JESU hanaali fa lifasi, naalikanyisize ka kutala butu bwa Ndatahe wa kwa lihalimu ni muezezo wahae wa lika. Naabulezi kuli: “Haniikezezi lika ka ili na; kono nibulela lika ze, ka mwa nilutezi Ndate . . . kamita nieza lika zemutabisa.” (Joani 8:28, 29; Makolose 1:15) Kacwalo, kunyakisisa mo Jesu naangela basali ni mwanaapilisanela ni bona, kuka lutusa kuutwisisa mo Mulimu aangela basali ni mwabatela kuli lupilisanele ni bona.

Litaba zeñozwi mwa Libuka za Evangeli litusize licaziba babañata kulemuha kuli mubonelo wanaanani ona Jesu ka za basali neushutana hahulu ni wa batu babañata bane bapila ka nako yanaasa liteñi fa lifasi. Ka mukwa ufi? Mi sa butokwa nikufita kikuli, kana litaba zanaalutile Jesu zakona kutahisa kuli basali kacenu baikutwe hahulu kulukuluha?

Jesu naasaangi basali sina batu babalukiselizwe feela kueza somano ni bona. Baeteleli ba bulapeli bwa Sijuda babañwi nebaanga kuli kuambola ni musali nekukona feela kutahiseza muuna litakazo za buhule. Kacwalo, bakeñisa kuli basali nebaangiwa kuli nebakona kukenya baana mwa muliko, nebasa lumelezwi kuambola ni baana fapilaa batu kamba kuzwa fa lapa basika apala sesiñwi kwa toho. Kono Jesu yena naaelelize baana kuba ni buiswalo ka kusatuhelela litakazo zabona za nama kubakoma, mi naabasusuelize kukuteka basali ni kuswalisana ni bona.—Mateu 5:28.

Jesu hape naabulezi kuli: “Mutu kaufela yaleleka musalaa hae ni kunyala usili ufoseza musalaa hae ka bubuki.” (Mareka 10:11, 12) Ka kubulela cwalo, Jesu naahanyeza tuto yenezibahala hahulu yene baluta baeteleli ba bulapeli ka nako yeo, ili yenelumeleza baana kuleleka basali babona “ka libaka lifi kamba lifi.” (Mateu 19:3, 9) Taba ya kuli muuna naakona kufoseza musalaa hae ka bubuki neisa zibahali kwa Majuda babañata. Baeteleli ba bulapeli bwabona nebalutanga batu kuli muuna naasakoni feela kufoseza musalaa hae ka bubuki—musali ki yena feela yanaakona kueza cwalo! Caziba yomuñwi wa litaba za Bibele naabulezi kuli: “Jesu naakutekile hahulu basali ni kubonisa kuli ki ba butokwa ka kubulela kuli muuna yanyezi ni yena naakona kufoseza musalaa hae ka bubuki.”

Litaba zanaalutile Jesu molituseza Bakreste kacenu: Mwa liputeho za Sikreste za Lipaki za Jehova, basali balukuluhile kueza siango ni baana ka nako yebali kwa mikopano ya puteho. Nihakulicwalo, habatokwi kuikalelwa kuli mwendi mutu yomuñwi ukaeza linyawe ni bona kamba kubatalima ka nzila yesaswaneli kakuli baana ba Sikreste baanga ‘basali-bahulu sina bo maa bona, likalibe sina likaizeli zabona, ka bukeni kaufela.’—1 Tim. 5:2.

Jesu naabanga ni nako yeñata ya kuluta basali. Jesu naashutana ni batu ba mwa nako yahae bane basatabeli kuli basali bazibe lika, kono yena naalutanga basali ni kubasusueza kufitisa maikuto abona. Ka kuzwelapili kuluta Maria, Jesu naabonisize kuli musebezi wa musali haki kulukisa feela lico kamba kueza misebezi yemiñwi ya fa lapa. (Luka 10:38-42) Mareta, muhulwanaa Maria, ni yena naatusizwe ki litaba zanaaitutile ku Jesu kuli mane ka nako yanaatimezi Lazaro naaalabile hande lipuzo za Jesu.—Joani 11:21-27.

Jesu naaisa pilu kwa maikuto a basali. Ka nako yeo, basali ba Sijuda babañata nebalumela kuli nto yenekona kutahiseza mutu tabo neli kuba ni mwana yanaakutekeha, sihulu wa mupolofita haiba nekukonahala. Nako yeñwi musali yomuñwi naahuwile kuli: “Ifuyozwi mba yekupepile!” Jesu naaitusisize kolo yeo kutaluseza musali yo taba yeñwi ya butokwa hahulu nikufita. (Luka 11: 27, 28) Jesu naataluselize musali yo kuli kuutwa Mulimu ki kwa butokwa hahulu kufita kumamela milao ya sizo yene balukela kumamela basali.—Joani 8:32.

Litaba zanaalutile Jesu molituseza Bakreste kacenu: Baluti mwa liputeho za Sikreste baitebuhanga likalabo zebafanga basali kwa mikopano ya puteho. Bakuteka basali-bahulu babali “baluti ba lika zende” ni babali mutala omunde nihaiba kwa mukunda. (Tite 2:3) Hape baitebuha musebezi obaeza basali wa kukutaza taba yende ya Mubuso wa Mulimu.—Samu 68:11; mubone mbokisi yeli,  “Kana Muapositola Paulusi Naahanisize Basali Kubulela?” ye fa likepe 9.

Jesu naaisa pilu basali. Mwa linako zene iñolwa Bibele, bana babasizana nebasa angiwi kuba ba butokwa sina bana babashimani. Milao ya sizo sa Sijuda yebizwa Talmud ipaka taba yeo ka kubulela kuli: “Tabo ki ya mutu yanani bana babashimani, mi bumai ki bwa mutu yanani bana babasizana.” Bashemi babañwi nebaanga mwana wamusizana kuli wabaimeza—nebanani kumufumanela muuna ni kulifa malobolo, mi hase basupezi nebasike baitinga ku yena kuli abatuse.

Jesu naabonisize kuli bupilo bwa musizana neli bwa butokwa sina feela bwa mushimani—hanaazusize mwanaa Jairusi wamusizana sina feela mwanaazuselize mwanaa mbelwa wa kwa Naine. (Mareka 5:35, 41, 42; Luka 7:11-15) Hamulaho wa kufolisa musali yanaakatazwa ki “moya one umukulisize ka lilimo ze 18,” Jesu naamubizize kuli ki “mwanaa Abrahama,” ili pulelo yenesa itusiswangi hahulu kwa basali mwahalaa Majuda. (Luka 13:10-16) Ka kuitusisa pulelo yeo yenebonisa likute ni sishemo, Jesu naabonisize kuli musali yo neli wa butokwa sina mutu ufi kamba ufi mi naanani tumelo yetiile.—Luka 19:9; Magalata 3:7.

Litaba zanaalutile Jesu molituseza Bakreste kacenu: Pulelo yeñwi ya kwa Asia ili: “Kuuta mwana wamusizana kuswana sina kuselaela simu ya mutu yeuyahile mabapa ni yena,” bakeñisa kuli basizana bazwanga fa lapa hase banyezwi. Bo ndate lubasi babalilato habaswaneli kukukuezwa ki mubonelo ocwalo kono baswanela kubabalela hande bana babona kaufela, ibe kuli ki babashimani kamba ki babasizana. Bashemi babali Bakreste babonanga teñi kuli bana babona kaufela baisiwa kwa likolo ni kuli banani buikangulo bobunde.

Jesu naasepile basali. Mwa likuta za Sijuda, bupaki bone bufiwa ki musali nebuungiwa kuli nebuswana feela ni bupaki bone bufiwa ki mutanga. Caziba wa litaba zakale wa mwa linako za baapositola, yabizwaJosephus, naabulezi kuli: “Bupaki bobufiwa ki basali habuswaneli kuamuhelwa kakuli basali ki batu babasa sepahali.”

Jesu naashutana hahulu ni batu bane banani mubonelo ocwalo, yena mane naataluselize basali kufa bupaki ka za zuho yahae. (Mateu 28:1, 8-10) Nihaike kuli basali babasepahala bao nebaiponezi Mulenaa bona habulaiwa ni kubulukiwa, baapositola nebasika kolwa manzwi abona. (Mateu 27:55, 56, 61; Luka 24:10, 11) Nihakulicwalo, ka kuiponahaza pili kwa basali, Kreste yanaazusizwe kwa bafu naabonisize kuli basali ni bona nebakona kufa bupaki sina feela balutiwa bahae babañwi.—Likezo 1:8, 14.

Litaba zanaalutile Jesu molituseza Bakreste kacenu: Mwa liputeho za Lipaki za Jehova, baana babanani buikalabelo babonisanga kuli bakuteka basali ka kuteeleza ka tokomelo ku ze babulela. Baana babanyezi babali Bakreste bona ‘bafa likute’ basali babona ka kuteeleza ku bona ka tokomelo.—1 Pitrosi 3:7; Genese 21:12.

Haiba baana balikanyisa mutala wa Kreste, bakakuteka basali ni kubafa tukuluho sina feela mwanaalelezi Mulimu kwa makalelo. (Genese 1:27, 28) Mwa sibaka sa kuyemela mubonelo obanani ona batu babañwi wa kuli baana ki ba butokwa hahulu kufita basali, baana babanyezi babali Bakreste bona baetelelwa ki likuka za mwa Bibele, mi kueza cwalo kutahiseza basali babona tabo.—Maefese 5:28, 29.

Kaizeli yabizwa Yelena, naanzaa nyandiswa maswe ki muunaa hae ka nako yanaakalile kuituta Bibele. Muunaa hae naahuliselizwe mwa sibaka mone kunani hahulu mifilifili, ili mo baana nebanani mukwa wa kuuzwa musali yebabata kunyala, mi batu babañwi nebanyandiswa hahulu. Bo Yelena batalusa kuli: “Zene niitutile mwa Bibele neli nitiisize. Neni utwisisize kuli kunani mutu yanaa nilata hahulu, kuniinga kuba wa butokwa, ni kuniisa pilu. Hape neniziba kuli bo muunaaka nebaka cinca mone baniingela hane bakakala kuituta Bibele.” Nekubile feela honacwalo, bo muunaa bona nebalumezi kuituta Bibele mi hamulaho wa nako, bakolobezwa sina yomuñwi wa Lipaki za Jehova. Bo Yelena batalusa kuli: “Bo muunaaka nebabile mutala omunde wa kubonisa buiswalo. Nelulemuhile butokwa bwa kuswalelana kuzwelela kwatasaa pilu.” Bafeza ka kubulela kuli: “Likuka za mwa Bibele linitusize hahulu mwa linyalo laka mi niikutwa kuba wa butokwa ni kusilelezwa.”—Makolose 3:13, 18, 19.

Haki bo Yelena feela babanani zebonwi zende. Basali babañata babali Bakreste banani tabo kakuli bona ni baana babona basebelisa likuka za mwa Bibele mwa linyalo labona. Bakutekiwa, kuomba-ombiwa, ni kuikutwa kulukuluha habaeza siango ni Bakreste babañwi.—Joani 13:34, 35.

Baana ni basali babali Bakreste baziba kuli bakeñisa kuli banani sibi mi habasika petahala, ba mwa “maata a bupilo bobusa tusi sesiñwi,” mi habakoni kuitukulula kwa sibi ni lifu. Nihakulicwalo, ka kusutelela ku Mulimu wabona ni Ndataa bona yalilato, yena Jehova, banani sepo ya kuli ‘bakalukululwa kwa butanga bwa kubola’ mi bakaikola “tukuluho yemakaza ya bana ba Mulimu.” Yeo ki mbuyoti yende luli yebaka ikola baana ni basali mwa pabalelo ya Mulimu!—Maroma 8:20, 21.