ku timelelezwa. (2 Matesalonika 1:8, 9) Ha ba sa na ku ba teñi. Sina Satani ni badimona ba hae, ba ka shwa ku shwelela. (Sinulo 20:10, 14) Kono ba ba ituta ka za Jehova ni ku mu sebeleza ba ka ba ni tabo ye tuna mwa Paradaisi fa lifasi-mubu.

12. Bibele i bulelañi ka za ze ka ezahala kwapili?

¹² Jehova u lelile ku ezeza ba ba mu sebeleza lika ze makaza! Mu bone fela se li bulela Linzwi la hae ka za bupilo bwa mwa Paradaisi fa lifasi-mubu:

•   Lico za ku ca ze ñata: “Buloto [kamba lico] bu ka ba bo buñata mwa naha, mane ni fahalimu a malundu.”—Samu 72:16.

•   Mandu a mande: “Ba ka yaha mandu, ba pile ku ona.”—Isaya 65:21.

•   Musebezi o tabisa: “Baketiwa ba ka, ba ka ikola misebezi ya mazoho a bona nako ye telele. Ha ba na ku sebeza ku sa tusi se siñwi.”—Isaya 65:22, 23.

•   Ha ku na ku ba ni makulanu: “Mi ha ku na mutu . . . ya ka ipulela kuli: Na kula.”—Isaya 33:24.

•   Ha ku na ku ba ni buyanga: “Meto a libofu kih’a ka tutubuluha, lizebe za bosusu, li tibuluhe ni zona. Ibe ya toza u ka tula sina lizwii, lilimi la wa satambi li ka opela za tabo.”—Isaya 35:5, 6.

•   Ha ku na ku ba ni butuku, maswabi, lifu: “[Mulimu] u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.”—Sinulo 21:4.

•   Ha ku na ku ba ni lindwa: “Ki [Mulimu] ya yemisize lindwa mane ni kwa mafelelezo a lifasi.”—Samu 46:9.

•   Bupilo bo bu sa feli: “Ba ba na ni niti ba ka yola sanda sa naha, ni ku yaha mwateñi ku ya ku ile.”—Samu 37:29.

13. Ki mañi a nosi ya kona ku ezisa kuli lifasi le li be paradaisi, mi ki kabakalañi?

¹³ Batu ha ba koni ni kamuta ku eza lika ze cwalo, kono Jehova u na ni m’ata a ku eza zote z’a bulela kuli u ka li eza. Ha ku na ze kona ku mu palelwisa ku eza z’a bata ku eza. Bibele i li: “Ku Mulimu ha ku na linzwi le li pala ku ezahala.”—Luka 1:37.

14. Mu kona ku ba cwañi mwa nzila ye isa kwa bupilo bo bu sa feli?

¹⁴ Ka Lipaki za hae, Jehova u sweli ku fa batu kakai ni kakai nako ya kuli ba “kene ka munyako o kumbani” ni ku zamaya mwa nzila ye isa kwa bupilo bo bu sa feli. Haike mu be mwahal’a batu ba ba tabile ba ba amuhela memo yeo. Haike mu swalisane ni bulapeli bwa niti mi mu ikole limbuyoti za Jehova ku ya ku ile!—Mateu 7:13, 14.