1. Lu lukela ku ezañi kuli lu tabise Mulimu?

 KULI lu be ni swalisano ye nde ili ye lilato ni Mulimu, lu lukela ku ikambusa kwa bulapeli bwa buhata. Lu lukela ku ba ni bulapeli bwa niti. Kacenu, bolule-lule ba batu ba sweli ku eza cwalo.

2. Lipaki za Jehova ba konwa ku fumanwa kai, mi ba sweli musebezi ufi?

² Sina Bibele ha ne i polofitile, balapeli ba niti ba eza “buñata bo butuna bwa batu” ba ba “zwa mwa macaba kaufela, ni mwa mishobo, ni mwa masika, ni mwa lipuo kaufela.” (Sinulo 7:9) Mwa linaha ze 235, bolule-lule ba Lipaki za Jehova ba patehile ku tusa ba bañwi ku ituta zeo Jehova a tokwa ni ka za linzila za hae ze lilato.

3. Lipaki ba lapela mañi, mi ba tokolomoha bulapeli bwa mufuta mañi?

³ Lipaki ba lumela kuli ki Jehova a nosi ya lukela ku lapelwa. Ba hana ku kubamela milimu ya buhata kamba maswaniso a bulapeli. (1 Joani 5:21) Ha ba lapeli bafu ka ku abana ku za mitande kamba lizo ze ñwi ze fuzelela litumelo za bulapeli bwa buhata ni “lituto za badimona.” (1 Timotea 4:1) Kono ba omba-omba ba ba shwezwi ki balatiwa ka ku talusa sepiso ya Mulimu ya kuli ku ka ba ni zuho ya bafu ba ba ka pila mwa paradaisi ya fa lifasi-mubu.—Joani 5:28, 29; Likezo 24:15.

4. Mayemo a batu ba Mulimu ku za mabibo ki afi?

⁴ Lipaki ha ba ikenyi ku za mabibo kamba buloi, kakuli ba ziba kuli lika zeo li zwa ku Diabulosi. Ha ba itingi fa mabibo kuli a ba sileleze, ba itinga ku Jehova.—Liproverbia 18:10.

5. Lipaki za Jehova “hasi ba lifasi” ka nzila ifi?

⁵ Jesu n’a bulezi kuli balutiwa ba hae ne ‘ba si ke ba ba ba lifasi.’ (Joani 17:16) Yena Jesu ka sibili n’a hanile ku ikenya mwa bupolitiki bwa mwa miteñi ya hae. (Joani 6:15) Ka ku swana, Lipaki ha ba ikenyi mwa bupolitiki, ku lata hahulu naha, ni lifapano za batu ka ku ya ka miinelo ya bona mwa lifasi le. Kono ba lifa mitelo ya bona ni ku latelela milao ya naha mo ba pila.—Joani 15:19; Maroma 13:1, 7.

6. Batanga ba Mulimu ba latelela likuka lifi ka za manyalo ni telekano?

⁶ Kakuli ba ipeya kwatas’a milao ya milonga, Lipaki ba bona teñi kuli manyalo a bona a catiswa. (Tite 3:1) Ba ipeya kwatas’a ketelelo ya Mulimu, mi kacwalo ba tokolomoha ku nyala libali. (1 Timotea 3:2) Hape, bakeñisa kuli ba sebelisa likuka za Bibele mwa bupilo bwa bona, batanga ba Mulimu ha ba libeleli kuli linyalo la bona li ka fela ka telekano.

7. Lipaki ba bonisa cwañi kuli ba latana?

⁷ Lipaki ba latana. Lilato leo, hamoho ni ku lata Mulimu, la ba swalisanisa luli, niha ba zwa mwa mishobo ni macaba a mañata. Ha ku ba ni kozi kamba ha ku ba ni butokwi, Lipaki kapili-pili ba tusana. Lipaki ba bonisa lilato ka mo ba pilela.—Joani 13:35.

8. Batu ba Mulimu ba tokolomoha likezo mañi ze maswe?

⁸ Batu ba Jehova ba sebeza ka t’ata ku pila ka ku sepahala ili ka ku luka. Ba tokolomoha busholi, buhata, buhule, bucakolwa, ni ku sa sepahala mwa lipisinisi. Banna ha ba bumauli basali ba bona. Pili ba si ka ba Lipaki, ba bañwi ne ba ezanga zona likezo zeo, kono ka tuso ya Jehova, ba li tuhezi. Ku Mulimu, ba “tapisizwe.”—1 Makorinte 6:9-11.

9. Buka ye ñwi ne i buleziñi ka za likeleke za mwa Africa ze twi ki za Sikreste?

⁹ Ki niti kuli bulapeli bo buñata bu ipapata kuli bu na ni niti. Ba kana ba bonisa misebezi ye mituna ku ba bupaki bwa seo. Ka mutala, ka za ze twi ki likeleke za Sikreste za mwa Africa, buka ye ñwi i li: “Musebezi wa mutu wa mabibo kamba wa milyani hañata s’o yolilwe ki [likwata ze nca za Sikreste]. . . . Ba ipapata ku fa litaula ni ku eza limakazo. Bapolofita mwahal’a bona ba fa lipono ni ku talusa litolo. Ba itusisa mezi a kenile, oli ye kenile, mufuse, likandela ni insense kuli ba folise ni ku tibela matuku.”

10, 11. Ki kabakalañi ze twi ki limakazo kacenu ha li sa bonisi kuli bulapeli bo buñwi bu zwa ku Mulimu?

¹⁰ Ba bulapeli b’o ba ipapata kuli limakazo zeo li bonisa kuli bulapeli bwa bona bu fuyozwi ki Mulimu. Kono ze twi ki limakazo zeo ha li bonisi kuli bulapeli bo buñwi bwa amuheleha ku Jehova. Satani u fa m’ata kwa balapeli ba buhata kuli ba eze “limakazo.” (2 Matesalonika 2:9) Hape, Bibele ne i polofitile kuli limpo za limakazo ze zwa ku Mulimu, inge cwalo bupolofita, lipuo, ni zibo ye ipitezi, ne li “ka fela.”—1 Makorinte 13:8.

¹¹ Jesu n’a lemusize kuli: “Hasi batu kaufela ba ba li ku na: Mulena, Mulena, ba ba ka kena mwa mubuso wa kwa lihalimu; kono ku ka kena ya eza se si latwa ki Ndate ya kwa lihalimu. Mwa lizazi leo, ba bañata ba ka li ku na: Mulena, Mulena, ha lu li, ki luna ne lu polofita ka Libizo la hao? mi ne lu leleka balimu ka Libizo la hao? mi ne lu eza limakazo ze ñata ka Libizo la hao? Ki ha ni ka ba bulelela patalaza, ni li: Ha ni si ka mi ziba haisali; mu zwe ku na, mina ba ba sebezanga ze maswe.”—Mateu 7:21-23.

12. Ki bomañi ba ba ka kena mwa Mubuso wa kwa lihalimu?

¹² Kacwalo, ki bomañi he ba ba ka kena mwa Mubuso wa kwa lihalimu? Ki ba ba eza tato ya Jehova.

13. Ki musebezi mañi w’o Mulimu a laela batu ba hae kacenu kuli ba u eze, mi ki bomañi ba ba sweli ku u eza?

¹³ Mulimu u bata kuli batu ba hae ba ezeñi kacenu? Jesu n’a ize: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana.” (Mateu 24:14) W’o ki ona musebezi o ba sweli ku eza ka cisehelo Lipaki za Jehova.

14. Mubuso wa Mulimu ki nto mañi, mi ki bomañi ba ba ka busa mwa Mubuso w’o?

¹⁴ Mwa “lifasi kamukana,” Lipaki za Jehova ba shaela Mubuso wa Mulimu ku ba ona mulonga wa kwa lihalimu o ka busa lifasi kaufela ka ku luka. Ba luta kuli Jehova u ketile Kreste Jesu ku ba yena Mulena wa Mubuso w’o, hamoho ni babusi ba bañwi ba 144,000 ba ba ketilwe mwahal’a batu.—Daniele 7:14, 18; Sinulo 14:1, 4.

15. Mubuso w’o u ka shandaulañi?

¹⁵ Ka ku itusisa Bibele, Lipaki ba bonisa batu kuli Mubuso wa Mulimu u ka shandaula muinelo kamukana wa Satani. Bulapeli bwa buhata ni lituto za bona ze shwaulisa Mulimu ni ku kutekehisa Diabulosi li ka fela! (Sinulo 18:8) Hape ni milonga kaufela ya batu ye hanyeza Mulimu ni yona i ka fela!—Daniele 2:44.

16. Ki bomañi ba ba ka busiwa ki Kreste Jesu, mi ba ka pila kai?

¹⁶ Hape, Lipaki za Jehova ba zibahaza kuli Kreste Jesu u ka tusa hahulu bote ba ba eza z’a tokwa Mulimu. Ba ka ba fa lifasi mwatas’a puso ya hae. Bibele i sepisa kuli: “U ka lamulela mubotana ya itilelela ku yena, ni yena mukunyandela ya si na ya mu tusa. Ya fokozi, ni ya shebile, u ka ba utwela butuku, a lamulele bupilo bwa ba ba nyandile.”—Samu 72:12, 13.

17. Ki bomañi ba nosi ba ba sweli ku shaela Mubuso wa Mulimu?

¹⁷ Ha ku na sikwata se siñwi sa batu se si eza tato ya Mulimu ka ku kutaza taba ye nde ya Mubuso. Ki Lipaki za Jehova ba nosi ba ba sweli ku shaela Mubuso wa Mulimu mwa lifasi kamukana.