1, 2. Ki swanisezo mañi ye bonisa butokwa bwa ku ba ni sipimo sa ku atula ka sona litaba za bulapeli?

 LU KONA ku fita cwañi fa ku ziba Mulimu? Kana lu tokwa ku tatuba lituto kaufela za bulapeli bo buñata-ñata? Ne lu si ke lwa kona ku eza cwalo. Niha ne lu ka kona ku eza cwalo, ne lu ka ziba cwañi tuto ye li ya niti?

² Kaniti, kabakala mihupulo ye shutana-shutana ka za Mulimu, lu tokwa nzila yeo ka yona lu kona ku ziba niti, ili sipimo seo batu ba kona ku si amuhela. Ka mutala: Mu nge kuli mwa musika ku na ni kañi ka za butelele bwa lisila. Mulekisi u bulela kuli lisila leo li eza limita z’e talu mwa butelele, kono muleki u bona kuli ki le li kuswani. Taba yeo i kona ku tatululwa cwañi? Ka ku pima lisila leo ka sipimiso.

3. Bibele ne i ñolezwiñi?

³ Kana ku na ni sipimiso, kamba mutomo, wa ku atula ka ona litaba za bulapeli? Ee, ki Bibele. Mulimu n’a boni teñi kuli Bibele ya ñolwa ilikuli batu kai ni kai ba kone ku ituta niti ka za hae. Se i hatisizwe ka likopi ze eza bolule-lule. Se i tolokilwe mwa lipuo ze fitelela 2,100, ibe mutumbi kamba likalulo za yona. Buñata-ñata bwa batu ba kona ku ipalela niti ka za Mulimu mwa lipuo za bona.

4. Mwa Bibele ku na ni litaba mañi?

⁴ Bibele ki mpo ya butokwa ye zwa ku Mulimu. I talusa lika zeo kwand’a yona ne lu si ke lwa kona ku li ziba. I lu bulelela ka za ba ba pila mwa liluko la moya. I lu bulelela ka za mw’a ikutwela Mulimu, ka za mw’a inezi,  ni ka za z’a lela ku eza. I lu bulelela ka za mwa n’a ezezanga batu mwa lilimo ze likiti-kiti ze felile. I bulela ka za lika ze ka ezahala kwapili. Mi i bonisa mo lu kona ku fumanela nzila ye isa kwa bupilo bo bu sa feli.

5. Ki mutala ufi o bonisa kuli Bibele ya lumelelana ni sayansi?

⁵ Ku na ni mabaka a mañata ha lu kona ku lumela kuli Bibele luli ki Linzwi la Mulimu. Libaka la pili kikuli Bibele ya lumelelana ni sayansi. Kale-kale, batu mwa lifasi kaufela ne ba nahananga kuli lifasi ne li tiyezi fa nto ye ñwi. Ka mutala, kwa wiko wa Africa, batu ne ba lumela kuli lifasi ne li tiiswa ki noha ye iputile. Kutwi ne i iputile h’a 3,500 fahalimw’a lifasi ni h’a 3,500 kwatas’a lona. Niteñi, ka ku lumelelana ni sayansi, ili lilimo z’e 3,500 kwamulaho, muñoli yo muñwi wa Bibele n’a ñozi kuli Mulimu u “paheka lifasi fahalimu a nto ye siyo.”—Jobo 26:7.

6. Ki bupaki bufi bo butuna ka ku fitisisa bwa kuli Bibele i zwelela ku Mulimu?

⁶ Bupaki bo butuna ka ku fitisisa bwa kuli Bibele kaniti i zwelela ku Mulimu ki ku nepahala kwa yona ha i bulela ka za ze ka ezahala kwapili. Ka ku sa swana ni litaula za batu, Mulimu kaniti luli wa ziba za kwapili; zote za bulelanga za petahalanga.

7. Ki bupolofita bufi bo buñwi bwa mwa Bibele bo ne bu talelelizwe mwa miteñi ya kwaikale?

⁷ Bupolofita bo buñata-ñata bwa mwa Bibele ne bu talelelizwe mwa miteñi ya kwaikale. Ka mutala, lilimo ze 700 Jesu a si ka pepwa kale, Bibele ka ku nepahala ne i bulezi kuli n’a ka pepelwa mwa munzi wa Betelehema, mi ne ku ezahezi honacwalo fela. (Mika 5:2; Mateu 2:3-9) Kwand’a bupolofita bo buñata bo buñwi ka za Jesu, Bibele hape ne i polofitile kuli n’a ka pepiwa ki mwalyanjo mi hasamulaho n’a ka betekiwa ka teko ya masheleñi a silivera a’ 30. Bupolofita b’o ni bona ne bu talelelizwe. Kaniti, ha ku na mutu ni yo mukana ya n’a kona ku polofita lika zeo!—Isaya 7:14; Zakaria 11:12, 13; Mateu 1:22, 23; 27:3-5.

8. Ki bupolofita mañi bwa mwa Bibele bo bu sweli ku talelezwa kacenu, mi bu pakañi?

⁸ Bupolofita bo buñata bwa mwa Bibele  bu sweli ku talelezwa mwa miteñi ya luna. Ki bo bu sikai:

•   “Sicaba si ka taseza se siñwi ka ndwa, mubuso u lwanise mubuso; [lizikinyeho] ze tuna za lifasi li bonahale, ni mafu a maswe mwa mabaka a mañata, ni litala.”—Luka 21:10, 11.

•   “Bumaswe bu ka ekezeha hahulu.”—Mateu 24:12.

•   “Mwa mazazi a maungulelo, . . . batu ba ka ba baitati, ba ba lata mali, . . . ba ba sa utwi bashemi ba bona, . . . ba ba sa koni ku iswala, ba ba na ni buhali, ba ba toya batu ba bande . . . ni ba ba inuneka, ni ba ba lata minyaka, isi Mulimu.”—2 Timotea 3:1-5.

 Kana ha mu lumeli kuli lika zeo li sweli za ezahala cwale? Buniti ni ku nepahala kwa bupolofita bwa mwa Bibele li bonisa kuli Bibele haki buka-buka fela. Ki Linzwi la Mulimu le li tahisizwe ka moya wa hae!—2 Timotea 3:16.

9, 10. Ki nto mañi ye bonisa kuli Mulimu h’a si ka tuhelela batu ku cinca Bibele?

⁹ Mu nge kuli mu na ni fakitori mi mu manekile mukoloko wa milao ya babeleki ba mina. Sila ha ne si ka cinca ze ne mu ñozi fateñi, ne mu ka ezañi? Kana ne mu si ke mwa ñola sinca ze cincizwe? Ka ku swana, Mulimu h’a lumelezi batu ku cinca buniti bwa Linzwi la hae, yona Bibele.

¹⁰ Ba ba likile ku cinca lituto za Linzwi la Mulimu ba palezwi. Ha lu bapanya Bibele ye lu na ni yona kacenu ni likopi za kale za Bibele, lu fumana kuli za swana. Seo si bonisa kuli Bibele ha i si ka cinciwa mwa lilimo ze fitile.