Jesu uzwa mwa Jerusalema la Mubulo manzibwana, ukutela kwa Betania ye kwa upa wa njetumuko ya Lilundu la Likota za Olive. Mwendi ulobala kwa ndu ya balikani bahae bo Lazaro, Maria, ni Mareta.

Cwale seli kakusasana wa la Nisani 11. Jesu ni balutiwa bahae hape ba mwa musipili, bakutela kwa Jerusalema, iliko Jesu ukayo fumaneha lwa mafelelezo kwa tempele. Ki lizazi lahae la mafelelezo la kukutaza fa nyangela pili asika eza kale Paseka, kukalisa mukiti wa Kupuzo ya lifu lahae, kuzekisiwa ni kubulaiwa hasamulaho.

Habali mwa nzila kuzwa kwa Betania, ili fa Lilundu la Likota za Olive kuliba kwa Jerusalema, Pitrosi ubona kota yanaakutile Jesu maabani kakusasana. Ubulela ka kumakala kuli: “Rabbi, hakubone! Kota ya feiga yene ukutile iomile.”—Mareka 11:21.

Kono ki kabakalañi Jesu hanaaomisize kota ya feiga ye? Utalusa libaka hanaaezize cwalo, ka kualaba kuli: “Kaniti namibulelela nili, haiba muba ni tumelo mi musakakanyi, hamuna kukona kueza feela seniezize kwa kota ya feiga ye, kono ni hamuka bulelela lilundu le kuli, ‘Nanuha mi unepelwe mwa liwate,’ kukaezahala cwalo. Mi lika kaufela zemukupa ka tapelo, hamunani tumelo, muka liamuhela.” (Mateu 21:21, 22) Ka mukwa ocwalo, ukutela kubulela taba yanaabulezi kwamulaho ka za tumelo yekona kusutisa lilundu.—Mateu 17:20.

Kabakaleo, ka kuomisa kota ya feiga, Jesu uluta tuto ya kuli batu batokwa kuba ni tumelo ku Mulimu. Uli: “Lika kaufela zemulapelela ni zemukupa, mube ni tumelo ya kuli muliamuhezi, mi muka lifumana.” (Mareka 11:24) Yeo ki tuto ya butokwa hahulu kwa balateleli ba Jesu kaufela! Ki ya butokwa hahulu kwa baapositola bakeñisa miinelo yetaata yebatuha batalimana ni yona. Hape kunani swalisano yeñwi ye mwahalaa kuomiswa kwa kota ya feiga ni mufuta wa tumelo.

Sicaba sa Isilaele siswana sina kota ya feiga ye. Batu ba mwa sicaba se, ba mwa tumelelano ya bulikani ni Mulimu, mi babonahala inge bababuluka Mulao. Nihakulicwalo, sicaba kaufela sibonisize kuli hasina tumelo mi hasikoni kubeya muselo omunde. Mane sihanile Mwanaa Mulimu! Ka mukwa ocwalo, ka kuomisa kota ya feiga yesabeyi miselo, Jesu ubonisa mwakabela mafelelezo a sicaba se sesisa beyi muselo, sesisina tumelo.

Hamulahonyana kuzwa fo, Jesu ni balutiwa bahae bakena mwa Jerusalema. Sina mwaezezanga kamita, Jesu uya kwa tempele mi ukalisa kuluta batu. Baprisita babahulu ni babahulu ba sicaba, mwendi ka kuhupula zanaaezize Jesu maabani kwa batu bane bacinca masheleñi, bamubuza kuli: “Ueza lika ze ka maata afi? Kamba ki mañi yakufile maata a kueza lika ze?”—Mareka 11:28.

Jesu ualaba kuli: “Nika mibuza puzo iliñwi. Munialabe, mi nika mitaluseza maata enieza ka ona lika ze. Kana kolobezo ya Joani neizwa kwa lihalimu kamba kwa batu? Hamu nialabe.” Cwale balwanisi bahae ki bona base bazingehile. Baprisita ni baana-bahulu baikambota mobaka alabela, bali: “Halukali, ‘Neizwa kwa lihalimu,’ yena ukali: ‘Cwale kiñi hane musika mulumela?’ Kamba lubulele kuli, ‘Neizwa kwa batu’?” Banahana cwalo bakeñisa kuli basaba sicaba, “kakuli kaufelaa bona nebaanga kuli Joani neli mupolofita luli.”—Mareka 11:29-32.

Balwanisi ba Jesu bapalelwa kufumana kalabo yeswanela. Ka mukwa ocwalo, baalaba kuli: “Haluzibi.” Jesu ni yena uli: “Kanti ni na, hanina kumibulelela maata enieza ka ona lika ze.”—Mareka 11:33.