Jesu hasaazusizwe kwa bafu, ueza tukiso ya kukopana ni baapositola bahae ba 11 fa lilundu mwa Galilea. Balutiwa babañwi bababato eza 500 ni bona baile kwateñi, mi babañwi ku bona baakakanya kuli wapila. (Mateu 28:17; 1 Makorinte 15:6) Kono zabulela Jesu ka nako ye libatusa kulumela kuli wapila luli.

Jesu ubulela kuli Mulimu umufile maata kaufela mwa lihalimu ni fa lifasi. Ubalaela kuli: “Ka mukwa ocwalo, hamuye, mi mulute batu ba macaba kaufela kuba balutiwa, mubakolobeze ka libizo la Ndate ni la Mwana ni la moya okenile, mubalute kumamela lika kaufela zeni milaezi.” (Mateu 28:18-20) Kwandaa kubatusa kulumela kuli wapila, ubabonisa kuli usabata kuli taba yende ikutazwe.

Balateleli ba Jesu kaufela, ili baana, basali, ni banana bafiwa taelo yeswana ya kuluta batu kuba balutiwa. Balwanisi bakana balika kubapalelwisa kukutaza ni kuluta batu, kono Jesu ubakolwisa kuli: “Nifilwe maata kaufela mwa lihalimu ni fa lifasi.” Taba yeo iama cwañi balateleli bahae? Ubabulelela kuli: “Hamubone! Niinzi ni mina mazazi kaufela kuisa nako ya kufela kwa lifasi.” Jesu habuleli kuli batu kaufela babaka kutaza taba yende bakafiwa maata akueza limakazo. Kono bakatusiwa ki moya okenile.

Jesu ubonahala kwa balutiwa bahae “mwa mazazi a 40 kaufela” hasazusizwe kwa bafu. Nihaike kuli balutiwa bahae nebapalelwa kumuziba, “naaiponahalize ku bona inzaa pila ka bupaki bobuñata bobukolwisa,” kuli abalute ka za “Mubuso wa Mulimu.”—Likezo 1:3; 1 Makorinte 15:7.

Kubonahala kuli baapositola basali mwa Galilea, mi Jesu ubalaela kuli bakutele kwa Jerusalema. Hakopana ni bona mwa muleneñi, ubabulelela kuli: “Musike mwazwa mwa Jerusalema, kono muzwelepili kulibelela sasepisize Ndate, semuutwile ku na; kakuli Joani kaniti naakolobelize ka mezi, kono mina mukakolobezwa ka moya okenile mazazinyana kuzwa cwale.”—Likezo 1:4, 5.

Hamulaho wafo, Jesu ukopana hape ni baapositola bahae. Ubaisa “kwande kuyo fita mane kwa Betania,” ye kwa upa kwa njetumuko ya Lilundu la Likota za Olive. (Luka 24:50) Kusina taba kuli Jesu naababulelezi litaba kaufela ka za kukuta kwahae, basalumela kuli Mubuso wahae ukaba fa lifasi.—Luka 22:16, 18, 30; Joani 14:2, 3.

Baapositola babuza Jesu kuli: “Mulena, kana ukutiseza mubuso ku Isilaele ka nako ye?” Jesu ualaba kuli: “Hamusika fiwa kuziba linako kamba myaha yaitomezi Ndate mwa maata ahae anosi.” Kihona akoñomeka hape za musebezi obaswanela kueza, uli: “Mukaamuhela maata moya okenile hauka taha ku mina, mi mukaba lipaki zaka mwa Jerusalema, mwa Judea kaufela ni mwa Samaria, ni kuyo fita kwa libaka za kwahule hahulu za lifasi.”—Likezo 1:6-8.

Baapositola ba fa Lilundu la Likota za Olive ni Jesu yazusizwe kwa bafu, Jesu hakala kunanuha kuya kwahalimu. Honafo lilu lamukwahela kuli basike bamubona. Jesu hasaazusizwe kwa bafu, naaiponahalize kwa batu ka mibili ya butu. Kono cwale usiya mubili wanaali ku ona, mi ukambamela kwa lihalimu sina sibupiwa sa moya. (1 Makorinte 15:44, 50; 1 Pitrosi 3:18) Baapositola babasepahala bao habanze bamutalimezi cwalo, “baana bababeli babaapezi liapalo zesweu” bato yema kwatuko ni bona. Baana bao ki mangeloi, mi abuza kuli: “Baana ba Galilea, muyemeziñi munze mutalimezi mwa mbyumbyulu? Jesu yo yaangezwi mwa mbyumbyulu kuzwa ku mina, ukataha ka mukwa oswana ni omu muboni aya ka ona mwa mbyumbyulu.”—Likezo 1:10, 11.

Jesu haaboniwi ki batu babañata haya kwa lihalimu; balateleli bahae babasepahala ki bona feela babaiponela yena. Ukakuta “ka mukwa oswana”—asabonwi ki batu babañata; ki balateleli  bahae feela babasepahala babaka ziba za kubateñi kwahae mwa maata a Mubuso.

Baapositola bakutela kwa Jerusalema. Mazazinyana kuzwa fo, bakopana ni balutiwa babañwi, hamoho cwalo ni “Maria mahe Jesu ni banyani ba Jesu.” (Likezo 1:14) Sikwata se, sizwelapili kulapela. Balapela kuli kuketiwe mulutiwa yaka yola Judasi Isikariota ilikuli palo ya baapositola ikwane 12 sina mone kuinezi. (Mateu 19:28) Babata muapositola yaziba hande za misebezi ya Jesu ni za zuho yahae. Baposa loto kuli bazibe tato ya Mulimu, mi lo ki lwamafelelezo mwa Bibele kubulelwa za loto. (Samu 109:8; Liproverbia 16:33) Kwaketwa Matiasi, iliyo mwendi neli yomuñwi wa ba 70 banaalumile Jesu kuyo kutaza, “mi abalelwa kwa palo ya baapositola ba 11.”—Likezo 1:26.

Hasekufitile mazazi a lishumi kuzwa fa kambamela Jesu kwahalimu, Mukiti wa Sijuda wa Pentekota ya silimo sa 33 C.E. waezwa. Ibato ba balutiwa ba 120 babakopanezi mwa muzuzu wa kwahalimu mwa Jerusalema. Honafo mulumo oswana sina mulumo wa moya ofuka ka maata hahulu watala mwa ndu mobainzi. Kubonahala lika zeswana sina malimi a mulilo, ku yomuñwi ni yomuñwi wa babakopani mwa muzuzu wo. Balutiwa kaufela bakalisa kubulela lipuo zeshutana-shutana. Basululezwi moya okenile wanaa basepisize Jesu!—Joani 14:26.